ଗୋରଖପୁର(ସତ୍ୟପାଠ ବ୍ୟୁରୋ): ଉତ୍ତରପ୍ରଦେଶରେ ପାଖେଇ ଆସୁଛି ବିଧାନସଭା ନିର୍ବାଚନ । ଏହାକୁ ଦୃଷ୍ଟିରେ ରଖି ରାଜନୈତିକ ଦଳମାନେ ନିଜ ନିଜର ପ୍ରାର୍ଥୀଙ୍କ ତାଲିକା ମଧ୍ୟ ଘୋଷଣା କରିବାରେ ଲାଗିଛନ୍ତି । ହେଲେ କଂଗ୍ରେସର ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ କିଏ ହେବ, ସେନେଇ ଅନେକ କଳ୍ପନାଜଳ୍ପନା ଚାଲିଛି । କିଛି ଦିନ ପୂର୍ବରୁ ପ୍ରିୟଙ୍କା ଗାନ୍ଧୀ ମୁଖ୍ୟମନ୍ତ୍ରୀ ପ୍ରାର୍ଥୀ ପାଇଁ ନିଜ ଆଡ଼କୁ ଇସାରା ଦେଇଥିଲେ । କିନ୍ତୁ ପରେ ସେ ପ୍ରାର୍ଥୀ ନୁହନ୍ତି ବୋଲି ସ୍ପଷ୍ଟ କରିଥିଲେ । ଏହା ମଧ୍ୟରେ କଂଗ୍ରେସର ବରିଷ୍ଠ ନେତା ପ୍ରମୋଦ ତିୱାରୀ ପ୍ରିୟଙ୍କାକୁ ନେଇ ଏକ ବଡ଼ ବିବୃତ୍ତି ଦେଇଛନ୍ତି । ତେବେ ପ୍ରିୟଙ୍କା ଗାନ୍ଧୀଙ୍କ ନେତୃତ୍ୱରେ କଂଗ୍ରେସ ଏହାର ନୀତି ଆଧାରରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ କିନ୍ତୁ ପ୍ରିୟଙ୍କା ମୁଖ୍ୟମନ୍ତ୍ରୀ ପ୍ରାର୍ଥୀ ନୁହଁନ୍ତି। ନିର୍ବାଚନ ପରେ ବିଧାନସଭା ଦଳର ନେତା ଚୟନ କରାଯିବ, ଯିଏ ସୋନିଆ ଗାନ୍ଧୀ, ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀଙ୍କ ଆଶୀର୍ବାଦ ପାଇବେ ଏବଂ ବିଧାୟକ ଯାହାକୁ ଚାହାଁନ୍ତି କଂଗ୍ରେସ ବିଧାନସଭା ଦଳର ନେତା ଭାବରେ ସେ ନିର୍ବାଚିତ ହେବେ ବୋଲି ପ୍ରମୋଦ ତିୱାରୀ କହିଛନ୍ତି ।
ଅନ୍ୟପଟେ ୟୁପିରେ ଥିବା ୪୦୩ ଟି ଆସନ ପାଇଁ କଂଗ୍ରେସ ପ୍ରାର୍ଥୀଙ୍କ ତାଲିକା ପ୍ରସ୍ତୁତ, ଦଳ ଏହାର ଅନ୍ତିମ ତାଲିକା ପ୍ରସ୍ତୁତ କରିଛି, ଅଧିକାଂଶ ଆସନ ପାଇଁ ପ୍ରାର୍ଥୀ ଘୋଷଣା କରାଯାଇଛି। ଆସନ୍ତାକାଲି ସୁଦ୍ଧା ଅବଶିଷ୍ଟ ଆସନ ପାଇଁ ପ୍ରାର୍ଥୀଙ୍କ ନାମ ପ୍ରକାଶ ପାଇବ। ଯେଉଁ ପ୍ରାର୍ଥୀଙ୍କ ନାମ କଂଗ୍ରେସ ଘୋଷଣା କରିଛି ସେମାନଙ୍କ ଉପରେ କୌଣସି ପରିବର୍ତ୍ତନ କରାଯିବ ନାହିଁ। ଏହା ସହିତ ପ୍ରମୋଦ ତିୱାରୀ ମଧ୍ୟ ବିଜେପି ଉପରେ ଆକ୍ରମଣ କରିଥିଲେ। ସେ ଦାବି କରିଛନ୍ତି ଯେ ବିଜେପି ଏଥର ମଧ୍ୟ ରାଜ୍ୟରେ ୧୦୦ ଟି ଆସନ ପାଇବ ନାହିଁ। ମହିଳା ଓ ଯୁବ ଭୋଟରମାନେ ବିଜେପି ଉପରେ ଅତ୍ୟଧିକ ରାଗିଛନ୍ତି ଏବଂ ସେମାନେ ଆଶା କରି ପ୍ରିୟଙ୍କା ଗାନ୍ଧୀ ଆଡକୁ ଚାହିଁ ରହିଛନ୍ତି। ବିଜେପିର ଅହଂକାର ତାଙ୍କୁ ବୁଡ଼ାଇ ଦେବ। କଂଗ୍ରେସ ଦଳ ଏଥର ସରକାର ଗଠନ କରିବ। ଅଧା ଜନସଂଖ୍ୟା ଏବଂ ଯୁବ ଭୋଟରଙ୍କ ସାହାଯ୍ୟରେ କଂଗ୍ରେସ ଜିତିବ ବୋଲି କଂଗ୍ରେସର ବରିଷ୍ଠ ନେତା ପ୍ରମୋଦ ତିୱାରୀ କହିଛନ୍ତି ।
