ଭୁବନେଶ୍ୱର(ସତ୍ୟପାଠ ବ୍ୟୁରୋ): ଆଜି ବାହାରିବ ୫ଟି ରାଜ୍ୟର ବିଧାନସଭା ନିର୍ବାଚନ ଫଳ । ପଶ୍ଚିମବଙ୍ଗ, କେରଳମ୍, ତାମିଲନାଡ଼ୁ, ଆସାମ ଓ କେନ୍ଦ୍ରଶାସିତ ପ୍ରଦେଶ ପୁଡୁଚେରୀର ନିର୍ବାଚନୀ ଫଳାଫଳ ଉପରେ ସାରା ଦେଶର ନଜର ରହିଛି । ଏହା ମଧ୍ୟରେ ଆସନ୍ତୁ ଜାଣିବା ବିଜୟଙ୍କ ନୂତନ ଦଳ TVK ଜିତିବାର ୫ ଫର୍ମୁଲା । ତେବେ ଦୀର୍ଘ ୧୦ ବର୍ଷ ପରେ ଷ୍ଟାଲିନ୍ ସରକାରଙ୍କ ଆସନ ଟଳମଳ ହେବା ସହ ସୁପରଷ୍ଟାର୍ ବିଜୟଙ୍କ ନୂତନ ଦଳ ବିଜୟ ଆଡ଼କୁ ମୁହାଁଉଛି । ଚଳଚ୍ଚିତ୍ର ଜଗତରୁ ସିଧାସଳଖ ରାଜନୀତିକୁ ଆସିଥିବା ୫୧ ବର୍ଷୀୟ ବିଜୟଙ୍କ ଏହି ସଫଳତା ପଛରେ ତାଙ୍କର ଲୋକାଭିମୁଖୀ ପ୍ରତିଶ୍ରୁତି ବା ‘ଚୁନାବୀ ଗ୍ୟାରେଣ୍ଟି’ ମୁଖ୍ୟ କାରଣ ବୋଲି କୁହାଯାଉଛି ।
ପ୍ରଥମରେ ବିଜୟ ପ୍ରତିଶ୍ରୁତି ଦେଇଥିଲେ ଯେ, ଯଦି ତାଙ୍କ ଦଳ କ୍ଷମତାକୁ ଆସେ, ତେବେ ତାମିଲନାଡ଼ୁର ପ୍ରତ୍ୟେକ ଯୁବତୀଙ୍କୁ ବିବାହ ସମୟରେ ସରକାରଙ୍କ ପକ୍ଷରୁ ୮ ଗ୍ରାମ ସୁନା ଏବଂ ଏକ ରେଶମ ଶାଢ଼ୀ ଉପହାର ସ୍ୱରୂପ ପ୍ରଦାନ କରାଯିବ । ଏହି ଘୋଷଣା ଗରିବ ଓ ମଧ୍ୟବିତ୍ତ ପରିବାର ମଧ୍ୟରେ ବେଶ୍ ଆଦୃତ ହୋଇଥିଲା ।
ଦ୍ୱିତୀୟରେ ମହିଳାମାନଙ୍କୁ ସ୍ୱାବଲମ୍ବୀ କରିବା ପାଇଁ ମାସିକ ୨୫୦୦ ଟଙ୍କାର ଆର୍ଥିକ ସହାୟତା ଦେବାକୁ ସେ ଘୋଷଣା କରିଥିଲେ । ଏହା ସହିତ ବୃଦ୍ଧ ଓ ଦିବ୍ୟାଙ୍ଗମାନଙ୍କ ପେନସନ୍କୁ ୩୦୦୦ ଟଙ୍କାକୁ ବୃଦ୍ଧି କରିବାକୁ ଟିଭିକେ ପ୍ରତିଶ୍ରୁତି ଦେଇଥିଲା ।
ତୃତୀୟରେ ରାଜ୍ୟର ଭୂମିହୀନ ଗରିବ ଲୋକଙ୍କୁ ସରକାରୀ ଜମିର ପଟ୍ଟା ମାଗଣାରେ ଯୋଗାଇ ଦେବାକୁ ବିଜୟ ପ୍ରତିଶ୍ରୁତି ଦେଇଛନ୍ତି । ଯେଉଁମାନଙ୍କର ନିଜସ୍ୱ ଜମି ନାହିଁ, ସେମାନଙ୍କୁ ସରକାରୀ ଜମିରେ ଅଧିକାର ଦେବା ତାଙ୍କର ଏକ ପ୍ରମୁଖ ଲକ୍ଷ୍ୟ ଥିଲା ।
ଚତୁର୍ଥରେ ପ୍ରତ୍ୟେକ ପରିବାରକୁ ମାସିକ ୨୦୦ ୟୁନିଟ୍ ମାଗଣା ବିଦ୍ୟୁତ୍ ଏବଂ ବର୍ଷକୁ ୬ଟି ଗ୍ୟାସ୍ ସିଲିଣ୍ଡର ମାଗଣାରେ ଦେବାକୁ ବିଜୟ କହିଥିଲେ । ଏହା ବ୍ୟତୀତ ମହିଳାମାନଙ୍କୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ବିନା ସୁଧରେ ଋଣ ପ୍ରଦାନ କରିବାର ପ୍ରତିଶ୍ରୁତି ମଧ୍ୟ ମହିଳା ଭୋଟରଙ୍କୁ ଆକୃଷ୍ଟ କରିଛି ।
ସେହିପରି ପଞ୍ଚମରେ ଯୁବକମାନଙ୍କୁ ଆକୃଷ୍ଟ କରିବା ପାଇଁ ସ୍ନାତକ ପାସ୍ କରିଥିବା ଯୁବକଯୁବତୀଙ୍କୁ ୪୦୦୦ ଟଙ୍କା ବେକାରୀ ଭତ୍ତା ଦେବାକୁ ଦଳ ଘୋଷଣା କରିଥିଲା । ଆଗାମୀ ୫ ବର୍ଷରେ ୫ ଲକ୍ଷ ସରକାରୀ ଚାକିରି ଏବଂ ୫ ଲକ୍ଷ ଇଣ୍ଟର୍ନଶିପ୍ ଯୋଗାଇ ଦେବାକୁ ବିଜୟଙ୍କ ଦଳ ପ୍ରତିଶ୍ରୁତି ଦେଇଛି । ତେବେ ବିଜୟଙ୍କ ନିର୍ବାଚନୀ ଇସ୍ତାହାରରେ ଏହି ସବୁ ଜିନିଷ ରହିଥିଲା । ଆଉ ବର୍ତ୍ତମାନ ଏହି ସବୁ ଜିନିଷକୁ ହିଁ ମୁଖ୍ୟ ବିଜୟଙ୍କ ଜିତିବାର ମୁଖ୍ୟ କାରଣ ବୋଲି କୁହାଯାଉଛି ।
