ଭୁବନେଶ୍ୱର,୨୦/୪(ସତ୍ୟପାଠ ବ୍ୟୁରୋ): ବିବାଦ ପରେ ବଦଳିଲେ ସୁନ୍ଦରଗଡ ଜିଲ୍ଲା କୋଇଡ଼ା ବ୍ଲକ୍ର ବିଡିଓ ପଲ୍ଲବୀ ରାଣୀ ରାଜ୍ । କୋଇଡ଼ାରୁ ସମ୍ବଲପୁର କୁ ହୋଇଛି ବଦଳି । ଏନେଇ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ବିଧିବଦ୍ଧ ଭାବେ ସୂଚନା ଦିଆଯାଇଛି । ପଲ୍ଲବୀ ରାଣୀ ରାଜଙ୍କୁ ଉତ୍ତରାଞ୍ଚଳ ଆରଡିସି ଅଫିସ ସମ୍ବଲପୁରକୁ ବଦଳି କରାଯାଇଛି । କୋଇଡା ବିଡିଓଙ୍କ ସମେତ ୧୨ ଜଣ ଓଏଏସ ଅଫିସରଙ୍କ ବଦଳି କରାଯାଇଛି ।
ତେବେ ତିନି ବର୍ଷରୁ ଅଧିକ ସମୟ ଧରି ପଲ୍ଲବୀ ରାଣୀ ରାଜ୍ କୋଇଡ଼ା ବ୍ଲକ୍ରେ ବିଡିଓ ଥିଲେ । ଏହି ସମୟରେ ଏକାଧିକ ଘଟଣାକୁ ନେଇ ସେ ବିବାଦ ଘେରକୁ ଆସିଥିଲେ । ପଲ୍ଲବୀ ରାଣୀ ରାଜ୍ଙ୍କୁ କୋଇଡ଼ାରୁ ସମ୍ବଲପୁରକୁ ବଦଳି ପରେ ସ୍ଥାନୀୟ ତହସିଲଦାରଙ୍କୁ ବ୍ଲକ୍ର ଭାରପ୍ରାପ୍ତ ବିଡିଓ ଭାବେ ନିୟୋଜିତ କରାଯାଇଛି ।
ବ୍ଲକ୍ରେ ଉନ୍ନତିମୂଳକ କାର୍ଯ୍ୟରେ ବାଧା ଦେବା, ପଞ୍ଚାୟତ ଗୁଡ଼ିକରେ ଟଙ୍କା ପଡ଼ି ରହିବା, ବିଧାୟକ ଫଣ୍ଡ୍କୁ ବ୍ଲକ୍ରେ କାର୍ଯ୍ୟକାରୀ ନକରିବା, ସାଧାରଣ ଜନତା ଓ ଲୋକ ପ୍ରତିନିଧିଙ୍କୁ ଦୁର୍ବ୍ୟବହାର କରିବା ଭଳି ଅଭିଯୋଗ ତାଙ୍କ ବିରୋଧରେ ଆସିଥିଲା । ଏନେଇ ପ୍ରତିବାଦ କରି ବିଡିଓଙ୍କ ବଦଳି ଦାବିରେ ସିପିଆଇଏମ୍ର ହଜାର ହଜାର କର୍ମୀ ଧାରଣା ମଧ୍ୟ ଦେଇଥିଲେ। ଏପରିକି ବ୍ଲକ୍ର ସମସ୍ତ କର୍ମଚାରୀ ବିଡିଓଙ୍କ ବଦଳି ଦାବିରେ କଲମ ଛାଡ଼ ଆନ୍ଦୋଳନ ମଧ୍ୟ କରିଥିଲେ ।
ଏହାସହିତ ନିକଟରେ ବାପା ଓ ଭାଇଙ୍କ ବିରୋଧରେ ମାଡ଼ ମାରିବା ନେଇ ଅଭିଯୋଗ ଆଣିବା ସହ ଥାନାରେ ଏତଲା ମଧ୍ୟ ଦେଇଥିଲେ ବିଡିଓ। ଅଭିଯୋଗ ଆଧାରରେ ବାପା ଜେଲ୍ ଯିବା ପରେ ବିବାଦରେ ଛନ୍ଦି ହୋଇ ପଡ଼ିଥିଲେ ପଲ୍ଲବୀ ରାଣୀ ରାଜ୍ ।
