ଭୁବନେଶ୍ୱର(ସତ୍ୟପାଠ ବ୍ୟୁରୋ): ପଶ୍ଚିମବଙ୍ଗ ସୀମା ଠାରୁ ୫୦ କିଲୋମିଟର ମଧ୍ୟରେ ବିଏସଏଫକୁ ପ୍ରବେଶ କରିବାକୁ ଦିଅ ନାହିଁ ବୋଲି ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି । କେବଳ ଏତିକି ନୁହେଁ ବରଂ ବିଏସ୍ଏଫ ଗାଁରେ ପ୍ରବେଶ କରି ଲୋକଙ୍କୁ ହତ୍ୟା କରି ବାଙ୍ଗଲାଦେଶର ଅନ୍ୟ ପାର୍ଶ୍ୱରେ ଫିଙ୍ଗି ଦେଉଛନ୍ତି। ବିଏସ୍ଏଫକୁ ଏସବୁ କରିବାକୁ ଅନୁମତି ଦିଆଯିବା ଉଚିତ୍ ନୁହେଁ। ପଶୁ ଚୋରା ଚାଲାଣକାରୀଙ୍କ ନାଁରେ ଲୋକଙ୍କୁ ଗୁଳି ମରାଯାଉଛି ଏବଂ ସେମାନଙ୍କୁ ରାଜ୍ୟର ଅନ୍ୟ ଅଞ୍ଚଳରେ ଫିଙ୍ଗି ଦିଆଯାଉଛି। ମୃତଦେହ କିପରି ଅଦୃଶ୍ୟ ହୁଏ, ତାହା ମୁଁ ରେଳ ମନ୍ତ୍ରାଳୟରେ ରହିବା ସମୟରେ ଏପରି ଅନେକ ଘଟଣା ଦେଖିଛି ବୋଲି ମମତା ବାନାର୍ଜୀ କହିଛନ୍ତି ।
ତେବେ ଏଭଳି ଆଦେଶ ଦେଇ ସୀମାରେ ବିଏସଏଫର ବ୍ୟାସାର୍ଦ୍ଧକୁ ୫୦ କିଲୋମିଟରକୁ ବୃଦ୍ଧି କରିବାକୁ କେନ୍ଦ୍ର ଗୃହ ମନ୍ତ୍ରାଳୟର ଦେଇଥିବା ନିର୍ଦ୍ଦେଶକୁ ମମତା ବାନାର୍ଜୀ ଦୃଢ଼ ବିରୋଧ କରିଛନ୍ତି। ଏହାପୂର୍ବରୁ ଅନେକ ଥର ମମତା ବାନାର୍ଜୀ ବିଏସଏଫ ବିରୋଧରେ ବିବୃତି ଦେଇ ସାରିଛନ୍ତି। ଅତୀତରେ, ମମତା ପ୍ରଶାସନିକ ଅଧିକାରୀଙ୍କ ଏକ ବୈଠକରେ କହିଥିଲେ ଯେ ବିଏସଏଫର କାର୍ୟ୍ୟକଳାପ ଉପରେ ନଜର ରଖାଯିବା ଉଚିତ। ପୁଲିସକୁ ମଧ୍ୟ ନିର୍ଦ୍ଦେଶ ଦିଆଯାଇଥିଲା ଯେ ବିଏସଏଫକୁ ନିଜ ଅଧୀନରେ ଥିବା ଅଞ୍ଚଳ ବାହାରକୁ ଯାଇ କାର୍ୟ୍ୟାନୁଷ୍ଠାନ ଗ୍ରହଣ କରିବାକୁ ଅନୁମତି ଦିଅ ନାହିଁ।
