ଭୁବନେଶ୍ୱର(ସତ୍ୟପାଠ ବ୍ୟୁରୋ): ୪୮ ଘଣ୍ଟାରେ ତୃତୀୟ ଥର ପାଇଁ ପାକିସ୍ତାନରେ ପହଞ୍ଚିଲେ ଇରାନ ବୈଦେଶିକ ମନ୍ତ୍ରୀ ଆବାସ ଆରାଘଚି। ଏହି ଯାତ୍ରାକୁ ଆମେରିକା ସହିତ ଚାଲିଥିବା ଉତ୍ତେଜନାକୁ କମ୍ କରିବା ପାଇଁ ଏକ ବ୍ୟାପକ କୂଟନୈତିକ ପ୍ରୟାସର ଅଂଶ ଭାବରେ ଦେଖାଯାଉଛି। ଆରାଘଚିଙ୍କ ପାକିସ୍ତାନକୁ ବାରମ୍ବାର ଗସ୍ତ ସୂଚାଇ ଦେଉଛି ଯେ, ପାକିସ୍ତାନ ବର୍ତ୍ତମାନ ପରିସ୍ଥିତିରେ ମଧ୍ୟସ୍ଥି କିମ୍ବା ଶାନ୍ତି ସ୍ଥାପନକାରୀ ଭୂମିକା ଗ୍ରହଣ କରୁଛି। ସେପଟେ ଇରାନ ଏବଂ ଆମେରିକା ମଧ୍ୟରେ ପରୋକ୍ଷ ଆଲୋଚନାକୁ ଆଗକୁ ବଢାଇବାରେ ଇସଲାମାବାଦର ଭୂମିକା ବିଶେଷ ଗୁରୁତ୍ୱପୂର୍ଣ୍ଣ ବୋଲି ଚର୍ଚ୍ଚା ହେଉଛି। ଏହା ପୂର୍ବରୁ, ଆବାସ ଆରାଘଚି ସେଣ୍ଟ ପିଟର୍ସବର୍ଗରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିଥିଲେ। ଏହି ବୈଠକ ପ୍ରାୟ ଦେଢ଼ ଘଣ୍ଟା ଧରି ଚାଲିଥିଲା ଏବଂ ଦ୍ୱିପାକ୍ଷିକ ସମ୍ପର୍କ ଏବଂ ଆଞ୍ଚଳିକ ପରିସ୍ଥିତି ଉପରେ ଆଲୋଚନା କରାଯାଇଥିଲା।