ନୂଆଦିଲ୍ଲୀ: ହତ୍ୟା ମାମଲାରେ ଦୋଷୀ ସାବ୍ୟସ୍ତ ତିନି ଜଣଙ୍କୁ ଜାମିନ ଦେବା ଘଟଣାରେ ଝାଡ଼ଖଣ୍ଡ ହାଇକୋର୍ଟକୁ ସୋମବାର କଡ଼ା ସମାଲୋଚନା କରିଥିଲେ ସୁପ୍ରିମକୋର୍ଟ। ମାନ୍ୟବର କୋର୍ଟ କହିଛନ୍ତି ଯେ ହାଇକୋର୍ଟ ଏକ ଅସ୍ପଷ୍ଟ ଏବଂ ଅଯୌକ୍ତିକ ନିର୍ଦ୍ଦେଶ ଦେଇଛନ୍ତି। ଅଭିଯୁକ୍ତ ବିରୋଧରେ ହୋଇଥିବା ଅଭିଯୋଗ କେବଳ ସାଧାରଣ ଓ ସର୍ବବ୍ୟାପୀ ବୋଲି ଦର୍ଶାଇ ଦଣ୍ଡାଦେଶକୁ ଅଟକ ରଖାଯାଇଥିଲା। ନୋଟିସ୍ ଜାରି ହେବା ସତ୍ତ୍ୱେ ଝାଡ଼ଖଣ୍ଡ ସରକାରଙ୍କ ଅନୁପସ୍ଥିତିକୁ ମଧ୍ୟ କୋର୍ଟ ଗମ୍ଭୀରତାର ସହ ଗ୍ରହଣ କରିଥିଲେ। ଏହା ସହିତ ରାଜ୍ୟ ଦଣ୍ଡାଦେଶ ସ୍ଥଗିତ ରଖିବାକୁ ଚ୍ୟାଲେଞ୍ଜ କରି ନଥିବାରୁ କୋର୍ଟ ଆଶ୍ଚର୍ଯ୍ୟ ପ୍ରକାଶ କରିଥିଲେ।
ହାଇକୋର୍ଟଙ୍କ ଦଣ୍ଡାଦେଶ ସ୍ଥଗିତ ରଖିବା ଆଦେଶକୁ ଖାରଜ କରି ସୁପ୍ରିମକୋର୍ଟ ଦୋଷୀମାନଙ୍କୁ ଜେଲ କର୍ତ୍ତୃପକ୍ଷଙ୍କ ନିକଟରେ ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦେଇଥିଲେ। ନଚେତ୍ ସେମାନଙ୍କ ବିରୁଦ୍ଧରେ ଜାମିନ ବିହୀନ ଗିରଫ ପରୱାନା ଜାରି କରାଯିବ। ଆତ୍ମସମର୍ପଣ ପ୍ରମାଣପତ୍ର ପ୍ରଦାନ କରିବା ପରେ ଦଣ୍ଡାଦେଶ ସ୍ଥଗିତ ରଖିବା ପାଇଁ ସେମାନଙ୍କ ଆବେଦନଗୁଡ଼ିକର ପୁନଃ ଶୁଣାଣି କରିବାକୁ ହାଇକୋର୍ଟକୁ ନିର୍ଦ୍ଦେଶ ଦେଇଥିଲେ ସୁପ୍ରିମକୋର୍ଟ। କୋର୍ଟ “ଏହି ଆଦେଶର ଗୋଟିଏ କପି ଯଥାଶୀଘ୍ର ଝାଡ଼ଖଣ୍ଡ ହାଇକୋର୍ଟର ମୁଖ୍ୟ ବିଚାରପତିଙ୍କୁ ପଠାଇବାକୁ ନିର୍ଦ୍ଦେଶ ଦେଇଥିଲେ। ଏହା ଏପରି ଏକ ମାମଲା ଯାହା ଉପରେ ମୁଖ୍ୟ ବିଚାରପତି ତୁରନ୍ତ ଦୃଷ୍ଟି ଦେବା ଉଚିତ ବୋଲି ସୁପ୍ରିମକୋର୍ଟ କହିଥିଲେ।
ବିଚାରପତି ଜେବି ପାରଡିୱାଲା ଏବଂ କେଭି ବିଶ୍ୱନାଥନଙ୍କ ଖଣ୍ଡପୀଠ କହିଛନ୍ତି ଯେ ଝାଡ଼ଖଣ୍ଡ ରାଜ୍ୟକୁ କୋର୍ଟ ଦ୍ୱାରା ଜାରି କରାଯାଇଥିବା ନୋଟିସ୍ ପ୍ରଦାନ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ ଏହି କୋର୍ଟରେ ଉପସ୍ଥିତ ହୋଇନାହିଁ। ଏହା ନିଶ୍ଚିତ ପକ୍ଷେ ଏକ ଚିନ୍ତାଜନକ ଓ ଦୁର୍ଭାଗ୍ୟଜନକ। କାରଣ ଆମେ ଏକ ଅତ୍ୟନ୍ତ ଗମ୍ଭୀର ମାମଲା ସହିତ କାର୍ଯ୍ୟ କରୁଛୁ ଯେଉଁଠାରେ ହାଇକୋର୍ଟ ଏକ ଗୁପ୍ତ ଆଦେଶ ଦ୍ୱାରା ଆଜୀବନ କାରାଦଣ୍ଡର ମୂଳ ଆଦେଶକୁ ସ୍ଥଗିତ ରଖିଛନ୍ତି ବୋଲି ଖଣ୍ଡପୀଠ କହିଛନ୍ତି।
ଅଭିଯୋଗକାରୀ ହାଇକୋର୍ଟଙ୍କ ଆଦେଶକୁ ଚ୍ୟାଲେଞ୍ଜ କରିଥିଲେ। ଯାହା ଦୋଷୀଙ୍କ ଆଜୀବନ କାରାଦଣ୍ଡାଦେଶକୁ ସ୍ଥଗିତ ରଖିଥିଲା।ଏଠାରେ କହି ରଖୁ କି ତଳକୋର୍ଟ ଅଭିଯୁକ୍ତଙ୍କୁ ଏକ ହତ୍ୟା ମାମଲାରେ ଦୋଷୀ ସାବ୍ୟସ୍ତ କରିଥିଲେ। ପବ୍ଲିକ ପ୍ରସିକ୍ୟୁସନ ଅଭିଯୋଗ କରିଥିଲେ ଯେ ସେମାନେ ଏକ ବେଆଇନ ଭିଡ଼ହିଂସାର ଅଂଶବିଶେଷ ରହିଥିଲେ। ଯେଉଁମାନେ ଖବରଦାତାଙ୍କ ଭାଇ ଏବଂ ଅନ୍ୟ ଜଣେ ବ୍ୟକ୍ତିଙ୍କୁ ଲାଠି, ରଡ୍ ଏବଂ ପିସ୍ତଲ ସାହାଯ୍ୟରେ ଆକ୍ରମଣ କରିଥିଲେ। ଯାହା ଫଳରେ ଭାଇର ମୃତ୍ୟୁ ହୋଇଥିଲା।
