(ସତ୍ୟପାଠ ବ୍ୟୁରୋ) ଭୁବନେଶ୍ୱର : ମଙ୍ଗଳବାର ଦିନ ସୁପ୍ରିମକୋର୍ଟ କେନ୍ଦ୍ର ତଥା ଦିଲ୍ଲୀ ସରକାରଙ୍କୁ ନୋଟିସ୍ ଜାରି କରି COVID-19 ମହାମାରୀ ପରେ ଭିକାରୀ ଏବଂ ଭୂମିହୀନ ଲୋକଙ୍କୁ ପୁନଃ ଥଇଥାନ ଏବଂ ଟୀକାକରଣ ଉପରେ ଜବାବ ମାଗିଛନ୍ତି । ସୁପ୍ରିମକୋର୍ଟ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ଏହା ଭିକାରୀମାନଙ୍କୁ ରାସ୍ତାରୁ ହଟାଇବା ପ୍ରସଙ୍ଗରେ ଏକ ଅଭିଜିତ ଦୃଷ୍ଟିକୋଣ ଗ୍ରହଣ କରିବ ନାହିଁ କାରଣ ଏହା ଏକ ସାମାଜିକ ତଥା ଅର୍ଥନୈତିକ ସମସ୍ୟା ଅଟେ।
ଜଷ୍ଟିସ୍ ଡି ୱାଇ ଚନ୍ଦ୍ରଚୁଡ ଏବଂ ଜଷ୍ଟିସ୍ ଏମ୍ ଶାହାଙ୍କ ବେଞ୍ଚ କହିଛନ୍ତି ଯେ ଲୋକଙ୍କୁ ଭିକ ମାଗିବାକୁ କୋର୍ଟ ବାରଣ କରିପାରିବ ନାହିଁ। ସୁପ୍ରିମକୋର୍ଟ କହିଛନ୍ତି ଯେ ଭିକାରୀମାନେ ସର୍ବସାଧାରଣ ସ୍ଥାନ ଏବଂ ଟ୍ରାଫିକ୍ ପୋଷ୍ଟରୁ ଦୂରେଇ ଯିବା ଉପରେ ସେ ରାୟ ଦେବେ ନାହିଁ । କାରଣ ଶିକ୍ଷା ତଥା ଚାକିରୀ ଅଭାବରୁ ଲୋକମାନେ ଜୀବିକା ନିର୍ବାହର ଆବଶ୍ୟକତା ପୂରଣ କରିବା ପାଇଁ ରାସ୍ତାରେ ଭିକ ମାଗିବାକୁ ବାଧ୍ୟ ହେଉଛନ୍ତି। ଏହା କୌଣସି ପ୍ରକାରେ ସମାଧାନ ହୋଇପାରିବ ନାହିଁ।
ସମଗ୍ର ଭାରତରେ COVID-19 ମହାମାରୀ ମଧ୍ୟରେ ଟୀକାକରଣ ଏବଂ ଭୂମିହୀନ ତଥା ଭିକାରୀଙ୍କ ପୁନଃ ଥଇଥାନ ପାଇଁ ଏକ ଆବେଦନ ଉପରେ ଶୁଣାଣି କରି ସୁପ୍ରିମକୋର୍ଟ କେନ୍ଦ୍ର ଏବଂ ଦିଲ୍ଲୀ ସରକାରଙ୍କୁ ନୋଟିସ୍ ଜାରି କରିଛନ୍ତି।
ବେଞ୍ଚ କହିଛନ୍ତି, ” ଆପଣଙ୍କ ପ୍ରଥମ କର୍ତ୍ତବ୍ୟ ହେଉଛି ଲୋକଙ୍କୁ ରାସ୍ତା ଉପରକୁ ନଯିବ ବ୍ୟବସ୍ଥା କରନ୍ତୁ। ଲୋକମାନେ କାହିଁକି ରାସ୍ତାରେ ଭିକ ମାଗୁଛନ୍ତି ? ଏହାର କାରଣ ହେଉଛି ଦାରିଦ୍ର୍ୟ। ସୁପ୍ରିମକୋର୍ଟ ଭାବେ ଆମେ ଏହା ଉପରେ ଏକ ସଂଭ୍ରାନ୍ତବାଦୀ ଚିନ୍ତାଧାରା ଗ୍ରହଣ କରିବାକୁ ଚାହୁଁନାହୁଁ। ସେମାନଙ୍କର କୌଣସି ବିକଳ୍ପ ନାହିଁ, ତେଣୁ ସେମାନେ ଭିକ ମାଗନ୍ତି। ଜଷ୍ଟିସ ଚନ୍ଦ୍ରଚୂଡ ବରିଷ୍ଠ ଓକିଲ ଚିନ୍ମୟ ଶର୍ମାଙ୍କୁ କହିଛନ୍ତି ଯେ କେହି ଭିକ ମାଗିବାକୁ ଚାହାଁନ୍ତି ନାହିଁ।
କୋର୍ଟ କେନ୍ଦ୍ର ଏବଂ ଦିଲ୍ଲୀ ସରକାରଙ୍କୁ ନୋଟିସ ଜାରି କରିଛନ୍ତି ଏବଂ ଦୁଇ ସପ୍ତାହ ମଧ୍ୟରେ ଏହାର ଜବାବ ମାଗିଛନ୍ତି। ଭିକାରୀ ଏବଂ ଭୂମିହୀନଙ୍କ ଥଇଥାନ, ସେମାନଙ୍କୁ ଟୀକାକରଣ ଏବଂ ମହାମାରୀ ମଧ୍ୟରେ ସେମାନଙ୍କୁ ଆଶ୍ରୟ ଏବଂ ଖାଦ୍ୟ ଯୋଗାଇବାକୁ ନିର୍ଦ୍ଦେଶ ଦେଇଛନ୍ତି । ଏହି ମାମଲାରେ ସହାୟତା କରିବାକୁ କୋର୍ଟ ସଲିସିଟର ଜେନେରାଲ ତୁଷାର ମେହେଟ୍ଟାଙ୍କୁ ଅନୁରୋଧ କରିଛନ୍ତି।
ଓକିଲ ଷ୍ଟାଣ୍ଡ୍, ରେଳ ଷ୍ଟେସନ୍, ବଜାର ଏବଂ ସର୍ବସାଧାରଣ ସ୍ଥାନରେ ଭିକାରୀ ତଥା ଭୂମିହୀନ ଲୋକଙ୍କୁ COVID-19 ମହାମାରୀର ବିସ୍ତାରରୁ ରକ୍ଷା ତଥା ପୁନଃ ଥଇଥାନ କରିବା ପାଇଁ ଆବେଦନ କରୁଥିବା କୁଶ କାଲ୍ରାଙ୍କ ଦ୍ଵାରା ଦାଖଲ ହୋଇଥିବା ଏକ ପିଆଇଏଲ୍ କୋର୍ଟରେ ଶୁଣାଣି ହୋଇଥିଲା। ସୁପ୍ରିମକୋର୍ଟ କହିଛନ୍ତି ଯେ ଏହା ସରକାରଙ୍କ ପକ୍ଷରୁ ସାମାଜିକ କଲ୍ୟାଣ ନୀତିର ଏକ ବ୍ୟାପକ ପ୍ରସଙ୍ଗ, ଆମେ କହି ପାରିବୁ ନାହିଁ ଯେ ସେମାନଙ୍କୁ ଆମ ଦୃଷ୍ଟିରୁ ଦୂରେଇ ରଖନ୍ତୁ।
ଏହି ମାନବିକ ସମସ୍ୟାର ମୁକାବିଲା ପାଇଁ ନିଆଯାଇଥିବା ପଦକ୍ଷେପ ସମ୍ପର୍କରେ ସୁପ୍ରିମକୋର୍ଟ କେନ୍ଦ୍ର ଏବଂ ଦିଲ୍ଲୀ ସରକାରଙ୍କୁ ଜଣାଇବାକୁ କହିଛନ୍ତି ଏବଂ ଦୁଇ ସପ୍ତାହ ପରେ ଏହି ମାମଲାର ଶୁଣାଣି ତାରିଖ ସ୍ଥିର କରିଛନ୍ତି। ଶୁଣାଣି ସମୟରେ ସୁପ୍ରିମକୋର୍ଟ କହିଛନ୍ତି ଯେ ଭିକାରୀ ଏବଂ ଭୂମିହୀନ ଲୋକମାନେ ମଧ୍ୟ ଅନ୍ୟ ଲୋକଙ୍କ ପରି କୋଭିଡ -19 ସମ୍ବନ୍ଧୀୟ ଚିକିତ୍ସା ସୁବିଧା ପାଇବାକୁ ହକଦାର।
