କାଠମାଣ୍ଡୁ(ସତ୍ୟପାଠବ୍ୟୁରୋ): ନେପାଳ–ତିବ୍ଦତ ସୀମାନ୍ତ ଅଞ୍ଚଳରେ ଘଟିଥିବା ପ୍ରଳୟଙ୍କରୀ ଆକସ୍ମିକ ବନ୍ୟାରେ ବର୍ତ୍ତମାନ ସୁଦ୍ଧା ୭୫୦ଟି ମୃତଦେହ ଉଦ୍ଧାର କରାଯାଇସାରିଥିବାବେଳେ ପ୍ରାୟ ୩,୦୦୦ରୁ ଊର୍ଦ୍ଧ୍ୱ ଲୋକ ଏବେ ବି ନିଖୋଜ ରହିଛନ୍ତି। ତିବ୍ଦତ ଅଞ୍ଚଳରେ ହିମଖଣ୍ଡ ଭୁଷୁଡ଼ିବା ଏବଂ ଭୋଟକୋଶୀ ନଦୀରେ ସୃଷ୍ଟ ଆକସ୍ମିକ ବନ୍ୟା ଯୋଗୁଁ ନେପାଳ ଓ ଚୀନ୍ ସୀମାର ବିସ୍ତୀର୍ଣ୍ଣ ଅଞ୍ଚଳ ସମ୍ପୂର୍ଣ୍ଣ ଜଳମଗ୍ନ ହୋଇପଡ଼ିଛି। ନେପାଳର ଜାତୀୟ ବିପର୍ଯ୍ୟୟ ପ୍ରଶମନ ପ୍ରାଧିକରଣର ସଦ୍ୟତମ ତଥ୍ୟ ଅନୁଯାୟୀ, ନେପାଳ ଜଳଭାଗରୁ ପ୍ରାୟ ୭୩୪ ଜଣଙ୍କ ମୃତଦେହ ଉଦ୍ଧାର ହୋଇଥିବା ବେଳେ ତିବ୍ଦତ କ୍ଷେତ୍ରରୁ ୧୬ ଜଣଙ୍କ ପ୍ରାଣହାନି ଘଟିଥିବା ନିଶ୍ଚିତ କରାଯାଇଛି। ଉଦ୍ଧାରକାରୀ ଦଳ ନଦୀକୂଳିଆ ଅଞ୍ଚଳ, ଭାସିଯାଇଥିବା ଘରଦ୍ୱାର ଏବଂ ଜଳବିଦ୍ୟୁତ୍ ପ୍ରକଳ୍ପର ସୁଡ଼ଙ୍ଗଗୁଡ଼ିକରୁ କ୍ରମାଗତ ଭାବେ ମୃତଦେହ ଉଦ୍ଧାର କରୁଛନ୍ତି।
ଅପରପକ୍ଷରେ, ଏହି ମହାବିପତ୍ତିରେ ନିଖୋଜ ଥିବା ବ୍ୟକ୍ତିମାନଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଥିବାରୁ ଚିନ୍ତା ବଢ଼ିବାରେ ଲାଗିଛି। ନିଖୋଜଙ୍କ ମଧ୍ୟରେ ଶହ ଶହ ଭାରତୀୟ ନାଗରିକ, ତୀର୍ଥଯାତ୍ରୀ ଏବଂ ବିଦେଶୀ ପର୍ଯ୍ୟଟକ ସାମିଲ ଅଛନ୍ତି। ଭାରତୀୟ ବୈଦେଶିକ ମନ୍ତ୍ରାଳୟ ଅନୁଯାୟୀ, ସୀମାନ୍ତ ଅଞ୍ଚଳରେ କାର୍ଯ୍ୟରତ ଜଳବିଦ୍ୟୁତ୍ ଶ୍ରମିକ ଓ କୈଳାସ ମାନସରୋବର ଯାତ୍ରୀଙ୍କ ସମେତ ୩୦୦ରୁ ଊର୍ଦ୍ଧ୍ୱ ଭାରତୀୟଙ୍କ ସହ ଯୋଗାଯୋଗ ସମ୍ଭବ ହୋଇପାରିନାହିଁ। ପ୍ରଭାବିତ ଜିଲ୍ଲାଗୁଡ଼ିକରେ ଟେଲିଫୋନ୍, ବିଦ୍ୟୁତ୍ ଏବଂ ରାସ୍ତାଘାଟ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଥିବାରୁ ଉଦ୍ଧାର କାର୍ଯ୍ୟ ଗମ୍ଭୀର ସମସ୍ୟାର ସମ୍ମୁଖୀନ ହେଉଛି। ସେନା, ସଶସ୍ତ୍ର ପୋଲିସ ବଳ ଏବଂ ହେଲିକପ୍ଟର ଜରିଆରେ ନେପାଳ ଓ ଚୀନ୍ ସରକାର ଦୁର୍ଗମ ଅଞ୍ଚଳଗୁଡ଼ିକରୁ ଆହତମାନଙ୍କୁ ଉଦ୍ଧାର କରି ହସ୍ପିଟାଲ ପଠାଉଛନ୍ତି। ଭାରତ ପକ୍ଷରୁ ମଧ୍ୟ ଜରୁରୀକାଳୀନ ରିଲିଫ୍ ସାମଗ୍ରୀ, ସ୍ୱତନ୍ତ୍ର ଉଦ୍ଧାରକାରୀ ଟିମ୍ ଏବଂ ଔଷଧ ପଠାଯାଇ ସାହାଯ୍ୟର ହାତ ବଢ଼ାଯାଇଛି। ବନ୍ୟାର ସୁଯୋଗ ନେଇ କିଛି ସ୍ଥାନରେ ସିନ୍ଧୁକ ଲୁଟ୍ ଓ ଚୋରି ଘଟଣା ସାମ୍ନାକୁ ଆସିବା ପରେ କଡ଼ା ପାଟ୍ରୋଲିଂ ବ୍ୟବସ୍ଥା କରାଯାଇଛି। ନଦୀରେ ଅବରୋଧ ସୃଷ୍ଟି ହୋଇଥିବା ହ୍ରାଦଗୁଡ଼ିକରୁ ପୁନର୍ବାର ଜଳପ୍ଲାବନ ହେବାର ଆଶଙ୍କା ଥିବାରୁ ନଦୀକୂଳିଆ ଲୋକଙ୍କୁ ସୁରକ୍ଷିତ ସ୍ଥାନକୁ ଯିବା ପାଇଁ ହାଇଆଲର୍ଟ ଜାରି କରାଯାଇଛି।