ନୂଆଦିଲ୍ଲୀ: ଲୋକସଭାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପଶ୍ଚିମ ଏସିଆରେ ଚାଲିଥିବା ଯୁଦ୍ଧ ସ୍ଥିତିକୁ ନେଇ ଗଭୀର ଚିନ୍ତା ପ୍ରକାଶ କରିଛନ୍ତି। ସେ କହିଛନ୍ତି ଯେ, ଏହି ସଂଘର୍ଷ ମାତ୍ର ସେହି ଅଞ୍ଚଳକୁ ନୁହେଁ, ସମଗ୍ର ବିଶ୍ବ ଅର୍ଥନୀତିକୁ ପ୍ରଭାବିତ କରୁଛି।
ପ୍ରଧାନମନ୍ତ୍ରୀ କହିଛନ୍ତି ଯେ, ପଶ୍ଚିମ ଏସିଆର ଅନେକ ଦେଶ ସହିତ ଭାରତର ବ୍ୟବସାୟ ଜଡ଼ିତ ଥିବାରୁ ଏହାର ପ୍ରଭାବ ଭାରତ ଉପରେ ମଧ୍ୟ ପଡ଼ିପାରେ। ସେଠାରେ ପ୍ରାୟ ୧ କୋଟି ଭାରତୀୟ ବସବାସ କରୁଥିବା ସହ ଅନେକ ଭାରତୀୟ ନାବିକ ଗଭୀର ସମୁଦ୍ରରେ ଫସି ରହିଥିବା କଥା ସେ ଉଲ୍ଲେଖ କରିଛନ୍ତି।
ଯୁଦ୍ଧ ଆରମ୍ଭ ହେବା ପରଠାରୁ ସରକାର ପକ୍ଷରୁ ସେଠାରେ ରହୁଥିବା ଭାରତୀୟଙ୍କୁ ସହାୟତା ପ୍ରଦାନ କରାଯାଉଛି। ୨୪ ଘଣ୍ଟିଆ ହେଲ୍ପଲାଇନ୍ ବ୍ୟବସ୍ଥା ଖୋଲା ରଖାଯାଇଛି ଏବଂ ଗଲ୍ଫ ସାମୁଦ୍ରିକ ଅଞ୍ଚଳରେ ଭାରତ ନଜର ରଖିଛି।
ପ୍ରଧାନମନ୍ତ୍ରୀ ଆହୁରି କହିଛନ୍ତି ଯେ, ଯୁଦ୍ଧ ପରଠାରୁ ଷ୍ଟ୍ରେଟ ଅଫ୍ ହର୍ମୁଜ ଦେଇ ଜାହାଜ ଚଳାଚଳ କଷ୍ଟକର ହୋଇପଡ଼ିଛି। ତଥାପି ଦେଶରେ ପେଟ୍ରୋଲ ଓ ଡିଜେଲ୍ ଯୋଗାଣ ସ୍ବାଭାବିକ ରହିଛି। ଭାରତ ବର୍ତ୍ତମାନ ୪୧ଟି ଦେଶରୁ ଶକ୍ତି ଆମଦାନୀ କରୁଛି ବୋଲି ସେ ଜଣାଇଛନ୍ତି।
ସେ କହିଛନ୍ତି ଯେ, ଏହି ସଂକଟକୁ ମୁକାବିଲା ପାଇଁ ସରକାର ଏକ ଆନ୍ତଃମନ୍ତ୍ରିସ୍ତରୀୟ କମିଟି ଗଠନ କରି ନିୟମିତ ଭାବେ ପରିସ୍ଥିତି ନଜର ରଖୁଛି। କୃଷକମାନଙ୍କୁ ସୁରକ୍ଷା ପାଇଁ ବିଭିନ୍ନ ପଦକ୍ଷେପ ଗ୍ରହଣ ହୋଇଛି, ଯାହାର ମଧ୍ୟରେ ୟୁରିଆ ସାର ଦାମ କମ୍ ରଖାଯାଇଛି ଏବଂ ୨୨ ଲକ୍ଷ ସୋଲାର ପମ୍ପ୍ ବଣ୍ଟନ କରାଯାଇଛି।
ଏହା ସହିତ, ଦେଶରେ ପର୍ଯ୍ୟାପ୍ତ ଖାଦ୍ୟଶସ୍ୟ ମହଜୁତ ରହିଛି ବୋଲି ସେ ଆଶ୍ୱାସନ ଦେଇଛନ୍ତି। ଗ୍ରୀଷ୍ମ ପ୍ରବାହ ଆସୁଥିବାରୁ ପାୱାର ପ୍ଲାଣ୍ଟଗୁଡ଼ିକୁ ଷ୍ଟକ ବଢ଼ାଇବା ପାଇଁ ନିର୍ଦ୍ଦେଶ ଦିଆଯାଇଛି।
ପ୍ରଧାନମନ୍ତ୍ରୀ ଜୋର ଦେଇ କହିଛନ୍ତି ଯେ, ଏହି ସଂକଟର ସମାଧାନ ପାଇଁ କୂଟନୀତି ଓ କଥାବାର୍ତ୍ତା ହିଁ ଏକମାତ୍ର ଉପାୟ। ସେ ସତର୍କ କରିଛନ୍ତି ଯେ, ଯୁଦ୍ଧର ପ୍ରଭାବ ଦୀର୍ଘ ସମୟ ରହିପାରେ ଏବଂ କେହି କଳାବଜାରୀ କିମ୍ବା ଅନ୍ୟାନ୍ୟ ଅନୀତିରୁ ଲାଭ ଉଠାଇବାକୁ ଚେଷ୍ଟା କଲେ ସେମାନଙ୍କ ବିରୋଧରେ କଠୋର କାର୍ଯ୍ୟନୁଷ୍ଠାନ ହେବ।
ସରକାର ପକ୍ଷରୁ ସଂକଟର ପ୍ରଭାବକୁ ଭାରତ ଉପରେ କମ୍ କରିବା ପାଇଁ ସବୁ ପ୍ରୟାସ ଜାରି ରହିଛି ବୋଲି ସେ ଶେଷରେ କହିଛନ୍ତି।
