(ସତ୍ୟପାଠ ବ୍ୟୁରୋ) ଭୁବନେଶ୍ବର : ଉତ୍ତରପ୍ରଦେଶ ପଞ୍ଚାୟତ ନିର୍ବାଚନରେ ହିନ୍ଦୁତ୍ୱ ଭୋଟ ବ୍ୟାଙ୍କ ର ଗଡ଼ କୁହାଯାଉଥିବା ଅଯୋଧ୍ୟା , କାଶୀ ଏବଂ ମଥୁରାରେ ବିଜେପିକୁ ଶକ୍ତ ଝଟକା ଲାଗିଛି।
ଏପରିକି ଅଯୋଧ୍ୟାରେ ଭବ୍ୟ ରାମମନ୍ଦିର ର ଛବି ବି କାମ ଦେଲା ନାହିଁ। ଏଠାରେ ବିରୋଧୀଦଳ ସମର୍ଥିତ ପ୍ରାର୍ଥୀମାନେ ଭଲ ପ୍ରଦର୍ଶନ କରିଛନ୍ତି। ଅଯୋଧ୍ୟାକୁ ହିନ୍ଦୁ ମାନଙ୍କ ପାଇଁ ଏକ ସ୍ବତନ୍ତ୍ର ସ୍ଥାନରେ ପରିଣତ କରିବା ଏବଂ ରାମ ମନ୍ଦିର ନିର୍ମାଣ ସତ୍ତ୍ୱେ ମନ୍ଦିର ଆନ୍ଦୋଳନର ଶ୍ରେୟ ନେଉଥିବା ବିଜେପିକୁ ଏହି ଅଞ୍ଚଳରେ ସବୁଠୁ ବଡ ଧକ୍କା ଲାଗିଛି। 40 ଟି ଜିଲା ପରିଷଦ ଆସନରୁ ମାତ୍ର ଆଠଟିରେ ଜିତିପାରିଛି। ଏଠାରେ ସମାଜବାଦି ପାର୍ଟି 24 ଟି ସିଟ୍ ପାଇ ସବୁଠାରୁ ଅଧିକ ଲାଭରେ ରହିଛି। ସେହିପରି ବିଏସପି ମଧ୍ୟ ଚାରିଟି ଏବଂ ସ୍ୱାଧୀନମାନେ ୬ ଟି ଆସନରେ ବିଜୟ ହାସଲ କରିଛନ୍ତି। ଅଯୋଧ୍ୟାରେ ବିଜେପି ମୁଖପାତ୍ର ଦୀପକ ସିଂ ସ୍ୱୀକାର କରିଛନ୍ତି ଯେ 2017 ବିଧାନସଭା ନିର୍ବାଚନରେ ଦଳ ସମସ୍ତ ପାଞ୍ଚଟି ବିଧାନସଭା ଆସନରେ ବିଜୟ ହାସଲ କରିଥିବା ସତ୍ତ୍ବେ ପଞ୍ଚାୟତ ନିର୍ବାଚନରେ ଦଳର ପ୍ରଦର୍ଶନ ନୈରାଶ୍ୟଜନକ । ସେ ଆହୁରି ମଧ୍ୟ ନିଶ୍ଚିତ କରିଛନ୍ତି ଯେ ଅଯୋଧ୍ୟା ଜିଲା ପରିଷଦରେ 40 ଟି ଆସନ ମଧ୍ୟରୁ ଦଳ କେବଳ ଆଠଟି ଜିତିପାରିଛି ।
ଅଯୋଧ୍ୟା ସୋହୱାଲ ଉପ-ଜିଲ୍ଲାରେ, ଯେଉଁଠାରେ ସୁପ୍ରିମକୋର୍ଟ ବାବ୍ରି ମସଜିଦ ବଦଳରେ ମସଜିଦ ନିର୍ମାଣ ପାଇଁ ୫ ଏକର ଜମି ଦେବାକୁ ନିର୍ଦେଶ ଦେଇଥିଲେ, ସେଠାରେ ତିନୋଟି ଆସନରେ ଏସପି ଜିତିଥିବା ବେଳେ ଗୋଟିଏ ଆସନରେ ସ୍ୱାଧୀନ ପ୍ରାର୍ଥୀ ବିଜୟୀ ହୋଇଛନ୍ତି। ଉଲ୍ଲେଖନୀୟ କଥା ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘ନିର୍ବାଚନମଣ୍ଡଳୀ ବାରାଣାସୀ, ଯଦିଓ ବିଜେପି ଏବଂ ଏସପି 40 ଟି ଜିଲା ପରିଷଦ ଆସନ ମଧ୍ୟରୁ 16 ଟି ଆସନ ଜିତିଥିବା ଦାବି କରିଛନ୍ତି, ତେବେ ସୂଚନା ମୁତାବକ ବିଜେପି କେବଳ 7 ଟି ଆସନ ପାଇପାରେ ଏବଂ ମାୟାବତୀଙ୍କ ନେତୃତ୍ୱାଧୀନ ବିଏସପି ତିନିଟି ଆସନ ପାଇପାରନ୍ତି । ଆପନା ଦଳ (S) ତିନିଟି ଏବଂ ଅବଶିଷ୍ଟ ଆସନଗୁଡିକ ସ୍ବାଧୀନ ପ୍ରାର୍ଥୀ ଜିତି ପାରନ୍ତି। ମନ୍ଦିର ସହର ମଥୁରାରେ ବିଜେପି 33 ଟି ଜିଲା ପରିଷଦ ଆସନରୁ କେବଳ ଆଠଟି ବିଜୟ ହାସଲ କରିବାରେ ସଫଳ ହୋଇଥିବାବେଳେ ବିଏସପି 13 ଟି ଆସନ ଆରଏଲଡି, ଏସପି ଏବଂ ସ୍ବାଧୀନ ପ୍ରାର୍ଥୀ, ଯଥାକ୍ରମେ 8, 1, ଏବଂ 3 ଆସନରେ ବିଜୟ ହାସଲ କରିଛନ୍ତି। ବିଜେପିର ମଥୁରା ଜିଲ୍ଲା ସଭାପତି ମଧୁ ଶର୍ମା କହିଛନ୍ତି, “ଆମେ ଲୋକଙ୍କ ଜନମତକୁ ଗ୍ରହଣ କରୁଛୁ। ଆମେ ତ୍ରୁଟିର କାରଣଗୁଡ଼ିକର ମୂଲ୍ୟାଙ୍କନ କରିବୁ। ” ମହାମାରୀ ଯୋଗୁଁ ଅନେକ ନେତା ପ୍ରଚାର କରିପାରିନାହାଁନ୍ତି ବୋଲି ସେ କହିଛନ୍ତି। ୟୁପି ବିଜେପି ମୁଖପାତ୍ର ହରିଶ ଚନ୍ଦ୍ର ଶ୍ରୀବାସ୍ତବ କହିଛନ୍ତି ଯେ ସମ୍ପୂର୍ଣ୍ଣ ଫଳାଫଳ ଘୋଷଣା ହେବା ପରେ ଦଳର କ୍ଷୟକ୍ଷତିର ଆକଳନ କରିବେ। ସେ ସ୍ବୀକାର କରିଛନ୍ତି ଯେ ଅନେକ ୱାର୍ଡରେ ବିଜେପି ବିଦ୍ରୋହୀମାନେ ସ୍ୱାଧୀନ ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତା କରିଥିବାରୁ ଦଳ ନୈରାଶ୍ୟଜନକ ପ୍ରଦର୍ଶନ କରିଛି। ତେବେ ବିରୋଧୀଙ୍କ ଏହି ବିଜୟ ପଛର କାରଣ ହେଉଛି, ବିଜେପିରେ ପଦବୀକୁ ନେଇ ଥିବା ମତଭେଦ, କୃଷକ ନେତା ରାକେଶ ଟିକାୟତ ଓ ଅନ୍ୟ ନେତାମାନେ ହିନ୍ଦୁ ଭୋଟ୍ ବାଣ୍ଟିବାରେ ସଫଳ ହୋଇଥିବା ବେଳେ ମୁସଲମାନମାନେ ବିଜେପି ଏବଂ ଏହାର ସହଯୋଗୀ ଦଳକୁ ସମ୍ପୂର୍ଣ୍ଣ ପ୍ରତ୍ଯାଖ୍ଯାନ କରିଛନ୍ତି। ହିନ୍ଦୁ ଭୋଟ୍ ବ୍ୟାଙ୍କକୁ ଭାଙ୍ଗିବା ପଛରେ କୃଷକ ଆନ୍ଦୋଳନର ଏହା ହେଉଛି ରଣନୀତି ବୋଲି ଅନେକ ରାଜନୈତିକ ସମୀକ୍ଷକ ମତ ପ୍ରକାଶ କରିଛନ୍ତି।
