ଭୁବନେଶ୍ୱର(ସତ୍ୟପାଠ ବ୍ୟୁରୋ)ବିବାଦ ପରେ ଯୀଶୁଖ୍ରୀଷ୍ଟଙ୍କ ଏଆଇ ଫଟୋ ସୋସିଆଲ ମିଡ଼ିଆରୁ ଡିଲିଟ୍ କରିବା ସହ ସଫେଇ ଦେଲେ ଟ୍ରମ୍ପ । ତେବେ ସୋସିଆଲରେ ପୋଷ୍ଟ ହୋଇଥିବା ଏହି ଫଟୋରେ ରାଷ୍ଟ୍ରପତି ଟ୍ରମ୍ପ ଲାଲ ଏବଂ ଧଳା ପୋଷାକ ପିନ୍ଧି ଜଣେ ରୋଗୀଙ୍କ କପାଳକୁ ସ୍ପର୍ଶ କରୁଥିବାର ଦେଖାଯାଉଥିଲା। ତାଙ୍କ ହାତ ଏବଂ ମୁଣ୍ଡରୁ ଏକ ଉଜ୍ଜ୍ୱଳ ଆଲୋକ ବାହାରୁଥିଲା। ପୃଷ୍ଠଭୂମିରେ ଏକ ଆମେରିକୀୟ ପତାକା ଉଡୁଥିବାବେଳେ ଯେତେବେଳେ ଅନେକ ସୈନ୍ୟ ଏବଂ ଲୋକେ ରାଷ୍ଟ୍ରପତିଙ୍କୁ ଶ୍ରଦ୍ଧାରେ ଦେଖୁଥିବା ଫଟୋରେ ଦର୍ଶାଯାଇଥିଲା। ସେପଟେ ଏଆଇ-ଜେନେରେଟେଡ୍ ଫଟୋଟି ରବିବାର ରାତିରେ ପୋଷ୍ଟ କରାଯାଇଥିଲା, କିନ୍ତୁ ପରଦିନ, ସୋମବାର ଏହାକୁ ହଟାଇ ଦିଆଯାଇଥିଲା। ଯେତେବେଳେ ଟ୍ରମ୍ପଙ୍କୁ ଫଟୋ ବିଷୟରେ ପଚରାଯାଇଥିଲା, ସେ ସ୍ପଷ୍ଟ କରିଥିଲେ ଯେ, ସେ ନିଜକୁ ଯୀଶୁଖ୍ରୀଷ୍ଟ ଭାବରେ ଚିତ୍ରଣ କରିବାକୁ ଚାହୁଁ ନଥିଲେ। ଗଣମାଧ୍ୟମ ସହିତ କଥାବାର୍ତ୍ତା ସମୟରେ ରାଷ୍ଟ୍ରପତି କହିଥିଲେ, ମୁଁ ଏହାକୁ ପୋଷ୍ଟ କରିଥିଲି, ଏବଂ ମୁଁ ଭାବିଥିଲି ଯେ, ଜଣେ ଡାକ୍ତର ଭାବରେ ରେଡକ୍ରସ ପାଇଁ କାମ କରୁଛି। ଏହା ମୋତେ ଜଣେ ଡାକ୍ତର ଭାବରେ ଲୋକଙ୍କୁ ସୁସ୍ଥ କରୁଥିବା ଦେଖାଇଥିଲା। ଅନେକ ଲୋକ ଏହି ଚିତ୍ରକୁ ଯୀଶୁଖ୍ରୀଷ୍ଟଙ୍କ ସହିତ ଯୋଡ଼ିଥିଲେ। ଏହି ଚିତ୍ର ଧାର୍ମିକ ନେତାମାନଙ୍କ ମଧ୍ୟରେ, ବିଶେଷକରି ରକ୍ଷଣଶୀଳ ଖ୍ରୀଷ୍ଟିଆନ ଗୋଷ୍ଠୀମାନଙ୍କ ମଧ୍ୟରେ କ୍ରୋଧ ସୃଷ୍ଟି କରିଥିଲା। ଟ୍ରମ୍ପ ସମର୍ଥକ ଭାବରେ ଜଣାଶୁଣା କିଛି ପ୍ରମୁଖ ରକ୍ଷଣଶୀଳ ଖ୍ରୀଷ୍ଟିଆନ ମଧ୍ୟ ଏହାକୁ ନିନ୍ଦାଜନକ ବୋଲି କହିଥିଲେ। ରକ୍ଷଣଶୀଳ ସାମ୍ବାଦିକ ମେଗାନ ବାଶାମ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ କଡ଼ା ପ୍ରତିକ୍ରିୟା ଦେଇ କହିଥିଲେ, ପୋଷ୍ଟଟି ଆପତ୍ତିଜନକ ଏବଂ ଟ୍ରମ୍ପ ତୁରନ୍ତ କ୍ଷମା ମାଗିବା ଉଚିତ।