ଆସିକା : ଭିଜିଲାନ୍ସ ଜାଲରେ ଛନ୍ଦି ହେଲେ ବିଇଓ ଅଫିସର କିରାଣୀ। ଲାଞ୍ଚ ନେବା ବେଳେ ମାଡି ବସିଲେ ଭିଜିଲାନ୍ସ ଅଧିକାରୀ । ୫ ହଜାର ଟଙ୍କା ଲାଞ୍ଚ ନେବା ବେଳେ ଗଞ୍ଜାମ ଜିଲ୍ଲା ଆସିକା ବସ୍ଷ୍ଟାଣ୍ଡଠାରେ ବିଇଓ ଅଫିସର କିରାଣୀ ମନୋଜ ପ୍ରଧାନଙ୍କୁ ମାଡ଼ି ବସିଲା ଭିଜିଲାନ୍ସ।
ଭିଜିଲାନ୍ସ ତାଙ୍କ ପାଖରୁ ୫ହଜାର ଟଙ୍କା ଜବତ କରିବା ସହ ତାଙ୍କୁ ଗରିଫ କରିଛି।
ମନୋଜ ଅବସରପ୍ରାପ୍ତ ଶିକ୍ଷକ ନବଘନ ଗୌଡ଼ଙ୍କ ଇନ୍କ୍ରିମେଣ୍ଟ ପ୍ରାପ୍ୟ ବାବଦ କାଗଜପତ୍ର ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ପଠାଇବା ଲାଗି ୫୦୦୦ ଟଙ୍କା ଲାଞ୍ଚ ମାଗିଥିଲେ। ଲାଞ୍ଚ ଦେବା ପାଇଁ ରାଜି ହୋଇ ନବଘନ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ମନୋଜ ନବଘନଙ୍କୁ ଲାଞ୍ଚ ଟଙ୍କା ଆସିକା ବସ୍ ଷ୍ଟାଣ୍ଡ ନିକଟରେ ଦେବାକୁ କହିଥିଲେ।
ଯୋଜନା ମୁତାବକ ଭିଜିଲାନ୍ସ କର୍ମଚାରୀ ଆସିକା ବସ୍ ଷ୍ଟାଣ୍ଡ ନିକଟରେ ଛକି ରହିଥିଲେ। ବସ୍ଷ୍ଟାଣ୍ଡରେ ନବଘନଙ୍କଠାରୁ ମନୋଜ ଲାଞ୍ଚ ଟଙ୍କା ନେବାବେଳେ ଭିଜିଲାନ୍ସ ହାତରେ ଧରାପଡ଼ିଥିଲେ। ପରେ ଭିଜିଲାନ୍ସ କର୍ମଚାରୀ ଆସିକା ବିଇଓ ଅଫିସ ଓ ବାଣୀବିହାରରେ ରହୁଥିବା ଶ୍ୱଶୁର ଘରେ ଚଢ଼ାଉ କରିଥିଲେ।
ନବଘନ ୩୦ ଏପ୍ରିଲ ୨୦୨୨ରେ ଅବସର ନେଇଥିଲେ। କିନ୍ତୁ ତାଙ୍କର ୨୦୧୯ ସେପ୍ଟେମ୍ବରର ଇନ୍କ୍ରିମେଣ୍ଟ ପ୍ରାପ୍ୟ ବାବଦ କାଗଜପତ୍ର ଡିଇଓଙ୍କ ନିକଟକୁ ଯାଇପାରିନଥିଲା ଏଥିପାଇଁ ନବଘନ ବାରମ୍ବାର ଅଫିସ୍ ଦୌଡ଼ି ଦୌଡ଼ି ନୟାନ୍ତ ହୋଇଥିଲେ।ଶେଷରେ ଲାଞ୍ଚ ଦେବା ପାଇଁ ରାଜି ହୋଇ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ ।
