ଭୁବନେଶ୍ୱର(ସତ୍ୟପାଠ ବ୍ୟୁରୋ): ଚଳିତବର୍ଷ ପାଞ୍ଚଟି ରାଜ୍ୟରେ ବିଧାନସଭା ନିର୍ବାଚନ ହୋଇଥିଲା ଯେଉଁଥିରେ ଭାରତୀୟ ଜନତା ପାର୍ଟି ୪ଟି ରାଜ୍ୟ ଓ ଆମ ଆଦମି ପାର୍ଟି ଗୋଟିଏ ରାଜ୍ୟରେ ବିଜୟ ହାସଲ କରିଛନ୍ତି । ହେଲେ ବିଜେପିର ଏହି ବୃହତ ବିଜୟକୁ ସହଜରେ ହଜମ କରିପାରୁ ନାହିଁ ଶିବସେନା । କାହିଁକିନା ଶିବସେନା ମୁଖପତ୍ର ‘ସାମନା’ରେ ବିଜେପି, ବିଏସପି ମୁଖ୍ୟ ମାୟାବତୀଙ୍କ ଉପରେ ଚାପ ପ୍ରୟୋଗ କରିବା ପାଇଁ କେନ୍ଦ୍ରୀୟ ଏଜେନ୍ସି ବ୍ୟବହାର କରୁଥିବା ଅଭିଯୋଗ କରିଛି। ତେବେ ‘ସାମନା’ରେ ଲେଖାଯାଇଛି ଯେ ୟୁପି ନିର୍ବାଚନରେ ବିଏସପିର ଉପସ୍ଥିତି କେବଳ ଆନୁଷ୍ଠାନିକ ଭାବେ ଥିଲା। ଦଳର ମୁଖ୍ୟ ମାୟାବତୀ ନିର୍ବାଚନ ଠାରୁ ଦୂରରେ ରହିବାକୁ ବାଧ୍ୟ ହୋଇଥିଲେ। ମାୟାବତୀଙ୍କ ବିଏସପି ୟୁପି ନିର୍ବାଚନରେ ନିରବ ରହିଥିବାରୁ ତାଙ୍କ ଭୋଟ୍ ଭାରତୀୟ ଜନତା ପାର୍ଟି ଆଡକୁ ଯାଇଥିଲା।
କେନ୍ଦ୍ରୀୟ ଏଜେନ୍ସିଗୁଡିକର ଚାପ ତାଙ୍କୁ ନିର୍ବାଚନ ଠାରୁ ଦୂରେଇ ରହିବାକୁ ବାଧ୍ୟ କରିଥିଲା। ଏକଦା ଉତ୍ତରପ୍ରଦେଶରେ କ୍ଷମତାକୁ ଆସିଥିବା ଦଳ କେବଳ ଗୋଟିଏ ଆସନ ଜିତିଛି । ରାଜ୍ୟରେ ୪୦୩ଟି ବିଧାନସଭା ଆସନରୁ ମାତ୍ର ଗୋଟିଏ ଆସନ ଜିତିବାକୁ କେହି ସ୍ୱୀକାର କରିପାରିବେ କି? ” ଶିବସେନା ଦାବି କରିଛି ଯେ ରାଜ୍ୟ ନିର୍ବାଚନରେ ବିଜେପିର ବିଜୟରେ କେନ୍ଦ୍ରୀୟ ଅନୁସନ୍ଧାନକାରୀ ସଂସ୍ଥାଗୁଡ଼ିକର ଚାପ ଏକ ପ୍ରମୁଖ କାରଣ ହୋଇଛି। ‘ସାମନା’ରେ ଏହା କୁହାଯାଇଛି ଯେ ମାୟାବତୀଙ୍କ ପ୍ରତି କେନ୍ଦ୍ରୀୟ ଏଜେନ୍ସିଗୁଡ଼ିକର ଚାପ ପ୍ରୟୋଗ କଲେ । ଯେଉଁଥିପାଇଁ ମାୟାବତୀ ନିରବ ରହିଲେ ଓ ମାୟାବତୀଙ୍କ ଭୋଟ ବିଜେପି ଆଡକୁ ଗଲା । ଏ ଖବର ସାମ୍ନାକୁ ଆସିବା ପରେ ସାରା ଦେଶର ରାଜନୀତି ବେଶ ଚଳଚଞ୍ଚଳ ହୋଇ ଉଠିଛି ।
