ଭୁବନେଶ୍ୱର(ସତ୍ୟପାଠ ବ୍ୟୁରୋ): ଦେଶରେ ବର୍ତ୍ତମାନ ଅନେକ ରାଜ୍ୟମାନଙ୍କରେ ହିଂସାକାଣ୍ଡ ହେଉଥିବାର ଖବର ସାମ୍ନାକୁ ଆସିବାରେ ଲାଗିଛି । ଏହା ମଧ୍ୟରେ ଦେଶର ଅନେକ ରାଜ୍ୟରେ ହିଂସାକୁ ନେଇ ବିରୋଧୀ ଦଳ ପ୍ରଧାନମନ୍ତ୍ରୀ ମୋଦୀଙ୍କ ନିରବତା ଉପରେ ପ୍ରଶ୍ନ କରିଛନ୍ତି। ଯାହା ଉପରେ ବର୍ତ୍ତମାନ ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ସଭାପତି ଜେ.ପି ନଡ୍ଡା ଦେଶବାସୀଙ୍କୁ ଏକ ଖୋଲା ଚିଠି ଲେଖି ନିଜର ମତ ରଖିଥିବାର ଦେଖିବାକୁ ମିଳିଛି । ସେପଟେ ୧୩ ଟି ରାଜନୈତିକ ଦଳର ବିରୋଧୀ ନେତାମାନେ ଦେଶରେ ଘଟୁଥିବା ସାମ୍ପ୍ରଦାୟିକ ହିଂସାକୁ ନେଇ ପ୍ରଧାନମନ୍ତ୍ରୀ ମୋଦୀଙ୍କ ନିରବତା ଉପରେ ପ୍ରଶ୍ନ କରିଛନ୍ତି। ଏଭଳି ପରିସ୍ଥିତିରେ ଜେପି ନଡ୍ଡା ଏକ ଚିଠି ଲେଖି କଂଗ୍ରେସକୁ ଟାର୍ଗେଟ କରିଥିବାର ଦେଖିବାକୁ ମିଳିଛି । ତେବେ ୧୯୬୯ ମସିହାରେ ଗୁଜୁରାଟ, ୧୯୮୦ ରେ ମୋରାଡାବାଦ, ୧୯୮୪ ରେ ଭୱାଣ୍ଡି, ୧୯୮୭ ରେ ମେରୁଟ ହିଂସା, ୧୯୮୦ ମସିହାରେ କାଶ୍ମୀର ଉପତ୍ୟକାରେ ହିନ୍ଦୁଙ୍କ ବିରୁଦ୍ଧରେ ହିଂସା, ୧୯୮୯ ରେ ଭାଗଲପୁର, ୧୯୯୪ ରେ ହବଲିରେ କଂଗ୍ରେସ ଅଧୀନରେ ସାମ୍ପ୍ରଦାୟିକ ହିଂସା ହୋଇଥିଲା। ତାଲିକା ଲମ୍ବା ଅଟେ ବୋଲି କହିଛନ୍ତି ।
ଏହା ସହ ସ୍ୱାଧୀନତାର ୧୦୦ ତମ ବାର୍ଷିକୀ ଅର୍ଥାତ ୨୦୪୭ ମସିହାରେ ଜନସାଧାରଣ କେଉଁ ପ୍ରକାର ସରକାର ଚାହୁଁଛନ୍ତି ତାହା ବିଚାର କରିବାକୁ ଅନୁରୋଧ କରିଛନ୍ତି । ଜେପି ନଡ୍ଡା ଆହୁରି କହିଛନ୍ତି, “ସେହିପରି କଂଗ୍ରେସ ଶାସନ ଅଧୀନରେ ଦଳିତ ଏବଂ ଆଦିବାସୀଙ୍କ ବିରୋଧରେ ସବୁଠାରୁ ଭୟଙ୍କର ହତ୍ୟାକାଣ୍ଡ ଘଟିଛି। ଏହା ହେଉଛି ସମାନ କଂଗ୍ରେସ ଯାହା ବିଧାନସଭା ନିର୍ବାଚନରେ ଡକ୍ଟର ଆମ୍ବେଦକରଙ୍କୁ ପରାସ୍ତ କରିଛି। ଏଥିସହ ଜେପି ନଡ୍ଡା ବିରୋଧୀ ଦଳକୁ ଲେଖିଥିବା ପତ୍ରରେ ଅଭିଯୋଗ କରିଛନ୍ତି ଯେ ବିରୋଧୀ ଦଳ ‘ବିଭାଜନକାରୀ’ ଏବଂ ‘ଭୋଟ୍ ବ୍ୟାଙ୍କ’ ରାଜନୀତି କରୁଛନ୍ତି। “ବିକାଶ ରାଜନୀତି” ଗ୍ରହଣ କରିବାକୁ ସେ ବିରୋଧୀ ଦଳମାନଙ୍କୁ ନିବେଦନ କରିଛନ୍ତି। ଏ ଖବର ସାମ୍ନାକୁ ଆସିବା ପରେ ସାରା ଦେଶର ରାଜନୈତିକ ମାହୋଲ ବେଶ ଚଳଚଞ୍ଚଳ ହୋଇ ଉଠିଛି ।
