ନୂଆଦିଲ୍ଲୀ: ରାଜସ୍ଥାନରେ ଚାଲିଥିବା ରାଜନୈତିକ କନ୍ଦଳ ମଧ୍ୟରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ କଂଗ୍ରେସକୁ ଟାର୍ଗେଟ କରିଛନ୍ତି । ସେ କହିଛନ୍ତି ଯେ, ଆମେ ରାଜନୀତି ଜାଣି ନାହୁଁ। ଆମେ ଜନସାଧାରଣଙ୍କ ପାଇଁ କାମ କରୁ। ସେମାନଙ୍କ ପାଇଁ ବିଦ୍ୟାଳୟ ଏବଂ ଡାକ୍ତରଖାନା ନିର୍ମାଣ କରୁ। ଯାହାକୁ ଲୋକେ ଭଲ ପାଆନ୍ତି।
ସେ ଆହୁରି କହିଛନ୍ତି ଯେ, ଆମେ ଲୋକଙ୍କ ମଙ୍ଗଳ କଥା ଚିନ୍ତା କରି ରାଜନୀତି କରୁ। ତେଣୁ ଆମେ ପ୍ରଥମେ ଦିଲ୍ଲୀ ଏବଂ ପଞ୍ଜାବରେ ସରକାର ଗଠନ କଲୁ। ବର୍ତ୍ତମାନ ଗୁଜରାଟର ଲୋକମାନେ କହୁଛନ୍ତି ଯେ ସେଠାରେ ମଧ୍ୟ ଆପ୍ ସରକାର ଗଠନ ହେବ। ରାଜସ୍ଥାନରେ ଉପୁଜିଥିବା ରାଜନୈତିକ ସଙ୍କଟକୁ ନେଇ କେଜ୍ରିୱାଲ କହିଛନ୍ତି, କଂଗ୍ରେସ ନିଜ ଘରର ଯତ୍ନ ନେଇପାରୁନାହିଁ। ଉଭୟ ଦଳ ବିଜେପି ଓ କଂଗ୍ରେସ ଲୋକଙ୍କୁ ଠକୁଛନ୍ତି। ସେମାନେ କହୁଛନ୍ତି ଯେ କେଜ୍ରିୱାଲ ମାଗଣାରେ ଜିନିଷ ଯୋଗାଇବା ବନ୍ଦ କରିବା ଉଚିତ୍। କିନ୍ତୁ ଆମର ଏହି ପ୍ରୟାସ ପାଇଁ ଆଜି ସମଗ୍ର ଦେଶ ଆମ୍ ଆଦମୀ ପାର୍ଟି ଉପରେ ଭରସା କରୁଛି। ଆମକୁ ଦେଶକୁ ଆଗକୁ ନେବାକୁ ପଡିବ।
ଏହା ପୂର୍ବରୁ ରବିବାର ଗୁଜରାଟରେ ପହଞ୍ଚି କେଜ୍ରିୱାଲ କହିଥିଲେ ବର୍ତ୍ତମାନ ପର୍ଯ୍ୟନ୍ତ ଲୋକମାନେ ବାଧ୍ୟତାମୂଳକ ଭାବେ ବିଜେପିକୁ ଭୋଟ୍ ଦେଉଥିଲେ। କାରଣ ସେମାନଙ୍କ ପାଖରେ ଦୁର୍ନୀତିଗ୍ରସ୍ତ କଂଗ୍ରେସ ହିଁ ଗୋଟିଏ ବିକଳ୍ପ ଥିଲା। କିନ୍ତୁ ବର୍ତ୍ତମାନ ଜନସାଧାରଣଙ୍କ ପାଖରେ ‘ଆପ୍’ ର ବିକଳ୍ପ ଅଛି।
