ତେହେରାନ,(ସତ୍ୟପାଠବ୍ୟୁରୋ): ଇରାନ ଓ ଆମେରିକା ମଧ୍ୟରେ ଲାଗି ରହିଥିବା ଯୁଦ୍ଧ ଯୋଗୁ ଦେଖାଦେଇଥିବା ସଙ୍କଟ ଏବେ ସାରା ବିଶ୍ବ ଭୋଗୁଛି। ଆମେରିକା କେତେବେଳେ ଇରାନକୁ ଧମକାଉଛି ତ ଆଉ କେତେବେଳେ ଆମେରିକାକୁ ନାଲି ଆଖି ଦେଖାଉଛି ଇରାନ। ଇରାନ ଏବଂ ଆମେରିକା ମଧ୍ୟରେ ଉତ୍ତେଜନା କମିବାର କୌଣସି ସଙ୍କେତ ଦେଖାଯାଉ ନାହିଁ। ହର୍ମୁଜ୍ ପ୍ରଣାଳୀରେ ଆକ୍ରମଣ ବନ୍ଦ ହୋଇଥିଲେ ମଧ୍ୟ ଉଭୟ ପକ୍ଷରୁ ଲଗାତାର ବୟାନବାଜି ଜାରି ରହିଛି। ଫଳରେ ଉପସାଗରରେ ଉତ୍ତେଜନା ବୃଦ୍ଧି ପାଇଛି। ଇରାନର ସର୍ବୋଚ୍ଚ ସୁରକ୍ଷା ସଂସ୍ଥାର ନୂତନ ମୁଖ୍ୟ ମୋହସେନ ରେଜାଇ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଇରାନର ପଡ଼ୋଶୀମାନଙ୍କୁ କଠୋର ଚେତାବନୀ ଜାରି କରିଛନ୍ତି। ତାଙ୍କ ବକ୍ତବ୍ୟକୁ ଇରାନର ସରକାରୀ ଗଣମାଧ୍ୟମ ସେୟାର କରିଛି। ସେ ଚେତାବନୀ ଦେଇଛନ୍ତି ଯେ,ଆମେରିକାର ନୂତନ କଠୋର ଆର୍ଥିକ ପଦକ୍ଷେପ ପାଇଁ ଯେକୌଣସି ଦେଶର ସମର୍ଥନକୁ ଇରାନ ଯୁଦ୍ଧ କାର୍ଯ୍ୟ ଭାବରେ ବିବେଚନା କରିବ। ସେ ଏହା ମଧ୍ୟ କହିଛନ୍ତି ଯେ ଯଦି ଆମେରିକାର ପ୍ରତିବନ୍ଧକ ଜାରି ରହେ, ତେବେ ଇରାନ ଉପସାଗରର ଯେକୌଣସି ସ୍ଥାନରୁ ତୈଳ ରପ୍ତାନିକୁ ଅବରୋଧ କରିବ। ଟ୍ରମ୍ପ କିଛି ପଦକ୍ଷେପ ନେଲେ ଆମେ ଜୋରଦାର ଜବାବ ଦେବୁ। ଇରାନ ପର୍ସିଆନ୍ ଗଲ୍ଫ ଦେଇ ହର୍ମୁଜ୍ ପ୍ରଣାଳୀର ବିକଳ୍ପ ଭାବରେ ବିବେଚନା କରାଯାଉଥିବା ଅନ୍ୟାନ୍ୟ ତୈଳ ପରିବହନ ମାର୍ଗଗୁଡ଼ିକୁ ଟାର୍ଗେଟ କରିବ। ଆମେ ହର୍ମୁଜ ଏବଂ ପାରସ୍ୟରୁ ବୁନ୍ଦାଏ ବି ତେଲ ବାହାରକୁ ଯିବାକୁ ଦେବୁ ନାହିଁ। ଚଳିତ ମାସରେ ଏହି ପଦବୀରେ ନିଯୁକ୍ତ ହେବା ପରେ ଏହା ରେଜାଇଙ୍କର ଦ୍ୱିତୀୟ ବଡ଼ ଚେତାବନୀ। ଦଶନ୍ଧି ଧରି ପ୍ରତିବନ୍ଧକର ସମ୍ମୁଖୀନ ହେଉଥିବା ଇରାନ ବିରୋଧରେ ଆମେରିକା ଆର୍ଥିକ ଯୁଦ୍ଧ ଘୋଷଣା କରି ଏକ ଘରିକିଆ କରିବାକୁ ଯୋଜନା କରୁଛି। ସୋମବାର ଆମେରିକାର ଅର୍ଥମନ୍ତ୍ରୀ ସ୍କଟ୍ ବେସାଣ୍ଟ ନୂତନ କଟକଣା ସମ୍ପର୍କରେ ଘୋଷଣା କରିବେ ବୋଲି କୁହାଯାଉଛି। ଏହି ସମୟରେ, ସମାଧାନ ପାଇଁ ମଧ୍ୟ ପ୍ରୟାସ ଚାଲିଛି। ପାକିସ୍ତାନର ସେନା ମୁଖ୍ୟ ଅସୀମ ମୁନିର ଆଲୋଚନା ଆରମ୍ଭ କରିବା ପାଇଁ ମଧ୍ୟସ୍ଥତା ଭାବରେ ଇରାନ ଗସ୍ତ କରିବାର କାର୍ଯ୍ୟକ୍ରମ ରହିଛି। ଇରାନର ସରକାରୀ ଟିଭି ଇରାନର ବୈଦେଶିକ ମନ୍ତ୍ରଣାଳୟର ମୁଖପାତ୍ର ଇସମାଇଲ ବାଘାଇଙ୍କ ବକ୍ତବ୍ୟ ଆଧାରରେ କହିଛି ଯେ, ମୁନିର ସୋମବାର ତେହେରାନରେ ପହଞ୍ଚୁଛନ୍ତି। ଏହି ଗସ୍ତକୁ ଆମେରିକା ଏବଂ ଇରାନ ମଧ୍ୟରେ ଉତ୍ତେଜନା କମ କରିବା ଏବଂ ଆଲୋଚନା ଟେବୁଲକୁ ପୁଣି ଫେରିବା ପାଇଁ ଇସଲାମାବାଦର ପ୍ରୟାସ।
