(ସତ୍ୟପାଠ ବ୍ୟୁରୋ) ଭୁବନେଶ୍ବର : ସୁପ୍ରିମକୋର୍ଟ କଲେଜିୟମର ସୁପାରିଶକୁ କେନ୍ଦ୍ର ସରକାର ଅନୁମୋଦନ କରିଛନ୍ତି। ପଦୋନ୍ନତି ପାଇ ସୁପ୍ରିମକୋର୍ଟର ବିଚାରପତି ହେବାକୁ ଯାଉଥିବା ୯ ଜଣ ନାଁ ଉପରେ ମୋହର ମାରିଛନ୍ତି କେନ୍ଦ୍ର ସରକାର। ଏହି ୯ ଜଣଙ୍କୁ ବିଚାରପତି ଭାବେ ପଦୋନ୍ନତି ଦେବାକୁ କିଛି ଦିନ ତଳେ ପ୍ରଧାନ ବିଚାରପତି ଜଷ୍ଟିସ ଏନଭି ରମନ୍ନାଙ୍କ ନେତୃତ୍ୱରେ ଗଠିତ କଲେଜିୟମ ସୁପାରିସ କରିଥିଲେ। ବର୍ତ୍ତମାନ ଏହି ସୁପାରିଶଗୁଡିକ ରାଷ୍ଟ୍ରପତିଙ୍କ ନିକଟକୁ ପଠାଯାଇଛି। ଏହାର ଆନୁଷ୍ଠାନିକ ଘୋଷଣା ଶୁକ୍ରବାର ସୁଦ୍ଧା କରାଯିବାର ସମ୍ଭାବନା ରହିଛି। ସୁପ୍ରିମକୋର୍ଟ ସୁପାରିସ କରିଥିବା ୯ ଜଣ ବିଚାରପତିଙ୍କ ମଧ୍ୟରେ ୩ ଜଣ ମହିଳା ଅଛନ୍ତି। ସେହିପରି ସୁପ୍ରିମକୋର୍ଟ ବାର୍ର ଜଣେ ଆଇନଜୀବୀଙ୍କୁ ବି ପଦୋନ୍ନତି ପାଇଁ ସୁପାରିସ କରାଯାଇଥିଲା। ସୁପାରିସ ହୋଇଥିବା ୩ ମହିଳା ଜଜ୍ଙ୍କ ମଧ୍ୟରେ କର୍ଣ୍ଣାଟକା ହାଇକୋର୍ଟର ବିଚାରପତି ବିଭି ନାଗରତ୍ନାଙ୍କ ନାଁ ରହିଛି। ତେବେ ଜଷ୍ଟିସ୍ ବିଭି ନାଗରତ୍ନା ସମ୍ଭବତଃ ଭାରତୀୟ ନ୍ୟାୟପାଳିକା ଇତିହାସରେ ପ୍ରଥମ ମହିଳା CJI ହୋଇପାରନ୍ତି। ମନ୍ତ୍ରଣାଳୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଆସନ୍ତା ସପ୍ତାହରେ ଏହି ସମସ୍ତ ବିଚାରପତି ଶପଥ ଗ୍ରହଣ କରି ପାରନ୍ତି। ଗତ ଦଶ ବର୍ଷ ମଧ୍ୟରେ ସୁପ୍ରିମକୋର୍ଟରେ ବିଚାରପତିଙ୍କ ସଂଖ୍ୟାରେ ବିଚାରପତିଙ୍କ ସଂଖ୍ୟା ସର୍ବନିମ୍ନ ଅଟେ। ସୁପ୍ରିମକୋର୍ଟରେ ସର୍ବାଧିକ ୩୪ ଜଣ ବିଚାରପତି ନିଯୁକ୍ତ ହୋଇପାରିବେ। କିନ୍ତୁ ସମ୍ପ୍ରତି ୨୪ଟି ପଦ ପୂରଣ ହୋଇଛି। ଏହି ୯ ଜଣ ବିଚାରପତିଙ୍କ ପଦୋନ୍ନତି ପରେ ସୁପ୍ରିମକୋର୍ଟରେ କେବଳ ଗୋଟିଏ ପଦ ଖାଲି ରହିବ।
ସୁପ୍ରିମକୋର୍ଟ ପାଇଁ ପ୍ରସ୍ତାବିତ ନଅ ଜଣ ବିଚାରପତିଙ୍କ ମଧ୍ୟରୁ ତିନିଜଣ ମହିଳା ବିଚାରପତି ଅଛନ୍ତି। ଜଷ୍ଟିସ୍ ବି.ଭି ନାଗରତ୍ନା, ଜଷ୍ଟିସ୍ ହିମା କୋହଲି ଏବଂ ଜଷ୍ଟିସ ବେଲା ଏମ ତ୍ରିବେଦୀଙ୍କ ନିଯୁକ୍ତି ପରେ ସୁପ୍ରିମକୋର୍ଟରେ କାର୍ଯ୍ୟ କରୁଥିବା ଜଷ୍ଟିସ୍ ଇନ୍ଦିରା ବାନାର୍ଜୀଙ୍କ ସମେତ ଚାରିଜଣ ମହିଳା ବିଚାରପତି ରହିବେ। ଜଷ୍ଟିସ୍ ବିଭି ନାଗରତ୍ନା ୨୦୨୭ରେ ଭାରତର ପ୍ରଥମ ମହିଳା ପ୍ରଧାନ ବିଚାରପତି ହେବାର ମଧ୍ୟ ସମ୍ଭାବନା ରହିଛି। କାରଣ ବରିଷ୍ଠତା ଭିତ୍ତିରେ ସୁପ୍ରିମକୋର୍ଟର ପ୍ରଧାନ ବିଚାରପତି ନିଯୁକ୍ତି ପାଆନ୍ତି। ପିଏସ୍ ନରସିଂହ ବାରରୁ ସିଧାସଳଖ ସେ ସୁପ୍ରିମକୋର୍ଟର ବିଚାରପତି ହେବେ। ପ୍ରଧାନ ବିଚାରପତି ଏନ.ଭି ରାମନା, ଜଷ୍ଟିସ ୟୁ ୟୁ ଲଲିତ, ଜଷ୍ଟିସ ଏମ ଖାନୱିଲକର, ଜଷ୍ଟିସ ଡି ୱାଇ ଚନ୍ଦ୍ରଚୁଡ ଏବଂ ଜଷ୍ଟିସ ଏଲ ନାଗେଶ୍ୱରା ରାଓଙ୍କୁ ନେଇ ସୁପ୍ରିମକୋର୍ଟ କଲେଜିୟମ ଅଗଷ୍ଟ ୧୭ ରେ ସୁପ୍ରିମକୋର୍ଟରେ ପଦୋନ୍ନତି ପାଇଁ ୮ ଜଣ ହାଇକୋର୍ଟର ବିଚାରପତିଙ୍କ ନାମ ସୁପାରିଶ କରିଥିଲେ ଏବଂ ଜଣେ ଓକିଲଙ୍କ ସମେତ ଏଥିରେ ସମୁଦାୟ ୯ ଟି ନାମ ଅନ୍ତର୍ଭୁକ୍ତ ଥିଲା। ସେମାନଙ୍କ ମଧ୍ୟରେ ଜଷ୍ଟିସ୍ ବିକ୍ରମ ନାଥ (ଗୁଜୁରାଟ), ଜଷ୍ଟିସ୍ ଏଏସ୍ ଓକା (କର୍ଣ୍ଣାଟକ), ଜଷ୍ଟିସ୍ ହିମା କୋହଲି (ତେଲେଙ୍ଗାନା) ଏବଂ ଜଷ୍ଟିସ୍ ଜେ.କେ ମହେଶ୍ୱରୀ (ସିକ୍କିମ୍) ଅଛନ୍ତି। ଏଥିରେ ହାଇକୋର୍ଟର ଚାରିଜଣ ବିଚାରପତି ଜଷ୍ଟିସ୍ ବି.ଭି ନାଗରଥନା (କର୍ଣ୍ଣାଟକ), ଜଷ୍ଟିସ୍ ଏମଏମ ସୁନ୍ଦରେଶ (ମାଡ୍ରାସ), ଜଷ୍ଟିସ୍ ସିଟି ରବିକୁମାର (କେରଳ) ଏବଂ ବେଲା ଏମ୍ ତ୍ରିବେଦୀ (ଗୁଜୁରାଟ) ଏବଂ ବରିଷ୍ଠ ଓକିଲ ତଥା ପୂର୍ବତନ ASG ପିଏସ ନରସିମା ସୁପ୍ରିମକୋର୍ଟ ବିଚାରପତି ଭାବେ ନିଯୁକ୍ତି ପାଇବାକୁ ଯାଉଛନ୍ତି।
