କୋଲକାତା: ମୁଖ୍ୟମନ୍ତ୍ରୀଙ୍କ ନେତୃତ୍ୱରେ ପଶ୍ଚିମବଙ୍ଗ ସରକାର ୟୁନିଫର୍ମ ସିଭିଲ କୋଡ୍ (ୟୁସିସି) ବିଲ୍ ଡ୍ରାଫ୍ଟ ସମୀକ୍ଷା କରିବା ପାଇଁ ଅବସରପ୍ରାପ୍ତ ସୁପ୍ରିମକୋର୍ଟ ବିଚାରପତି ଜଷ୍ଟିସ୍ ରଞ୍ଜନା ପ୍ରକାଶ ଦେଶାଇଙ୍କ ଅଧ୍ୟକ୍ଷତାରେ ଏକ ନଅ ଜଣିଆ କମିଟି ଗଠନ କରିଛନ୍ତି। କମିଟିର ଅନ୍ୟ ଆଠଜଣ ସଦସ୍ୟ ହେଉଛନ୍ତି ମେଘାଳୟର ପୂର୍ବତନ ରାଜ୍ୟପାଳ ତଥାଗତ ରୟ, ଆଇଏଏସ୍ ଏବଂ ରେସିଡେଣ୍ଟ୍ କମିସନର ଦୁଶ୍ୟନ୍ତ ନରିଆଲା, ଅବସରପ୍ରାପ୍ତ ଆଇଏଏସ୍ ଅଧିକାରୀ ଶତ୍ରୁଘ୍ନ ସିଂ,ଗୃହ ବିଭାଗର ମୁଖ୍ୟ ସଚିବ ସଙ୍ଘମିତ୍ରା ଘୋଷ, ବାଙ୍ଗାବାସି ମହାବିଦ୍ୟାଳୟର ଅବସରପ୍ରାପ୍ତ ଆସୋସିଏଟ୍ ପ୍ରଫେସର ରତ୍ନା ଭଟ୍ଟାଚାର୍ଯ୍ୟ,ଗୌର ବଙ୍ଗ ବିଶ୍ୱବିଦ୍ୟାଳୟର ପୂର୍ବତନ କୁଳପତି ଗୋପାଳ ଚନ୍ଦ୍ର ମିଶ୍ର,କୋଲକାତା ହାଇକୋର୍ଟର ଆଇନଜୀବୀ ଓସମାନ ଗନି ମଲ୍ଲିକ ଏବଂ ସମ୍ୱାଗର ପୂର୍ବତନ କାର୍ଯ୍ୟନିର୍ବାହୀ ନିର୍ଦ୍ଦେଶକ ନିର୍ମଳା ଭଟ୍ଟାଚାର୍ଯ୍ୟ।
ରାଜ୍ୟ ସରକାର ପୂର୍ବରୁ ଏକ ଡ୍ରାଫ୍ଟ ବିଲ୍ ପ୍ରସ୍ତୁତ କରିସାରିଛନ୍ତି। ଏହା ରାଜ୍ୟର ସମସ୍ତ ନାଗରିକଙ୍କ ପାଇଁ ଏକ ବ୍ୟାପକ ଆଇନଗତ ଢାଞ୍ଚା ସ୍ଥାପନ କରିବା ଉଦ୍ଦେଶ୍ୟରେ କରାଯାଇଛି। ଜୁଲାଇ ୨ ତାରିଖରେ, ଶୁଭେନ୍ଦୁ ଅଧିକାରୀ କ୍ୟାବିନେଟ୍ ୟୁସିସି ବିଲ୍ ଡ୍ରାଫ୍ଟ ସମୀକ୍ଷା କରିବା ପାଇଁ ଜଷ୍ଟିସ୍ ଦେଶାଇଙ୍କ ନେତୃତ୍ୱରେ ଏକ କମିଟି ଗଠନକୁ ଅନୁମୋଦନ କରିଥିଲେ। ଜଷ୍ଟିସ୍ ଦେଶାଇ ବିଜେପି ଶାସିତ ଉତ୍ତରାଖଣ୍ଡ, ଗୁଜରାଟ ଏବଂ ଛତିଶଗଡ଼ରେ ସମାନ ୟୁସିସି ପ୍ୟାନେଲର ଅଧ୍ୟକ୍ଷତା କରିଛନ୍ତି। ପ୍ୟାନେଲକୁ ଡ୍ରାଫ୍ଟ ଆଇନର ଯାଞ୍ଚ କରିବା ଏବଂ ଏହାର ସୁପାରିଶ ଦାଖଲ କରିବା ପାଇଁ ଚାରି ସପ୍ତାହ ସମୟ ମିଳିବ। ପରେ ଏହାକୁ ବିଧାନସଭା ସମ୍ମୁଖରେ ରଖାଯିବ।
