ଭୁବନେଶ୍ୱର,୬/୫(ସତ୍ୟପାଠ ବ୍ୟୁରୋ): କର୍ଣ୍ଣାଟକ ବିଧାନସଭା ନିର୍ବାଚନକୁ ନେଇ ଏବେ ରାଜନୀତି ସରଗରମ ରହିଥିବା ବେଳେ ବିଜେପି ବିରୋଧରେ କଂଗ୍ରେସ ଏକ ବଡ଼ ଅଭିଯୋଗ ଆଣିଛି । କଂଗ୍ରେସ ନେତା ରଣଦୀପ ସିଂହ ସୁରଜେୱାଲା ଶନିବାର ଏକ ସାମ୍ବାଦିକ ସମ୍ମିଳନୀ କରି କହିଛନ୍ତି ଯେ, ମଲ୍ଲିକାର୍ଜୁନ ଖଡ଼ଗେ ଏବଂ ତାଙ୍କ ପରିବାରକୁ ହତ୍ୟା କରିବା ପାଇଁ ବିଜେପି ଷଡଯନ୍ତ୍ର କରୁଛି ।
ରଣଦୀପ ସିଂହ ସୁରଜେୱାଲା କହିଛନ୍ତି, ‘ଭାରତୀୟ ଜନତା ପାର୍ଟି ନେତାମାନେ ବର୍ତ୍ତମାନ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେ ଏବଂ ତାଙ୍କ ପରିବାରକୁ ହତ୍ୟା କରିବା ପାଇଁ ଷଡ଼ଯନ୍ତ୍ର କରୁଛନ୍ତି । କର୍ଣ୍ଣାଟକର ଚିତ୍ତପୁର ବିଧାନସଭା ଆସନରୁ ବିଜେପି ପ୍ରାର୍ଥୀଙ୍କ କଲ୍ ରେକର୍ଡିଂ ସାମ୍ନାକୁ ଆସିଛି, ଏଥିରେ ଏହି ଷଡଯନ୍ତ୍ର ସାମ୍ନାକୁ ଆସିଛି । ଏବଂ, ସେ ହେଉଛନ୍ତି ଏପରି ଜଣେ ପ୍ରାର୍ଥୀ ଯିଏ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ରାଜ୍ୟ ମୁଖ୍ୟମନ୍ତ୍ରୀ ବାସଭାରାଜ ବମ୍ମାଇଙ୍କ ଅତି ପ୍ରିୟ ବୋଲି ସେ କହିଛନ୍ତି।
ଏହାସହିତ କଂଗ୍ରେସ ନିଜର ଟ୍ୱିଟର ହ୍ୟାଣ୍ଡେଲରେ ଏକ ରେକର୍ଡିଂ ମଧ୍ୟ ସେୟାର କରିଛି ଏବଂ ଦାବି କରିଛି ଯେ ଏହି ରେକର୍ଡିଂ ଚିତ୍ତପୁର ଆସନରୁ ବିଜେପି ପ୍ରାର୍ଥୀ ତଥା ମଣିକାନ୍ତ ରାଠୋଡ ଏବଂ ଜଣେ ବିଜେପି କର୍ମୀଙ୍କ ମଧ୍ୟରେ ବାର୍ତ୍ତାଳାପ ର ରେକର୍ଡିଂ। ଏହି ରେକର୍ଡିଂରେ ବିଜେପି ପ୍ରାର୍ଥୀ ମାଣିକାନ୍ତ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାଡ଼ଗେଙ୍କ ପରିବାରକୁ ଶେଷ କରିବାକୁ କହୁଛନ୍ତି ।
ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରିବାବେଳେ ରଣଦୀପ ସୁରଜେୱାଲା କହିଛନ୍ତି, ରାଜନୀତିରେ ବିଜେପିର ଏହା ସର୍ବନିମ୍ନ ସ୍ତର ଅଟେ । ମଲ୍ଲିକାର୍ଜୁନ ଖାଡ଼ଗେ ଏବଂ ତାଙ୍କ ପରିବାରକୁ ହତ୍ୟା କରିବା ପାଇଁ ଏଭଳି ଘୃଣ୍ୟ ଷଡ଼ଯନ୍ତ୍ର କରୁଛି । ଆଜି କର୍ଣ୍ଣାଟକର ଲୋକମାନେ ଯେପରି କଂଗ୍ରେସ ସପକ୍ଷରେ ଏକଜୁଟ ହେଉଛନ୍ତି, ବିଜେପି ଏହାକୁ ନେଇ ଚିନ୍ତାରେ ପଡିଛି । ବିଜେପି ଏବଂ ଏହାର ନେତାଙ୍କ ଏହି ନିରାଶା ଏବେ ଉଦବେଗଜନକ ସ୍ତରରେ ପହଞ୍ଚିଛି ବୋଲି ସୁରଜେୱାଲା କହିଛନ୍ତି।
