ଭୁବନେଶ୍ୱର(ସତ୍ୟପାଠ ବ୍ୟୁରୋ): ପାକିସ୍ଥାନର ଅସ୍ତ୍ରବିରତି ଉଲ୍ଲଂଘନ ପରେ ୨ ଯବାନ ସହିଦ ହେବା ସହ ୫ ସାଧାରଣ ନାଗରିକଙ୍କ ମୃତ୍ୟୁ ହୋଇଥିବାର ସୂଚନା ମିଳିଛି । ଜମ୍ମୁ ଏବଂ କାଶ୍ମୀର ପ୍ରଶାସନ ପକ୍ଷରୁ ଏ ସମ୍ପର୍କରେ ସୂଚନା ଦିଆଯାଇଛି। ପାକିସ୍ତାନୀ ଆକ୍ରମଣରେ ଦୁଇ ଡଜନରୁ ଅଧିକ ଲୋକ ଗୁରୁତର ଆହତ ହୋଇଛନ୍ତି। ତେବେ ମେ ୧୦ ତାରିଖ ସକାଳ ପ୍ରାୟ ୫ଟାରେ ପାକିସ୍ତାନ ପକ୍ଷରୁ ଜମ୍ମୁ ସହର ଏବଂ ଅନ୍ୟାନ୍ୟ ଅଞ୍ଚଳରେ ଅନେକ ଆକ୍ରମଣ କରାଯାଇଥିଲା। ଏହା ସହିତ, ନିୟନ୍ତ୍ରଣ ରେଖାରେ ପ୍ରବଳ ଗୁଳିମାଡ଼ ହୋଇଥିଲା। ପାକିସ୍ତାନୀ ଆକ୍ରମଣ ପରେ ପ୍ରଶାସନ ସତର୍କ ହୋଇଗଲା ଏବଂ ଆହତମାନଙ୍କୁ ଡାକ୍ତରଖାନା ପଠାଗଲା। ପାକିସ୍ତାନ ଡ୍ରୋନ ମାଧ୍ୟମରେ ଆବାସିକ ଅଞ୍ଚଳଗୁଡ଼ିକୁ ଟାର୍ଗେଟ କରିଥିଲା। ସେପଟେ ଜମ୍ମୁ ଏବଂ କାଶ୍ମୀରର ଅଧିକାରୀମାନେ କହିଛନ୍ତି ଯେ ରାଜୌରୀ ସହରରେ ଥିବା ତାଙ୍କ ସରକାରୀ ବାସଭବନ ଉପରେ ହୋଇଥିବା ଆକ୍ରମଣରେ ରାଜୌରୀ ଅତିରିକ୍ତ ଜିଲ୍ଲା ବିକାଶ କମିଶନର ରାଜ କୁମାର ଥାପା ଏବଂ ତାଙ୍କର ଦୁଇ କର୍ମଚାରୀ ଗୁରୁତର ଆହତ ହୋଇଛନ୍ତି।
ଆକ୍ରମଣ ପରେ, ଥାପାଙ୍କୁ ଡାକ୍ତରଖାନା ନିଆଯାଇଥିଲା, ଯେଉଁଠାରେ ତାଙ୍କର ମୃତ୍ୟୁ ହୋଇଥିଲା। ରାଜୌରୀ ସହରର ଏକ ଶିଳ୍ପ କ୍ଷେତ୍ର ନିକଟରେ ହୋଇଥିବା ଗୁଳିମାଡ଼ରେ ମହମ୍ମଦ ଇମତିଆଜଙ୍କ ବ୍ୟତୀତ ଆଉ ଦୁଇଜଣ – ଦୁଇ ବର୍ଷୀୟ ଆୟେଶା ନୁର ଏବଂ ମହମ୍ମଦ ଶୋହିବ (୩୫) ପ୍ରାଣ ହରାଇଛନ୍ତି। ପୁଞ୍ଚ ଜିଲ୍ଲାର ମେନ୍ଧାର ସେକ୍ଟରର କାଙ୍ଗ୍ରା-ଗଲହୁଟ୍ଟା ଗାଁରେ ୫୫ ବର୍ଷୀୟା ରାଶିଦା ବିଙ୍କ ଘର ଉପରେ ମୋର୍ଟାର ସେଲ୍ ପଡ଼ିବାରୁ ତାଙ୍କର ମୃତ୍ୟୁ ହୋଇଥିଲା।
