ଭୁବନେଶ୍ୱର(ସତ୍ୟପାଠ ବ୍ୟୁରୋ):ଦେଶବାସୀଙ୍କୁ ଅପିଲ୍ କରିବା ପରେ ମାତ୍ର ୨ଟି ଗାଡ଼ିର କନଭୟରେ ଯାତ୍ରା କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଯାହାର ଭିଡିଓ ଏବେ ଚାରିଆଡେ ଭାଇରାଲ ହେବାରେ ଲାଗିଛି । ତେବେ ଦେଶବାସୀଙ୍କୁ ଇନ୍ଧନ ବଞ୍ଚାଇବା ପାଇଁ ଅପିଲ୍ କରିବା ପରେ, ପ୍ରଧାନମନ୍ତ୍ରୀ ନିଜେ ପ୍ରଥମେ ନିଜଠୁ ଆରମ୍ଭ କରିଛନ୍ତି। ବୁଧବାର ପ୍ରଧାନମନ୍ତ୍ରୀଙ୍କୁ ମାତ୍ର ୨ଟି ଗାଡ଼ିର କନଭୟରେ ଯାତ୍ରା କରୁଥିବାର ଦେଖିବାକୁ ମିଳିଛି, ଯାହା ସମସ୍ତଙ୍କୁ ଚକିତ କରିଛି। ସାଧାରଣତଃ ପ୍ରଧାନମନ୍ତ୍ରୀଙ୍କ କନଭୟରେ ୧୨ ରୁ ୧୫ଟି ଗାଡ଼ି ରହିଥାଏ।
ଏଥିରେ ଏସପିଜି (SPG), ଏନଏସଜି (NSG) କମାଣ୍ଡୋ, ଜାମର କାର୍ ଏବଂ ଆମ୍ବୁଲାନ୍ସ ସାମିଲ ଥାଏ। କିନ୍ତୁ ବୁଧବାର ସାମ୍ନାକୁ ଆସିଥିବା ଭିଡିଓରେ ଦେଖାଯାଇଛି ଯେ, ଗୋଟିଏ ଗାଡ଼ିରେ ପ୍ରଧାନମନ୍ତ୍ରୀ ବସିଥିବା ବେଳେ ଅନ୍ୟ ଗୋଟିଏ ଗାଡ଼ିରେ ଏସପିଜି କର୍ମଚାରୀ ଅଛନ୍ତି। ଏପରିକି କ୍ୟାବିନେଟ୍ ବୈଠକକୁ ଯିବା ସମୟରେ ମଧ୍ୟ ସେ ମାତ୍ର ୪ଟି ଗାଡ଼ି ବ୍ୟବହାର କରିଥିଲେ। ସେପଟେ ପଶ୍ଚିମ ଏସିଆରେ ଲାଗିରହିଥିବା ଉତ୍ତେଜନା କାରଣରୁ ବିଶ୍ଵବ୍ୟାପୀ ଶକ୍ତି ସଙ୍କଟ ଦେଖାଦେଇଛି। ଏହାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ସମସ୍ତ ନେତା ଓ ଅଧିକାରୀଙ୍କୁ ସେମାନଙ୍କ କନଭୟରେ ଗାଡ଼ି ସଂଖ୍ୟା କମାଇବାକୁ କହିଥିଲେ।
ପ୍ରଧାନମନ୍ତ୍ରୀଙ୍କ ଏହି ପଦକ୍ଷେପ ପରେ ଏବେ ଅନ୍ୟ କେନ୍ଦ୍ରମନ୍ତ୍ରୀ ଯଥା ଅମିତ ଶାହ ଏବଂ ରାଜନାଥ ସିଂ ମଧ୍ୟ ଛୋଟ କନଭୟରେ ଯାତ୍ରା କରୁଥିବାର ଦେଖାଯାଇଛି। ପେଟ୍ରୋଲ-ଡିଜେଲର ବ୍ୟବହାର କମାଇ ଦେଶର ବିଦେଶୀ ମୁଦ୍ରା ବଞ୍ଚାଇବା ସହ ପରିବେଶକୁ ପ୍ରଦୂଷଣ ମୁକ୍ତ ରଖିବା ପ୍ରଧାନମନ୍ତ୍ରୀଙ୍କ ମୁଖ୍ୟ ଉଦ୍ଦେଶ୍ୟ। ସେଥିପାଇଁ ସେ କନଭୟରେ ଇଲେକ୍ଟ୍ରିକ୍ ଗାଡ଼ି (Electric Vehicles) ସଂଖ୍ୟା ବଢ଼ାଇବାକୁ ଏସପିଜିକୁ ପରାମର୍ଶ ଦେଇଛନ୍ତି।
