କନ୍ଧମାଳ (ସତ୍ୟପାଠବ୍ୟୁରୋ): ଭାରତୀୟ ପାଣିପାଗ ବିଭାଗ ପକ୍ଷରୁ ଚେତାବନୀ ଜାରି କରାଯିବା ପରେ କନ୍ଧମାଳ ଜିଲ୍ଲା ପ୍ରଶାସନ ପକ୍ଷରୁ ସତର୍କତାମୂଳକ ପଦକ୍ଷେପ ନିଆଯାଇଛି। କଳିଙ୍ଗା ଘାଟିରେ ଭୂସ୍ଖଳନ ଆଶଙ୍କା କରି ସେପ୍ଟେମ୍ବର ୨୩ ଏବଂ ୨୪ ତାରିଖ ଯାନବାହନ ଯାତାୟତ ନିମନ୍ତେ ବାରଣ କରାଯିବା ସହ ଗତକାଲି ରାତି ୧୨ଟା ଠାରୁ ସ୍ଥାନୀୟ ପୁଲିସ ପକ୍ଷରୁ କଳିଙ୍ଗା ଘାଟି ଆରମ୍ଭ ମୁଖ୍ୟ ସଡ଼କରେ ଅବରୋଧ କରିଛି। ଏହା ସହ ୨୪ ଘଣ୍ଟିଆ ନାକା ଲଗେଇ ରାସ୍ତାରେ ଯିବାକୁ ବାରଣ କରିବା ସହ ଚକାପାଦ ରାସ୍ତାରେ ଯିବାକୁ ଲୋକଙ୍କୁ ବୁଝାଉଥିବା ଦେଖିବାକୁ ମିଳିଛି। ଗତକାଲି ରାତି ଠାରୁ ସ୍ଥାନୀୟ ଅଞ୍ଚଳରେ ଲଗାଣ ବର୍ଷା ଜାରି ରହିଛି। କଳିଙ୍ଗା ଘାଟିରେ ଗତ ବର୍ଷ ଏହି ସମୟରେ ଭୂସ୍ଖଳନ ଯୋଗୁଁ ଦୀର୍ଘ ୪୭ଦିନ ରାସ୍ତାରେ ଯାତାୟତ ସମ୍ପୂର୍ଣ୍ଣ ବନ୍ଦ ରହିବା ଫଳରେ ଗଞ୍ଜାମ ଏବଂ କନ୍ଧମାଳ ଜିଲ୍ଲାବାସୀ ବହୁ ସମସ୍ୟାର ସମ୍ମୁଖୀନ ହୋଇଥିଲେ।
ଏବେ ପ୍ରବଳ ବର୍ଷା ହେବା ସହ କନ୍ଧମାଳ ଏବଂ ଗଞ୍ଜାମ ଜିଲ୍ଲାକୁ ପାଣିପାଗ ବିଭାଗ ଦ୍ଵାରା ସତର୍କ ସୂଚନା ଦେବା ପରେ କଳିଙ୍ଗା ଘାଟିରେ ପୁଣି ଭୂସ୍ଖଳନ ଭୟ ଥିବା ଦର୍ଶାଇ କଳିଙ୍ଗା ଘାଟିରେ ଯାତାୟତକୁ ସମ୍ପୂର୍ଣ୍ଣ ବାରଣ କରିବା ସହ ସ୍ଥାନୀୟ ତହସିଲଦାର ଏକ ଲିଖିତ ନିର୍ଦେଶନାମା ଜାରି କରିବା ପରେ କଳିଙ୍ଗା ଘାଟିକୁ ସମ୍ପୂର୍ଣ୍ଣ ସିଲ କରିଦିଆଯାଇଛି।