ନୂଆଦିଲ୍ଲୀ: ଦେଶର ରାଜନୈତିକ ପରିବେଶ ଆଉଥରେ ତୀବ୍ର ହୋଇଉଠିଛି। ମୁଖ୍ୟ ନିର୍ବାଚନ ଆୟୁକ୍ତ (ସିଇସି) ଜ୍ଞାନେଶ କୁମାରଙ୍କୁ ପଦରୁ ହଟାଇବା ପାଇଁ ବିରୋଧୀ ସାଂସଦମାନେ ସଂସଦର ଉଭୟ ଗୃହରେ ନୋଟିସ ଦାଖଲ କରିଛନ୍ତି। ପିଟିଆଇ ରିପୋର୍ଟ ଅନୁଯାୟୀ, ଏହି ନୋଟିସରେ ଲୋକସଭାର ୧୩୦ ଓ ରାଜ୍ୟସଭାର ୬୩ ସାଂସଦ ସହି କରିଛନ୍ତି।ବିରୋଧୀ ଶିବିରର ଇଣ୍ଡି ମେଣ୍ଟର ପ୍ରାୟ ସମସ୍ତ ସଦସ୍ୟ ଦଳ ଏହି ପଦକ୍ଷେପକୁ ସମର୍ଥନ କରିଥିବା ବେଳେ, ମେଣ୍ଟରେ ନଥିଲେ ମଧ୍ୟ ଆମ୍ ଆଦମୀ ପାର୍ଟି (ଆପ୍) ମଧ୍ୟ ଏହାକୁ ସମର୍ଥନ କରିଛି। କେତେକ ସ୍ୱାଧୀନ ସାଂସଦ ମଧ୍ୟ ଏହି ନୋଟିସରେ ସହି କରିଥିବା ବେଳେ, ଆଉ କେତେକ ସାଂସଦ ଶୀଘ୍ର ସାମିଲ ହେବେ ବୋଲି ସୂଚନା ମିଳିଛି।ସିଇସିଙ୍କୁ ପଦରୁ ହଟାଇବା ପାଇଁ ମହାଭିଯୋଗ ଆଣିବା ଦିଗରେ ଏହାକୁ ପ୍ରଥମ ପଦକ୍ଷେପ ଭାବେ ଦେଖାଯାଉଛି।୭ଟି ଗୁରୁତର ଅଭିଯୋଗବିରୋଧୀ ସାଂସଦମାନେ ଦାଖଲ କରିଥିବା ନୋଟିସରେ ଜ୍ଞାନେଶ କୁମାରଙ୍କ ବିରୋଧରେ ମୋଟ ୭ଟି ଅଭିଯୋଗ ଉଠାଯାଇଛି। ପଦରେ ରହି ଦଳୀୟ ଭେଦଭାବପୂର୍ଣ୍ଣ କାର୍ଯ୍ୟକଳାପରେ ଜଡିତ ହେବା, ନିର୍ବାଚନୀ ଦୁର୍ନୀତି ତଦନ୍ତରେ ଜାଣିଶୁଣି ବାଧା ସୃଷ୍ଟି କରିବା ଓ ପ୍ରଶାସନିକ ନିଷ୍ପତ୍ତିରେ ପକ୍ଷପାତ ଦେଖାଇବା ପରି ଅଭିଯୋଗ ସେଥିରେ ଉଲ୍ଲେଖ ହୋଇଛି।ବିରୋଧୀ ଦଳମାନଙ୍କ ଅଭିଯୋଗ ଅନୁଯାୟୀ, ସ୍ୱତନ୍ତ୍ର ଭୋଟର ତାଲିକା ଅଭିଯାନ ମାଧ୍ୟମରେ ଶାସକ ବିଜେପିକୁ ସୁହାଇବା ଭଳି ପଦକ୍ଷେପ ନିଆଯାଇଛି। ଏହା ନିର୍ବାଚନ ପ୍ରକ୍ରିୟାର ନିଷ୍ପକ୍ଷତା ଉପରେ ପ୍ରଶ୍ନ ଉଠାଇଥିବା ବୋଲି ସେମାନେ ଦାବି କରିଛନ୍ତି।ଏହି ଘଟଣା ପରେ ଦେଶର ରାଜନୈତିକ ମଞ୍ଚରେ ଚର୍ଚ୍ଚା ତୀବ୍ର ହୋଇଛି ଏବଂ ସଂସଦର ଆଗାମୀ ଅଧିବେଶନରେ ଏହା ନେଇ ତର୍କ–ବିତର୍କ ଆଉ ତୀବ୍ର ହେବାର ସମ୍ଭାବନା ରହିଛି।
