ଭୁବନେଶ୍ୱର,୧୦/୪(ସତ୍ୟପାଠ ବ୍ୟୁରୋ): ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ରାହୁଲ ଗାନ୍ଧୀଙ୍କ ବିରୋଧରେ ମାନହାନି ମକଦ୍ଦମା ଦାୟର କରିବେ । ରାହୁଲ କରିଥିବା ଆଦାନୀ ଗ୍ରୁପ ସହ ଜଡିତ ଏକ ଟ୍ୱିଟ୍ କୁ ନେଇ ସେ ଏହି ମକଦ୍ଦମା ଦାୟର କରିବେ । ଏକ ସାମ୍ବାଦିକ ସମ୍ମିଳନୀରେ ଆସାମ ମୁଖ୍ୟମନ୍ତ୍ରୀ କହିଛନ୍ତି ଯେ, ଏପ୍ରିଲ ୧୪ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁଆହାଟୀ ଗସ୍ତ ପରେ ଏହି ମାନହାନି ମକଦ୍ଦମା ଦାୟର କରାଯିବ।
ସେ କହିଛନ୍ତି, ‘ରାହୁଲ ଗାନ୍ଧୀ ଯାହା ଟ୍ୱିଟ୍ କରିଛନ୍ତି ତାହା ଅତ୍ୟନ୍ତ ଅପମାନଜନକ। ପ୍ରଧାନମନ୍ତ୍ରୀ ଗସ୍ତ ସାରି ଫେରିଯିବା ପରେ ଆମେ ଏହାର ଜବାବ ଦେବୁ। ଗୁଆହାଟୀରେ ନିଶ୍ଚିତ ଭାବେ ମାନହାନି ମକଦ୍ଦମା ଦାୟର କରାଯିବ ବୋଲି ସେ କହିଛନ୍ତି।’ ରିପୋର୍ଟ ଅନୁଯାୟୀ, ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଗତ କିଛି ବର୍ଷ ମଧ୍ୟରେ କଂଗ୍ରେସ ଛାଡିଥିବା କିଛି ନେତାଙ୍କ ଉପରେ ଆକ୍ରମଣ କରି କହିଥିଲେ ଯେ ଆଦାନୀ ମାମଲାରେ ସତ୍ୟ ଲୁଚାଇବା ପାଇଁ ପ୍ରତିଦିନ ବିଭ୍ରାନ୍ତ କରାଯାଉଛି। ସେ ନିଜ ଟ୍ୱିଟରେ କଂଗ୍ରେସ ଛାଡ଼ି ବିଜେପିରେ ମିଶିଥିବା ନିଜର ସ୍ଵତନ୍ତ୍ର ଦଳ ଗଠନ କରିଥିବା କିଛି ନେତାଙ୍କୁ ଟାର୍ଗେଟ କରିଥିଲେ।
ରାହୁଲ ଗାନ୍ଧୀ ଟ୍ୱିଟରରେ ଗୌତମ ଆଦାନୀଙ୍କ ଉଦ୍ଦେଶ୍ୟରେ, ଗୁଲାମ ନବୀ ଆଜାଦ, ଜ୍ୟୋତିରାଦିତ୍ୟ ସିନ୍ଧିଆ, କିରଣ କୁମାର ରେଡ୍ଡୀ ଏବଂ ଅନିଲ କେ. ଆଣ୍ଟୋନିଙ୍କ ନାମରେ ଲେଖିଥିଲେ, “ସତ୍ୟକୁ ଲୁଚାଉଛନ୍ତି, ସେଥିପାଇଁ ପ୍ରତିଦିନ ବିଭ୍ରାନ୍ତ କରନ୍ତି! ପ୍ରଶ୍ନ ସମାନ – ଆଦାନୀ କମ୍ପାନୀଗୁଡିକରେ ବେନାମି ୨୦,୦୦୦ କୋଟି ଟଙ୍କା କାହାର?” କଂଗ୍ରେସ ଛାଡିବା ପରେ ଆଜାଦ ନିଜ ଦଳ ଗଠନ କରିଥିବାବେଳେ ବାକି ନେତା ମାନେ ବିଜେପିରେ ଯୋଗ ଦେଇଥିଲେ। ସିନ୍ଧିଆ ବର୍ତ୍ତମାନ କେନ୍ଦ୍ର ମନ୍ତ୍ରୀ ଥିବା ବେଳେ ହିମନ୍ତା ବିଶ୍ଵ ଶର୍ମା ଆସାମର ମୁଖ୍ୟମନ୍ତ୍ରୀ ଅଛନ୍ତି।
ରାହୁଲ ଗାନ୍ଧୀଙ୍କ ଟ୍ୱିଟ୍ ଉପରେ ହିମନ୍ତା ପ୍ରଥମେ ଟ୍ୱିଟ୍ କରି କହିଥିଲେ, “ଏହା ଆମର ଶାଳିନତା ଥିଲା ଯେ ଆମେ ଆପଣଙ୍କୁ କେବେ ପଚାରିନାହୁଁ ଆପଣ ବୋଫର୍ସ ଏବଂ ନ୍ୟାସନାଲ ହେରାଲ୍ଡ ସ୍କାମରୁ ମିଳିଥିବା ଅପରାଧର ଆୟକୁ କେଉଁଠାରେ ଲୁଚାଇ ରଖିଛନ୍ତି? ଏବଂ ଆପଣ କିପରି ଓତାଭିଓ କ୍ୱାତ୍ରୋଚିକୁ କୁ ଭାରତୀୟ ନ୍ୟାୟର କବଳରୁ ରକ୍ଷା କରିବାକୁ ଦେଲେ? କେହି ନୁହେଁ, ଆମେ କୋର୍ଟରେ ଭେଟିବା।” ଆଜି ପୁଣି ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦୀ ଅନେକ କାର୍ଯ୍ୟକ୍ରମରେ ଭାଗ ନେବାକୁ ଗୁଆହାଟୀକୁ ଆସିବେ। ପ୍ରଧାନମନ୍ତ୍ରୀଙ୍କ ଗସ୍ତ ପରେ ନିଶ୍ଚିତ ଭାବରେ ଗୁଆହାଟୀରେ ରାହୁଲ ଗାନ୍ଧୀଙ୍କ ନାମରେ ମାନହାନି ମକଦ୍ଦମା ଦାୟର କରାଯିବ ବୋଲି ସେ କହିଛନ୍ତି।
