ଭୁବନେଶ୍ୱର,୫/୧(ସତ୍ୟପାଠ ବ୍ୟୁରୋ): ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଗୁରୁବାର ଦିନ ବନ୍ଦେ ଭାରତ ଏକ୍ସପ୍ରେସକୁ ନେଇ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି। ମମତା କହିଛନ୍ତି ଯେ, ବନ୍ଦେ ଭାରତ ଟ୍ରେନରେ କୌଣସି ସ୍ୱତନ୍ତ୍ରତା ନାହିଁ। ଏହା ଏକ ପୁରୁଣା ଟ୍ରେନ ଓ ଏଥିରେ କେବଳ ଏକ ନୂଆ ଇଞ୍ଜିନ ଲଗାଇ ଦିଆଯାଇଛି। ଖାଲି ଏକ ନୂଆ ଇଞ୍ଜିନ ଲଗାଇ ପୁରା ଟ୍ରେନକୁ ଏହାକୁ ନୂଆ ବୋଲି କୁହାଯାଉଛି ବୋଲି ମମତା କହିଛନ୍ତି।
ବାସ୍ତବରେ ପଶ୍ଚିମବଙ୍ଗରେ ବନ୍ଦେ ଭାରତ ଏକ୍ସପ୍ରେସ ଉପରେ ଲଗାତାର ଦୁଇ ଥର ପଥର ମାଡ ଘଟଣାରେ ମମତା ପ୍ରତିକ୍ରିୟା ଦେଇ କହିଛନ୍ତି ଯେ, ଭୁଲ ଖବର ବିସ୍ତାର କରୁଥିବା ଲୋକଙ୍କ ବିରୋଧରେ ତାଙ୍କ ସରକାର କାର୍ଯ୍ୟାନୁଷ୍ଠାନ ଗ୍ରହଣ କରିବେ। ମମତା କହିଛନ୍ତି ଯେ, ବନ୍ଦେ ଭାରତ ଟ୍ରେନ ଉପରେ ପଥର ଫିଙ୍ଗିବା ଘଟଣା ପଶ୍ଚିମବଙ୍ଗରେ ନୁହେଁ, ବିହାରରେ ଘଟିଛି। ସେ କହିଛନ୍ତି ଯେ ଏହି ଘଟଣା ପଶ୍ଚିମବଙ୍ଗରେ ଘଟିଛି ବୋଲି କହି ‘ମିଥ୍ୟା ପ୍ରଚାର କରୁଥିବା’ ଗଣମାଧ୍ୟମ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏଭଳି ଭୁଲ ତଥ୍ୟ ସହିତ ରାଜ୍ୟର ଭାବମୂର୍ତ୍ତିକୁ ଖରାପ କରିବା ପାଇଁ ଉଦ୍ୟମ କରାଯାଉଛି ବୋଲି ସେ ଅଭିଯୋଗ କରିଛନ୍ତି।
ତେବେ ଗତ ସପ୍ତାହରେ ପଶ୍ଚିମବଙ୍ଗରେ ଲଗାତାର ଦୁଇଥର ବନ୍ଦେ ଭାରତ ଟ୍ରେନ ଉପରକୁ ପଥର ଫିଙ୍ଗିବା ଖବର ଆସିଥିଲା। ଆରପିଏଫ ଅନୁଯାୟୀ, ଦ୍ୱିତୀୟ ଘଟଣାରେ ବନ୍ଦେ ଭାରତ ଏକ୍ସପ୍ରେସର କୋଚ ସି୩ ଏବଂ ସି୬ ର କାଚ ପଥରମାଡ କାରଣରୁ ଭାଙ୍ଗିଯାଇଥିଲା। ଟ୍ରେନଟି ଦାର୍ଜିଲିଂ ଜିଲ୍ଲାର ଫାନସିଡେଭା ଦେଇ ନୂଆ ଜାଲପାଇଗୁରୀ ଆଡକୁ ଯାଉଥିବାବେଳେ ପଥରମାଡ ହୋଇଥିବାର କୁହାଯାଇଥିଲା । ଏଥି ସହିତ, ପଶ୍ଚିମବଙ୍ଗରେ ବନ୍ଦେ ଭାରତ ଟ୍ରେନ ଗଡ଼ିବାର ଦ୍ୱିତୀୟ ଦିନ ମଧ୍ୟ ପଥରମାଡ ହୋଇଥିବାର ଖବର ସାମ୍ନାକୁ ଆସିଥିଲା। ସୂଚନାନୁସାରେ, ମାଲଦାର କୁମାରଗଞ୍ଜ ଷ୍ଟେସନ ନିକଟରେ କିଛି ବ୍ୟକ୍ତି ଟ୍ରେନ ଉପରକୁ ପଥର ଫିଙ୍ଗିଥିଲେ। ପଥରମାଡ ଯୋଗୁଁ ବନ୍ଦେ ଭାରତ ଏକ୍ସପ୍ରେସର କୋଚ୍ ନମ୍ବର -୧୩ର ୱିଣ୍ଡୋ କାଚରେ ଫାଟ ସୃଷ୍ଟି ହୋଇଥିଲା।
