ସତ୍ୟପାଠ ବ୍ୟୁରୋ : ଶ୍ରୀମନ୍ଦିର ରତ୍ନଭଣ୍ଡାରକୁ ନେଇ ଏବେ ବି ଅନ୍ଧାରରେ ଲୋକେ । ଭଣ୍ଡାର ଖୋଲିବା ପାଇଁ ଅନୁମତି ମିଳିବା, ଅଧା ଖୋଲା ହେବା, ଭିତର ଭଣ୍ଡାରର ଚାବି ହଠାତ ହଜିଯିବା , ଚାବି ଖୋଜିବାକୁ କମିଶନ ବସାଯିବା ଆଉ ଆକଷ୍ମିକ ଭାବେ ପୁଣି ଚାବି ମିଳିବା … ଏ ତମାମ ଘଟଣା ପୁରା ପ୍ରସଙ୍ଗକୁ କେବଳ ପ୍ରହେଳିକାମୟ କରି କୋଟି କୋଟି ଜଗନ୍ନାଥ ପ୍ରେମୀ ଏବଂ ଓଡିଶାବାସୀଙ୍କୁ ଅନ୍ଧାରରେ ରଖାଗଲା । ଯାହା ଏବେ ବି ଏକ ପ୍ରହେଳିକା ହୋଇ ରହି ଯାଇଛି । କିନ୍ତୁ ରତ୍ନଭଣ୍ଡାର ଖୋଲାଯାଇ ଭଣ୍ଡାରର ସମ୍ପତ୍ତି ସାର୍ବଜନୀନ କରିବାକୁ ପୁଣି ଦାବୀ ଉଠିଛି ।
ଆଇନ୍ ବିଶେଷଜ୍ଞମାନେ କହୁଛନ୍ତି ଯେ ପ୍ରାୟ ୪୧ ବର୍ଷ ଧରି ଶ୍ରୀମନ୍ଦିରର ଭିତର ରତ୍ନଭଣ୍ଡାରରେ ଥିବା ସାମଗ୍ରୀର ସ୍ଥିତି ପରଖା ଯାଇପାରୁନଥିବା ବେଳେ ଆଇନ୍ଗତ ବ୍ୟବସ୍ଥା ଅନୁଯାୟୀ ସରକାର ଓ ଶ୍ରୀମନ୍ଦିର ପ୍ରଶାସନ ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ଇନ୍ଭେଣ୍ଟ୍ରି କରି ତାଲା ଭାଙ୍ଗି ଗଚ୍ଛିତ ସମ୍ପତ୍ତିର ତାଲିକା ପ୍ରସ୍ତୁତ କରିପାରିବେ ।
ଏଥିପାଇଁ କୌଣସି ଆଇନ୍ଗତ ପ୍ରତିବନ୍ଧକ ନାହିଁ । ଶ୍ରୀମନ୍ଦିର ପ୍ରଶାସନ ଏ ସଂକ୍ରାନ୍ତରେ ସରକାରଙ୍କ କାର୍ୟ୍ୟାନୁଷ୍ଠାନ ପାଇଁ ଅପେକ୍ଷା କରିଥିବା ବେଳେ ଆଇନ୍ ବିଭାଗରୁ କିନ୍ତୁ ସବୁଜ ସଙ୍କେତ ଏଯାବତ୍ ମିଳିନାହିଁ । ଏ ପରିପ୍ରକ୍ଷୀରେ ଲୀଳାମୟ ଶ୍ରୀଜଗନ୍ନାଥଙ୍କ ଭିତର ରତ୍ନଭଣ୍ଡାରର ସମ୍ପତ୍ତି ପ୍ରହେଳିକା ପରି ରହିଛି ।
