ଭୁବନେଶ୍ୱର ( ସତ୍ୟପାଠ ବ୍ୟୁରୋ ): କେନ୍ଦ୍ର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଆଜି ରାଜ୍ୟସଭାରେ କହିଛନ୍ତି ଯେ ବରିଷ୍ଠ ନାଗରିକଙ୍କ ସମେତ ସମସ୍ତ ବର୍ଗର ଯାତ୍ରୀଙ୍କ ପାଇଁ ରିହାତି ସୀମା ବୃଦ୍ଧି କରିବା ଆଦୌ ଆବଶ୍ୟକ ନୁହେଁ। ଆମ୍ ଆଦମୀ ପାର୍ଟି ସାଂସଦ ସଞ୍ଜୟ ସିଂଙ୍କ ପ୍ରଶ୍ନର ଏକ ଲିଖିତ ଉତ୍ତର ରାଜ୍ୟସଭାରେ ଦେଇ ରେଳ ମନ୍ତ୍ରୀ କହିଛନ୍ତି ଯେ ଭାରତୀୟ ରେଳବାଇ କମ୍ ଭଡା ସତ୍ୱେ ବରିଷ୍ଠ ନାଗରିକଙ୍କ ସମେତ ସମସ୍ତ ଯାତ୍ରୀଙ୍କ ପାଇଁ ୫୦%ରୁ ଅଧିକ ଖର୍ଚ୍ଚ ବହନ କରୁଛି।ଏହା ବ୍ୟତୀତ କୋଭିଡ -୧୯ କାରଣରୁ ୨୦୧୯-୨୦୨୦ ତୁଳନାରେ ଗତ ଦୁଇ ବର୍ଷ ମଧ୍ୟରେ ଯାତ୍ରୀଙ୍କ ଆୟ କମ୍ ଅଟେ। ସେ କହିଛନ୍ତି ଯେ ରେଳବାଇର ଆର୍ଥିକ ସ୍ଥିତି ଉପରେ ଏଗୁଡିକର ଦୀର୍ଘମିଆଦି ପ୍ରଭାବ ପଡିଛି। ମନ୍ତ୍ରୀ କହିଛନ୍ତି ରେଳବାଇରେ ରିହାତି ପ୍ରଦାନର ମୂଲ୍ୟ ଭାର ଅଧିକ। ତେଣୁ ବରିଷ୍ଠ ନାଗରିକଙ୍କ ସମେତ ସମସ୍ତ ବର୍ଗର ଯାତ୍ରୀଙ୍କ ପାଇଁ ରିହାତି ସୀମା ବୃଦ୍ଧି କରିବା ଆଦୌ ପସନ୍ଦଯୋଗ୍ୟ ନୁହେଁ।
ଏହା ଛଡା ମନ୍ତ୍ରୀ ସୂଚନା ଦେଇଛନ୍ତି ଯେ ଭାରତୀୟ ରେଳବାଇ ଚାରିଟି ବର୍ଗର ଭିନ୍ନକ୍ଷମ, ୧୧ ପ୍ରକାର ରୋଗୀ ଏବଂ ଛାତ୍ରଙ୍କୁ ଭଡା ଉପରେ ରିହାତି ପ୍ରଦାନ ଜାରି ରଖିଛି।
