ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଗତକାଲି ଉପରାଷ୍ଟ୍ରପତି ନିର୍ବାଚନରେ ଟିଏମ୍ସି ଭୋଟ୍ଦାନରୁ ବିରତ ରହିଥିବା ବେଳେ ଏହାର ସାଂସଦ ଶିଶିର ଅଧିକାରୀ ଦଳର ନିଷ୍ପତ୍ତି ବିରୋଧରେ ଯାଇ ଭୋଟ୍ ଦେଇଥିଲେ । ଆଉ ଏନେଇ ତୃଣମୂଳ କଂଗ୍ରେସ ସାଂସଦ ଶିଶିର ଅଧିକାରୀଙ୍କଠାରୁ ଏନେଇ ଜବାବ ମାଗିଛି। ତୃଣମୂଳ କଂଗ୍ରେସ ସାଂସଦ ତଥା ଲୋକସଭାରେ ଗୃହର ନେତା ସୁଦୀପ ବନ୍ଦୋପାଧ୍ୟାୟ ସାଂସଦ ଶିଶିର ଅଧିକାରୀଙ୍କୁ ଚିଠି ଲେଖିଛନ୍ତି ଯେ ଯେତେବେଳେ ଦଳ ଏହି ପ୍ରକ୍ରିୟାରୁ ଦୂରେଇ ରହିବାକୁ ନିଷ୍ପତ୍ତି ନେଇଥିଲା, ସେତେବେଳେ କାହିଁକି ଉପରାଷ୍ଟ୍ରପତି ନିର୍ବାଚନରେ ଅଂଶଗ୍ରହଣ କରିଥିଲେ ବୋଲି ଜବାବ ଦେବାକୁ କହିଛନ୍ତି |ମମତା ବାନାର୍ଜୀଙ୍କ ନେତୃତ୍ୱାଧୀନ ଦଳ ଉପ-ରାଷ୍ଟ୍ରପତି ନିର୍ବାଚନରେ ଅଂଶଗ୍ରହଣ ନକରିବାକୁ ନିଷ୍ପତ୍ତି ନେଇଥିଲା । ଆଉ ଦଳ ପକ୍ଷରୁ ଅଭିଯୋଗ କରାଯାଇଥିଲା ଯେ ମିଳିତ ବିରୋଧୀଦଳ ପ୍ରାର୍ଥୀ ମାର୍ଗାରେଟ ଆଲଭାଙ୍କ ନାମ ଘୋଷଣା ପୂର୍ବରୁ ଦଳ ସହ କୌଣସି ପରାମର୍ଶ କରାଯାଇନଥିଲା |
ତେବେ ସୂଚନା ଥାଉ କି ଯେ ଉପରାଷ୍ଟ୍ରପତି ନିର୍ବାଚନରେ କୌଣସି ଦଳ ସାଂସଦଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇପାରିବେ ନାହିଁ | ତୃଣମୂଳ କଂଗ୍ରେସ ସାଂସଦ ଶିଶିର ଅଧିକାରୀ ହେଉଛନ୍ତି ପଶ୍ଚିମବଙ୍ଗ ବିଜେପି ନେତା ଶୁଭେନ୍ଦୁ ଅଧିକାରୀଙ୍କ ପିତା। ପଶ୍ଚିମବଙ୍ଗ ବିଧାନସଭା ନିର୍ବାଚନ ପୂର୍ବରୁ ଶୁଭେନ୍ଦୁ ଅଧିକାରୀ ଟିଏମସି ଛାଡି ବିଜେପିରେ ଯୋଗ ଦେଇଥିଲେ। ନିର୍ବାଚନରେ ସେ ମମତା ବାନାର୍ଜୀଙ୍କୁ ପରାସ୍ତ କରିଥିଲେ।
