ଭୁବନେଶ୍ୱର (ସତ୍ୟପାଠ ବ୍ୟୁରୋ): ମହାରାଷ୍ଟ୍ର ରାଜନୀତିରେ ଗତକାଲି ହୋଇଥିବା ବଡ଼ ହଲଚଲ ପରେ ରାଜ୍ୟର ମହାବିକାଶ ଅଘାଡ଼ି (ଏମ୍ଭିଏ) ପାଇଁ ସଙ୍କଟ ପରିସ୍ଥିତ ସୃଷ୍ଟି ହୋଇଥିଲା। ଦୁଇ ବର୍ଷ ମଧ୍ୟରେ ଦୁଇଟି ବଡ଼ ଝଟ୍କା ଏମ୍ଭିଏକୁ ଦୋହଲାଇ ଦେଇଛି। ପୂର୍ବରୁ ଶିବସେନାକୁ ଦୁଇ ଫାଳ କରିବା ପାଇଁ ବିଜେପିର ରଣନୀତି ସଫଳ ହୋଇଥିବା ବେଳେ ଏବେ ଏନ୍ସିପି (ରାଷ୍ଟ୍ରବାଦୀ କଂଗ୍ରେସ ପାର୍ଟି) ଦୁଇ ଫାଳ ହୋଇଯାଇଛି।
ସେପଟେ ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି)ରେ ଅଜିତ ପାୱାରଙ୍କ ବିଦ୍ରୋହର ଗୋଟିଏ ଦିନ ପରେ ଦଳର ମୁଖ୍ୟ ଶରଦ ପାୱାର ଆଜି ସତାରାରେ ସମର୍ଥକଙ୍କୁ ସମ୍ବୋଧିତ କରିଛନ୍ତି। ପାୱାର କହିଛନ୍ତି ଯେ ବର୍ତ୍ତମାନ ଆମେ ସମସ୍ତେ ଏକଜୁଟ ହେବା ଆବଶ୍ୟକ। ଏହାପୂର୍ବରୁ ଶରଦ ପାୱାର ଏକ ରୋଡ୍ ସୋ କରି ନିଜର ଶକ୍ତି ପ୍ରଦର୍ଶନ କରିଥିଲେ। ସେ କହିଛନ୍ତି, ମହାରାଷ୍ଟ୍ରକୁ ଜାତି ଓ ଧର୍ମ ନାମରେ ବିଭକ୍ତ କରାଯାଉଛି | ଧାର୍ମିକ ବିବାଦ ସୃଷ୍ଟି କରାଯାଇଛି । ଆମେ ମହାରାଷ୍ଟ୍ରକୁ ମଜବୁତ କରିବୁ | ମହାରାଷ୍ଟ୍ରକୁ ଏହାର ଏକତା ଦେଖାଇବାକୁ ପଡ଼ିବ ବୋଲି ସେ କହିଛନ୍ତି|
ସେପଟେ ଭାରତୀୟ ଜନତା ପାର୍ଟିକୁ ଟାର୍ଗେଟ କରି ଏନସିପି ସୁପ୍ରିମୋ କହିଛନ୍ତି ଯେ, ବିଜେପି ସର୍ବଦା ଏହି ପ୍ରକାର ଖେଳ ଖେଳୁଛି। ବିଜେପିକୁ ଏହାର ଉପଯୁକ୍ତ ସ୍ଥାନ ଦେଖାଇବା। ପାୱାର ଆହୁରି କହିଛନ୍ତି ଯେ, ଉଦ୍ଧବ ଠାକରେଙ୍କ ନେତୃତ୍ୱରେ ଆମେ ମହାରାଷ୍ଟ୍ରର ସେବା କରୁଥିଲୁ, କିନ୍ତୁ କିଛି ଲୋକ ଏହି ସରକାରକୁ ଭାଙ୍ଗିଦେଇଥିଲେ। କେବଳ ମହାରାଷ୍ଟ୍ରରେ ନୁହେଁ, ଦେଶରେ ଦିଲ୍ଲୀ, ପଞ୍ଜାବ, ପଶ୍ଚିମବଙ୍ଗ, ଯେଉଁଠାରେ ବି ସରକାର ଗଣତାନ୍ତ୍ରିକ ଉପାୟରେ କାର୍ଯ୍ୟ କରୁଛନ୍ତି, ସେଠାରେ ମଧ୍ୟ ସରକାରଙ୍କ କାର୍ଯ୍ୟରେ ବାଧା ଦିଆଯାଉଛି । ଆମେ ଏସବୁ ବିରୁଦ୍ଧରେ ଠିଆ ହେବାକୁ ଚେଷ୍ଟା କଲୁ କିନ୍ତୁ ଦୁର୍ଭାଗ୍ୟବଶତଃ ଆମମାନଙ୍କ ମଧ୍ୟରୁ କେତେଜଣ ଆମ ସହ ରହିଲେ ନାହିଁ | ହେଲେ ଲୋକମାନଙ୍କର ସମର୍ଥନ ସହିତ ଆମେ ପୁଣି ଶକ୍ତିଶାଳୀ ହେବୁ ଏବଂ ମହାରାଷ୍ଟ୍ର ପୁଣିଥରେ ପ୍ରଗତି ପଥରେ ଆଗକୁ ବଢିବ ବୋଲି ପାୱାର କହିଛନ୍ତି |
