ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ବିହାରରେ ଭାରତୀୟ ଜନତା ପାର୍ଟି ସହିତ ସମ୍ପର୍କ ଭାଙ୍ଗି ଆରଜେଡି ସହ ମିଶି ନୀତୀଶ କୁମାର ନୂଆ ସରକାର ଗଠନ କରିଛନ୍ତି। ତେବେ ଏହା ପରେ ତାଙ୍କ ଦଳ ଜେଡିୟୁ ମଣିପୁରରେ ଏକ ବଡ଼ ଧରଣର ଝଟ୍କାର ସମ୍ମୁଖିନ ହୋଇଛି। ମଣିପୁରର ପାଞ୍ଚ ଜଣ ଜେଡିୟୁ ବିଧାୟକ ଶୁକ୍ରବାର ଦିନ ବିଜେପିରେ ଯୋଗ ଦେଇଛନ୍ତି। ଏହି ସମୟରେ, ୨୦୨୪ ଲୋକସଭା ନିର୍ବାଚନରେ ନୀତୀଶ କୁମାର ବିରୋଧୀ ଦଳର ପ୍ରଧାନମନ୍ତ୍ରୀ ପ୍ରାର୍ଥୀ ହେବାର କଳ୍ପନାକୁ କଟାକ୍ଷ କରିଛି ବିଜେପି। ବିଜେପି ନେତା ଅମିତ ମାଲଭିୟ ନୀତିଶଙ୍କୁ ଜଣେ ‘ଅକର୍ମଣ୍ୟ ମୁଖ୍ୟମନ୍ତ୍ରୀ’ ବୋଲି କହିଛନ୍ତି। ସେ ଏହା ମଧ୍ୟ କହିଛନ୍ତି ଯେ, ‘ନୀତୀଶ କୁମାର ବିହାରରେ ତଥା ଅନ୍ୟ ରାଜ୍ୟରେ ମଧ୍ୟ ତାଙ୍କ ଦଳ ଦୁର୍ବଳ ହେଉଥିବା ଦେଖୁଛନ୍ତି କିନ୍ତୁ ଏହାକୁ ଦେଖି ସୁଧାରିବା ପରିବର୍ତ୍ତେ ସେ ପ୍ରଧାନମନ୍ତ୍ରୀ ହେବାର ସ୍ୱପ୍ନ ଦେଖୁଛନ୍ତି।’
ତେବେ ନୀତୀଶ କୁମାର ବିହାରରେ ଏନଡିଏ ସହ ତାଙ୍କର ସମ୍ପର୍କ ଭାଙ୍ଗି ନୂଆ ମେଣ୍ଟ ସରକାର ଗଠନ କରିଥିଲେ। ସେବେଠାରୁ ତାଙ୍କୁ ତାଙ୍କ ଦଳର ନେତାମାନେ ୨୦୨୪ ଲୋକସଭା ନିର୍ବାଚନରେ ବିରୋଧୀ ଦଳର ପ୍ରଧାନମନ୍ତ୍ରୀ ପ୍ରାର୍ଥୀ ଭାବରେ ନୀତୀସଙ୍କୁ ପ୍ରୋଜେକ୍ଟ କରୁଛନ୍ତି, ଯଦିଓ ନୀତିଶ ଏପର୍ଯ୍ୟନ୍ତ ଏନେଇ କୌଣସି ସମ୍ଭାବନାକୁ ଏଡ଼ାଇ ଦେଇ ନାହାଁନ୍ତି।
ସୂଚନାଯୋଗ୍ୟ ଯେ, ବିଜେପି-ଜେଡିୟୁ ମଧ୍ୟରେ ଚାଲିଥିବା ଶିତଳ ଯୁଦ୍ଧ ମଧ୍ୟରେ ମଣିପୁରରେ ବିଧାୟକ ଥିବା ଜୟକିଶାନ, ଏନ.ସାନେଟ, ମୋହମ୍ମଦ ଅଚଓ୍ବ ଉଦ୍ଦିନ, ପୂର୍ବତନ ଡିଜିପି ଏଲଏମ ଖୁଟେ ଏବଂ ଥାନଜାମ ଅରୁକୁମାର ଜେଡିୟୁ ଛାଡ଼ି ବିଜେପିରେ ଯୋଗ ଦେଇଛନ୍ତି। ବିଧାନସଭା ନିର୍ବାଚନରେ ବିଜେପି ଟିକେଟ୍ରେ ପ୍ରତିଦ୍ୱନ୍ଦ୍ୱିତା କରିବାକୁ ଖାଉଟ୍ ଏବଂ ଅରୁକୁମାର ଦାବି କରିଥିଲେ ମଧ୍ୟ ସେମାନେ ଟିକେଟ୍ ପାଇ ନଥିଲେ। ଏହା ପରେ ସେ ଜେଡିୟୁରେ ଯୋଗ ଦେଇଥିଲେ।
