ସତ୍ୟପାଠ: ନବରଙ୍ଗପୁରରେ ହଜାର ହଜାର ମହିଳା ରାସ୍ତାରେ। ହାତରେ ଠେଙ୍ଗା, ମୁହଁରେ ପ୍ରତିବାଦର ସ୍ଲୋଗାନ୍। ଦାବି—ମଦ କାରବାର ବନ୍ଦ କର। ଆଉ ମଦ ବିରୋଧୀ ଆନ୍ଦୋଳନର ନେତା ରାଜେଶ ଜାନୀଙ୍କୁ ମୁକ୍ତ କର।
କିନ୍ତୁ ପ୍ରଶ୍ନ—ମଦ ବିରୋଧରେ ଆନ୍ଦୋଳନ କରୁଥିବା ଲୋକଙ୍କ ଉପରେ ପ୍ରଶାସନର କଠୋରତା, ଅବୈଧ ମଦ ବେପାରୀଙ୍କ ବିରୋଧରେ ସେହି କଠୋରତା କେଉଁଠି?
ନଭେମ୍ବର ୩ ତାରିଖରେ ନବରଙ୍ଗପୁର ନାରୀ ମହାସଂଘର ହଜାର ହଜାର ମହିଳା ଉପଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ କରିଥିଲେ। କାରଣ, ମଦ ବିରୋଧୀ ଆନ୍ଦୋଳନର ଅନ୍ୟତମ ନେତା ତଥା ସିପିଆଇଏମ୍ ନେତା ରାଜେଶ ଜାନୀଙ୍କୁ ଗିରଫ କରି ଜେଲ୍ ପଠାଯାଇଛି।
ପ୍ରଶାସନର କହିବା କଥା, BNSS ଧାରା ୧୨୯ ଅନୁସାରେ ତାଙ୍କୁ ତିନିଥର ନୋଟିସ୍ ଦିଆଯାଇଥିଲା। ଶାନ୍ତି ବଜାୟ ରଖିବା ପାଇଁ ବଣ୍ଡ୍ରେ ସ୍ୱାକ୍ଷର କରିବାକୁ ସେ ମନା କରିବାରୁ ଆଇନଗତ ପଦକ୍ଷେପ ନିଆଯାଇଛି। ଏହା ପ୍ରଶାସନର ଯୁକ୍ତି। କିନ୍ତୁ ମହିଳାଙ୍କ ପ୍ରଶ୍ନ ଅଲଗା।
ମଦ ବିରୋଧରେ ସ୍ୱର ଉଠାଇଲେ ଶାନ୍ତିଭଙ୍ଗର ଆଶଙ୍କା, ଆଉ ଅବୈଧ ମଦ ବିକ୍ରି ହେଲେ ତାହା କ’ଣ ଶାନ୍ତିର ପ୍ରତୀକ?
ଅକ୍ଟୋବରରେ ନବରଙ୍ଗପୁରର ସମସ୍ତ ୧୦ଟି ବ୍ଲକ୍ରୁ ମହିଳାମାନେ ଆସି ଅବୈଧ ମଦ କାରବାର ବନ୍ଦ ପାଇଁ ୧୦ ଦଫା ଦାବିପତ୍ର ଦେଇଥିଲେ।
ସେମାନଙ୍କ ଅଭିଯୋଗ—ମଦ ପାଇଁ ଘରେ ଅଶାନ୍ତି, ମହିଳାଙ୍କ ଉପରେ ନିର୍ଯାତନା ଓ ପରିବାରର ଆର୍ଥିକ ସଙ୍କଟ ବଢ଼ୁଛି।
ଏବେ ମୋହନ ମାଝୀ ସରକାରଙ୍କୁ ତିନୋଟି ସିଧା ପ୍ରଶ୍ନ।
ପ୍ରଥମ: ମହିଳାମାନେ ଅବୈଧ ମଦ ବିକ୍ରି ବିରୋଧରେ ବାରମ୍ବାର ଅଭିଯୋଗ କରିବା ପରେ କେତୋଟି ଦୋକାନ ବନ୍ଦ ହୋଇଛି? କେତେଜଣ ବେପାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇଛି?
ଦ୍ୱିତୀୟ: ରାଜେଶ ଜାନୀଙ୍କ ବିରୋଧରେ ପଦକ୍ଷେପ ଆଇନସମ୍ମତ ବୋଲି ପ୍ରଶାସନ କହୁଛି। କିନ୍ତୁ ଏହା ଆବଶ୍ୟକ ଓ ଆନୁପାତିକ ଥିଲା କି? ଶାନ୍ତିପୂର୍ଣ୍ଣ ପ୍ରତିବାଦର ଅଧିକାର କିପରି ସୁରକ୍ଷିତ ରହିବ?
ତୃତୀୟ: ସୁଭଦ୍ରା ଯୋଜନା ଓ ମହିଳା ସଶକ୍ତୀକରଣର ପ୍ରଚାର କରୁଥିବା ସରକାର ନବରଙ୍ଗପୁରର ଏହି ମହିଳାମାନଙ୍କ ଦାବିର ସମାଧାନ ପାଇଁ କେବେ ବସିବେ?
ଏଠାରେ ଆଉ ଏକ ରାଜନୈତିକ ବିରୋଧାଭାସ ରହିଛି।
ବିଜେପି ବିରୋଧୀ ଦଳରେ ଥିବାବେଳେ ବିଜେଡି ସରକାରଙ୍କ ମଦ ନୀତିକୁ ପ୍ରଶ୍ନ କରୁଥିଲା। ଏବେ ନିଜେ ସରକାରରେ।
ତେବେ ମଦ ନୀତିରେ କ’ଣ ବଦଳିଲା? ମହିଳାଙ୍କ ଜୀବନରେ କ’ଣ ବଦଳିଲା?
ବିଜେଡି ଓ କଂଗ୍ରେସର ସ୍ଥାନୀୟ ନେତାମାନେ ମହିଳାଙ୍କ ଆନ୍ଦୋଳନକୁ ସମର୍ଥନ ଦେଇଛନ୍ତି। କିନ୍ତୁ ସେମାନଙ୍କୁ ମଧ୍ୟ ପ୍ରଶ୍ନ—କେବଳ ଆନ୍ଦୋଳନରେ ଯୋଗଦେବା, ନା ଏକ ସ୍ପଷ୍ଟ ମଦ ନୀତି ପାଇଁ ଲଢ଼ିବା?
ସରକାରଙ୍କ ପାଇଁ ମଦ ରାଜସ୍ୱର ଉତ୍ସ ହୋଇପାରେ। କିନ୍ତୁ ହଜାର ହଜାର ମହିଳାଙ୍କ ପାଇଁ ଏହା ପରିବାରର ସୁରକ୍ଷା ଓ ଜୀବିକାର ପ୍ରଶ୍ନ।
ମଦ ବନ୍ଦ ହେବ କି ନାହିଁ, ସେଥିରେ ନୀତିଗତ ବିତର୍କ ହୋଇପାରେ।
କିନ୍ତୁ ଅବୈଧ ମଦ କାରବାର ବନ୍ଦ କରିବା ଏବଂ ଶାନ୍ତିପୂର୍ଣ୍ଣ ଆନ୍ଦୋଳନର ଅଧିକାର ସୁରକ୍ଷିତ ରଖିବା—ଏହି ଦୁଇଟି ଦାୟିତ୍ୱରୁ ସରକାର ଓହରିପାରିବେ ନାହିଁ।
ଶେଷ ପ୍ରଶ୍ନ—ନବରଙ୍ଗପୁରର ମହିଳାମାନେ ମଦ ବିରୋଧରେ ଲଢ଼ୁଛନ୍ତି। ସରକାର ମଦ କାରବାର ବିରୋଧରେ ଲଢ଼ିବେ, ନା ପ୍ରତିବାଦକାରୀଙ୍କୁ ସାମ୍ନା କରିବାରେ ଅଧିକ ବ୍ୟସ୍ତ ରହିବେ?
