ଭୁବନେଶ୍ୱର(ସତ୍ୟପାଠ ବ୍ୟୁରୋ): ଜମ୍ମୁ କାଶ୍ମୀରର ପୁଞ୍ଝ ଜିଲ୍ଲାରେ ସୁରକ୍ଷା ବାହିନୀକୁ ବଡ଼ ସଫଳତା। ଆତଙ୍କବାଦୀ ଓ ଯବାନାଙ୍କ ମଧ୍ୟରେ ଗୁଳିବିନିମୟରେ ଯବାନଙ୍କ ଗୁଳିରେ ଟଳିଲେ ୪ ଆତଙ୍କୀ। ମିଳିଥିବା ସୂଚନା ଅନୁଯାୟୀ, ଏହି ଆତଙ୍କବାଦୀମାନେ ପାକିସ୍ତାନରୁ ଅନୁପ୍ରବେଶ କରିଥିଲେ ଏବଂ କାଶ୍ମୀରରେ କିଛି ବଡ଼ ଘଟଣା ଘଟାଇବାକୁ ଷଡଯନ୍ତ୍ର କରୁଥିଲେ।ସୁରକ୍ଷା ବାହିନୀ ସୂଚନା ପାଇଁ ଏକ ଅପରେସନ ଆରମ୍ଭ କରିଥିଲା। ଆତଙ୍କବାଦୀଙ୍କୁ ଡ୍ରୋନ୍ ମାଧ୍ୟମରେ ରାତିସାରା ନଜର ରଖାଯାଇଥିଲା।
ପରେ ଯବାନ ଏବଂ ଆତଙ୍କବାଦୀଙ୍କ ମଧ୍ୟରେ ଗୁଳିବିନିମୟ ହୋଇଥିଲା। ଘଟଣାସ୍ଥଳରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ଏବଂ ଗୁଳି ଜବତ କରାଯାଇଛି। ଏହି ଅଞ୍ଚଳରେ ସର୍ଚ୍ଚ ଅପରେସନ ଜାରି ରହିଛି। ପୋଲିସର ସୂଚନାନୁସାରେ, ସେମାନଙ୍କ ନିକଟରୁ ଆପତ୍ତିଜନକ ସାମଗ୍ରୀ ଉଦ୍ଧାର କରାଯାଇଛି। ଅଧିକ ତଦନ୍ତ ପାଇଁ ସମସ୍ତ ଉଦ୍ଧାର ସାମଗ୍ରୀ ଜବତ କରାଯାଇଛି। ଏହି ଆତଙ୍କବାଦୀଙ୍କ ବିରୋଧରେ ପୋଲିସ ଖାଗ ଥାନାରେ ଆଇନର ସମ୍ପୃକ୍ତ ବିଭାଗ ଅଧୀନରେ ମାମଲା ରୁଜୁ କରିଛି ଏବଂ ଅଧିକ ତଦନ୍ତ ଜାରି ରହିଛି।
ଜାମ୍ମୁ କାଶ୍ମୀର ପୋଲିସ ଗତ କିଛି ଦିନ ତଳେ ୫ ଜଣ ଆତଙ୍କବାଦୀଙ୍କୁ ଗିରଫ କରିଥିଲା। ଏହା ସହିତ ଆପତ୍ତିଜନକ ସାମଗ୍ରୀ ମଧ୍ୟ ତାଙ୍କ ନିକଟରୁ ଉଦ୍ଧାର କରାଯାଇଥିଲା। ବଡ଼ଗାମ ଜିଲ୍ଲାରୁ ଆତଙ୍କବାଦୀଙ୍କୁ ପୋଲିସ ଗିରଫ କରିଥିଲା। ଏହି ଆତଙ୍କବାଦୀମାନେ ନିଷିଦ୍ଧ ଆତଙ୍କବାଦୀ ସଂଗଠନ ଲଶ୍କର-ଏ-ତୈୟବା ସହିତ ଜଡିତ ଥିଲେ। ପୋଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ପୋଲିସ ଏବଂ ସେନାର ମିଳିତ ଅପରେସନରେ ବଡ଼ଗାମର ୫ ଆତଙ୍କବାଦୀ ସହଯୋଗୀଙ୍କୁ ଗିରଫ କରିଥିଲା।
ସୂଚନା ଥାଉକି ଲଶ୍କର-ଇ-ତୈୟବା ଏକ ଆତଙ୍କବାଦୀ ସଂଗଠନ। ଏହାର ମୁଖ୍ୟ ହେଉଛି ହାଫିଜ ମହମ୍ମଦ ସଇଦ। ବର୍ତ୍ତମାନ ସେ ଲାହୋରରୁ ଏହି ସଂଗଠନ ଚଳାଉଛି। ଏହି ସଂଗଠନ ପାକିସ୍ତାନ ଦଖଲ କରିଥିବା ଅନେକ ଆତଙ୍କବାଦୀ ଶିବିର ଚଳାଇଥାଏ।
