(ସତ୍ୟପାଠ ବ୍ୟୁରୋ) ଭୁବନେଶ୍ବର : ବିଜେପି ଜନ ଆଶୀର୍ବାଦ ପଦଯାତ୍ରାରେ ଗୁଳି ଫୁଟାଇ ଅଡୁଆରେ କର୍ମୀ। କର୍ଣ୍ଣାଟକାରେ ମଙ୍ଗଳବାର ପଦଯାତ୍ରା ଚାଲିଥିବା ବେଳେ ବିଜେପି କର୍ମୀମାନେ ଏକାଧିକ ରାଉଣ୍ଡ ଫାଙ୍କା ଗୁଳି ଚଳାଇ ନିଜର ଉଗ୍ର ରୂପ ଦେଖାଇଛନ୍ତି।
ବର୍ତ୍ତମାନ ଏହି ଘଟଣାରେ ପୁଲିସ୍ ୪ ଜଣଙ୍କୁ ଗିରଫ କରିଥିବା ବେଳେ ୪ଟି ବନ୍ଧୁକ ଜବତ କରିଥିବାର ଖବର ମିଳିଛି । ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ପୂର୍ବତନ ମନ୍ତ୍ରୀ ବାବାରାଓ ଛିନଚାନସୁର ବନ୍ଧୁକ ଧରି ପୋଜ ଦେଉଥିବା ବେଳେ ବିଜେପି କର୍ମୀମାନେ ନାଚୁଥିବାର ଦୃଶ୍ୟ ଦେଖିବାକୁ ମିଳୁଛି।
ବିଜେପିର ଏହି ଜନ ଆଶୀର୍ବାଦ ପଦଯାତ୍ରାର ନେତୃତ୍ୱ କେନ୍ଦ୍ର ରାଷ୍ଟ୍ରପତି ଭଗବନ୍ତ ଖୁବା ନେଉଥିଲେ। ମୋଦୀ ସରକାରଙ୍କ କ୍ୟାବିନେଟ ବିସ୍ତାର ସମୟରେ ତାଙ୍କୁ ସାର ଓ ରାସାୟନ ରାଷ୍ଟ୍ରମନ୍ତ୍ରୀ ଭାବେ ସ୍ଥାନ ଦିଆଯାଇଛି। ବିଜେପି ମନ୍ତ୍ରିମଣ୍ଡଳରେ ସ୍ଥାନ ପାଇଥିବା ୩୯ ଜଣ ସଦସ୍ୟଙ୍କୁ ଲୋକଙ୍କ ସହ ପରିଚୟ କରାଇବା ପାଇଁ ୨୨ଟି ରାଜ୍ୟରେ ଏପରି ଜନ ଆଶୀର୍ବାଦ ପଦଯାତ୍ରା କରୁଛି।
କର୍ଣ୍ଣାଟକାରୁ ୪ ଜଣ ମନ୍ତ୍ରୀ ହୋଇଥିବାରୁ ସେମାନଙ୍କ ପାଇଁ ମଧ୍ୟ ବିଶାଳ ଜନ ଆଶୀର୍ବାଦ ପଦଯାତ୍ରା କରାଯାଉଛି। ରାଜ୍ୟରେ କରୋନା ସଂକ୍ରମଣ ବଢ଼ୁଥିବା ବେଳେ ଏପରି ପଦଯାତ୍ରା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ୨୪ ଘଣ୍ଟାରେ ୧୨୯୮ ଜଣ କରୋନାରେ ଆକ୍ରାନ୍ତ ହୋଇଥିବା ବେଳେ ୩୮ ଜଣଙ୍କ ଜୀବନ ଯାଇଛି। କେନ୍ଦ୍ର ସାମାଜିକ ନ୍ୟାୟ ମନ୍ତ୍ରୀ ଅନେକଲ ନାରାୟଣସ୍ୱାମୀ, ପଶୁପାଳନ ବିଭାଗର କନିଷ୍ଠ ମନ୍ତ୍ରୀ ଏଲ୍ ମୁରୁଗାନ୍, କୃଷି ରାଜ୍ୟ ମନ୍ତ୍ରୀ ଶୋବା କରାଣ୍ଡଲାଜେ ଏବଂ ଶକ୍ତି ମନ୍ତ୍ରୀ ଭଗବନ୍ତ ଖୁବା ଥିଲେ ।
ବିଜେପି ପକ୍ଷରୁ ହେଉଥିବା ଏହି ରାଲି କୋଭିଡ ମହାମାରୀ ମଧ୍ୟରେ ଅନୁଷ୍ଠିତ ହେଉଛି। କିନ୍ତୁ ଅଧିକାଂଶ ସ୍ଥାନରେ ସୁରକ୍ଷା ପ୍ରୋଟୋକଲକୁ ଅଣଦେଖା କରାଯାଉଥିବାର ଅଭିଯୋଗ ହୋଇଛି ।
