ଭୁବନେଶ୍ୱର(ସତ୍ୟପାଠ ବ୍ୟୁରୋ): ରାଜ୍ୟରେ ପଞ୍ଚାୟତ ନିର୍ବାଚନର ପଞ୍ଚମ ପର୍ଯ୍ୟାୟ ବା ଅନ୍ତିମ ପର୍ଯ୍ୟାୟର ଭୋଟ ଗ୍ରହଣ ଶେଷ ହୋଇଛି । କେବଳ ଧାମନଗର ବ୍ଲକ୍ର ୪୦୫ଟି ବୁଥ୍ରେ ମତଦାନ ହେଉଛି। ଏଠାରେ ୬୧ଟି ଉତ୍ତେଜନାପ୍ରବଣ ବୁଥ୍ ଥିବା ସହ ରାଜନୈତିକ ହିଂସା ଲାଗି ରହିବାରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। କୌଣସିଠାରେ ଯେପରି ଗଣ୍ଡଗୋଳ ନ ହୁଏ, ସେଥିପାଇଁ ବ୍ୟାପକ ପୁଲିସ ମୁତୟନ ହୋଇଛନ୍ତି। ତଥାପି ପଟିସାହି ପଞ୍ଚାୟତ ୧ ନମ୍ବର ବୁଥ୍ରେ ସମସ୍ୟା ଦେଖାଦେଇଥିଲା। ମତଦାନ ଚାଲିଥିବା ବେଳେ ପ୍ରାର୍ଥୀଙ୍କ ଏଜେଣ୍ଟ ଭୋଟ୍ବାକ୍ସ ନେଇଯାଇଥିଲେ।
ଏହି ଘଟଣାକୁ ନେଇ ସେଠାରେ ଉତ୍ତେଜନା ପ୍ରକାଶ ପାଇଥିବା ବେଳେ ପୁଲିସ ୨ ଜଣ ଯୁବକଙ୍କୁ ଅଟକ ରଖିଥିବା ଜଣାପଡ଼ିଛି। ସୁରକ୍ଷା ଓ ସ୍ବଚ୍ଛତାକୁ ଦୃଷ୍ଟିରେ ରଖି ନିର୍ବାଚନ ଅଧିକାରୀ ଉକ୍ତ ବୁଥ୍ରେ ମତଦାନ ପ୍ରକ୍ରିୟାକୁ ବନ୍ଦ କରିଦେଇଛନ୍ତି। ଭଦ୍ରକ ଜିଲ୍ଲାର ଧାମନଗର ବ୍ଲକର କଟସାହିରେ ମତଦାନ ବେଳେ ଭୋଟ ବାକ୍ସ ଦୁର୍ବୃତ୍ତମାନେ ଲୁଟିନେଇଥିଲେ ଏହାଫଳରେ ମତଦାନ ବନ୍ଦ ରହିଥିଲା। ସେଠାରେ ପରିସ୍ଥିତି ଉତ୍ତେଜନାପୂର୍ଣ୍ଣ ରହିଥିଲା।
