ଭୁବନେଶ୍ୱର(ସତ୍ୟପାଠ ବ୍ୟୁରୋ): ଆଗାମୀ ଲୋକସଭା ନିର୍ବାଚନ ପୂର୍ବରୁ ଉତ୍ତରପ୍ରଦେଶର ରାଜନୀତିରେ ଏକ ବଡ଼ ପରିବର୍ତ୍ତନ ହୋଇଛି। ରବିବାର ଦିନ ଭାରତୀୟ ଜନତା ପାର୍ଟି ନେତୃତ୍ୱାଧୀନ ନ୍ୟାସନାଲ ଡେମୋକ୍ରାଟିକ୍ ଆଲାଇନ୍ସ(ଏନଡିଏ)ରେ ସୁହେଲଦେବ ଭାରତୀୟ ସମାଜ ପାର୍ଟି (ସୁଭାସପା) ଯୋଗ ଦେଇଛି । ଅନେକ ଦିନ ଧରି ଚାଲିଥିବା କଳ୍ପନା ଜଳ୍ପନା ପରେ ସୁହେଲଦେବ ଭାରତ ସମାଜ ଦଳର ମୁଖ୍ୟ ଓମ ପ୍ରକାଶ ରାଜଭର ଏନଡିଏରେ ଯୋଗ ଦେଇଛନ୍ତି।
ଆଜି କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଏନେଇ ଘୋଷଣା କରିଛନ୍ତି। ସେ ଟ୍ୱିଟ୍ କରି କହିଛନ୍ତି ଯେ, ରାଜଭରଙ୍କ ଆଗମନ ଏନଡିଏକୁ ମଜବୁତ କରିବ। ଅମିତ ଶାହା ମଧ୍ୟ ଏହି ସାକ୍ଷାତ ସମୟର ଏକ ଫଟୋ ସେୟାର କରିଛନ୍ତି, ଯେଉଁଥିରେ ଓପି ଓ ତାଙ୍କ ପୁଅ ଅରବିନ୍ଦ ରାଜଭର ମଧ୍ୟ ନଜର ଆସିଛନ୍ତି।
ସେ କ୍ୟାପସନରେ ଲେଖିଛନ୍ତି, ‘ଦିଲ୍ଲୀରେ ଭେଟ ହେବା ପରେ ଓପି ରାଜଭର ଜୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏନଡିଏ ମିଳିତ ମଞ୍ଚରେ ଯୋଗଦେବାକୁ ନିଷ୍ପତ୍ତି ନେଇଛନ୍ତି। ମୁଁ ତାଙ୍କୁ ଏନଡିଏ ପରିବାରକୁ ସ୍ୱାଗତ କରୁଛି। ଉତ୍ତରପ୍ରଦେଶରେ ରାଜଭର ଜୀ ଆସିବା ପରେ ଏନଡିଏ ଶକ୍ତି ପାଇବ ଏବଂ ମୋଦୀ ଜିଙ୍କ ନେତୃତ୍ୱରେ ଗରିବମାନଙ୍କ କଲ୍ୟାଣ ପାଇଁ ଏନଡିଏ ଦ୍ୱାରା କରାଯାଇଥିବା ପ୍ରୟାସ ଅଧିକ ଶକ୍ତି ପାଇବ ବୋଲି ସେ କହିଛନ୍ତି।
ଅନ୍ୟପଟେ ଓପି ରାଜଭର ଟ୍ୱିଟ୍ କରି ଲେଖିଛନ୍ତି- ବିଜେପି ଏବଂ ସୁଭାସପା ଏକାଠି ହୋଇଛନ୍ତି | ସାମାଜିକ ନ୍ୟାୟ, ଦେଶର ସୁରକ୍ଷା – ନିରାପତ୍ତା, ଉତ୍ତମ ଶାସନ, ବଞ୍ଚିତ, ଶୋଷିତ, ପଛୁଆ, ଦଳିତ, ମହିଳା, କୃଷକ, ଯୁବକଙ୍କ ଉନ୍ନତି ପାଇଁ ଭାରତୀୟ ଜନତା ପାର୍ଟି ଏବଂ ସୁହେଲଦେବ ଭାରତ ସମାଜ ପାର୍ଟି ଏକାଠି କାର୍ଯ୍ୟ କରିବେ । ରାଜଭର ଟ୍ୱିଟ୍ କରି କହିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ଦିଲ୍ଲୀରେ ଭେଟିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏନଡିଏ ମିଳିତ ମଞ୍ଚରେ ଯୋଗଦେବାକୁ ନିଷ୍ପତ୍ତି ନେଇଛନ୍ତି।
