ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଏଣିକି ଥର୍ମୋମିଟର, କଣ୍ଡୋମ, ଫେସ୍ ମାସ୍କ, ଚକ୍ଷୁ କିମ୍ବା ଅନ୍ୟ କୌଣସି ଡାକ୍ତରୀ ଉପକରଣ ବିକ୍ରୟ କରୁଥିବା ସମସ୍ତ ଦୋକାନ ମାଲିକଙ୍କୁ ମେଡିକାଲ୍ ଉପକରଣ ନିୟମରେ ସଂଶୋଧନ କାର୍ଯ୍ୟକାରୀ ହେବା ସହିତ ରାଜ୍ୟ ଲାଇସେନ୍ସ କର୍ତ୍ତୃପକ୍ଷଙ୍କ ନିକଟରେ ପଞ୍ଜୀକୃତ ହେବାକୁ ପଡିବ। ନୂତନ ନିୟମାବଳୀ ମେଡିକାଲ୍ ଉପକରଣଗୁଡ଼ିକର ସହଜ ଅନୁସନ୍ଧାନକୁ ଅନୁମତି ଦେବ।
ଏହି ନୂତନ ନିୟମାବଳୀ ଅନୁଯାୟୀ ଲାଇସେନ୍ସ ପାଇଁ ଆବେଦନ କରୁଥିବା ବ୍ୟକ୍ତିଙ୍କୁ ଦର୍ଶାଇବାକୁ ପଡିବ ଯେ, ସମସ୍ତ ଉପକରଣର ସଠିକ୍ ସଂରକ୍ଷଣ ପାଇଁ ତାଙ୍କ ନିକଟରେ ପର୍ଯ୍ୟାପ୍ତ ସ୍ଥାନ ଅଛି, ଆବଶ୍ୟକ ତାପମାତ୍ରା ଏବଂ ଆଲୋକୀକରଣ ବ୍ୟବସ୍ଥା ରହିଛି। ଏହା ସହିତ ସେ ସମସ୍ତ ଉପକରଣ ପଞ୍ଜିକୃତ କମ୍ପାନୀ ଠାରୁ କିଣିବାର ଆବଶ୍ୟକତା ରହିଛି ଓ ଦୁଇ ବର୍ଷ ପାଇଁ ଗ୍ରାହକଙ୍କ ନାମ, ଉପକରଣର ବ୍ୟଚ ନମ୍ବର ବା ଲଟ ନମ୍ବରର ରେକର୍ଡ ରଖିବା ଜରୁରୀ। ଏହାସହିତ ଷ୍ଟୋରଗୁଡିକରେ ପଞ୍ଜୀକୃତ ଫାର୍ମାସିଷ୍ଟ କିମ୍ବା ଡାକ୍ତରୀ ଉପକରଣ ବିକ୍ରୟରେ ଅନ୍ତତଃ ଏକ ବର୍ଷ ଅଭିଜ୍ଞତା ଥିବା ଦକ୍ଷ ବୈଷୟିକ କର୍ମଚାରୀ ରଖିବାର ଆବଶ୍ୟକତା ରହିଛି ବୋଲି ଏହି ନିୟମାବଳିରେ ଦର୍ଶାଯାଇଛି।
ଏହି ପଞ୍ଜୀକରଣ, ଯଦି ରାଜ୍ୟ ଲାଇସେନ୍ସ କର୍ତ୍ତୃପକ୍ଷଙ୍କ ଦ୍ଵାରା ସ୍ଥଗିତ କିମ୍ବା ବାତିଲ ନହୁଏ, ତେବେ ଚିରକାଳ ପାଇଁ ଏହା ବୈଧ ହେବ, ଏହି ଲାଇସେନ୍ସକୁ ପ୍ରତି ପାଞ୍ଚ ବର୍ଷରେ ଥରେ ୩୦୦୦ ଟଙ୍କା ଧାର୍ଯ୍ୟ ଦେୟ ଦେଇ ପୁନଃ ପଞ୍ଜିକୃତ କରିବାକୁ ହେବ।
ପ୍ରକାଶିତ ଏହି ବିଜ୍ଞପ୍ତିରେ ଏହା ମଧ୍ୟ ଦର୍ଶାଯାଇଛି ଯେ ଲାଇସେନ୍ସ ପ୍ରଦାନକାରୀ କର୍ତ୍ତୃପକ୍ଷ ଭାବେ ସାଧାରଣତଃ ରାଜ୍ୟ ଡ୍ରଗ୍ ନିୟନ୍ତ୍ରକ ରହିବେ। ମାତ୍ର ଯଦି ରାଜ୍ୟମାନେ ଚାହାଁନ୍ତି ତେବେ ଏକ ପୃଥକ ପ୍ରାଧିକରଣ ମଧ୍ୟ ପ୍ରତିଷ୍ଠା କରିପାରିବେ। ଏନେଇ ୧୦ ଦିନ ମଧ୍ୟରେ ଆବେଦନ କରିବାକୁ ପଡିବ। ଯଦି ଆବେଦନ ପ୍ରତ୍ୟାଖ୍ୟାନ ହୁଏ, ତେବେ କର୍ତ୍ତୃପକ୍ଷଙ୍କୁ ଏହାର କାରଣକୁ ଲିଖିତ ଆକାରରେ ଜଣାଇବାକୁ ପଡିବ। ଯଦି ପଞ୍ଜୀକରଣ ମଞ୍ଜୁର ହୁଏ ନାହିଁ, ଆବେଦନକାରୀ ଆବେଦନ ପ୍ରତ୍ୟାଖ୍ୟାନ ହେବାର ୪୫ ଦିନ ମଧ୍ୟରେ ଏନେଇ ରାଜ୍ୟ ସରକାରଙ୍କ ନିକଟକୁ ଯାଇପାରିବେ ବୋଲି ବିଜ୍ଞପ୍ତିରେ ଦର୍ଶାଯାଇଛି। ତେବେ ବର୍ତ୍ତମାନର କାର୍ଯ୍ୟକ୍ଷମ ମେଡିକାଲ ଷ୍ଟୋର୍, ଷ୍ଟକ୍ସିଷ୍ଟ ଏବଂ ହୋଲସେଲରଙ୍କ ପାଇଁ ଏହି ପଞ୍ଜୀକରଣର ଆବଶ୍ୟକତା ନାହିଁ|
