(ସତ୍ୟପାଠ ବ୍ୟୁରୋ) ଭୁବନେଶ୍ବର : ଭାରତ ସରକାରଙ୍କ ନୂଆ ଆଇଟି ନିୟମକୁ ନେଇ ଚର୍ଚ୍ଚା ଥମିବାର ନାଁ ଧରୁନି। ଚଳିତ ବର୍ଷ ଫେବୃଆରୀରେ ଭାରତ ସରକାର ନୂତନ ଆଇଟି ଆକ୍ଟକୁ ଅନୁମୋଦନ କରିଛନ୍ତି। ଏବଂ ୨୬ ମେ ୨୦୨୧ ରୁ ନିୟମ କାର୍ଯ୍ୟକାରୀ ହୋଇଛି। ନୂତନ ଆଇଟି ଆଇନ ଉପରେ ସୋସିଆଲ ମିଡିଆ ଏବଂ ଟେକ୍ କମ୍ପାନୀଗୁଡିକ ଆପତ୍ତି ଉଠାଇଥିବା ବେଳେ ଏବେ ବମ୍ବେ ହାଇକୋର୍ଟ ନୂତନ ଆଇଟି ନିୟମକୁ ନେଇ କେନ୍ଦ୍ର ସରକାରଙ୍କୁ ତାଗିଦ୍ କରିଛନ୍ତି। ହାଇକୋର୍ଟ କେନ୍ଦ୍ର ସରକାରଙ୍କୁ ପଚାରିଛନ୍ତି ଯେ ୨୦୦୯ ରେ ଲାଗୁ ହୋଇଥିବା ଆଇଟି ଆକ୍ଟକୁ ପରିବର୍ତ୍ତନ ନକରି କାହିଁକି ଆଇଟି ଆକ୍ଟ ୨୦୨୧ ଲାଗୁ ହେଲା ?
ସାମ୍ବାଦିକ ନିଖିଲ ୱାଗଲ୍ ଏବଂ ଲିଫଲେଟ୍ ନାମକ ଏକ ୱେବସାଇଟ୍ ନୂତନ ଆଇଟି ଅଧିନିୟମରେ ଅନ୍ତରୀଣ ରୋକ ଲଗାଇବା ପାଇଁ ବମ୍ବେ ହାଇକୋର୍ଟରେ ଏକ ଆବେଦନ କରିଥିଲେ, ଯାହାର ଶୁଣାଣି ପରେ ପ୍ରଧାନ ବିଚାରପତି ଦୀପଙ୍କର୍ ଦତ୍ତା ଏବଂ ଜଷ୍ଟିସ୍ ଜିଏସ୍ କୁଲକର୍ଣ୍ଣିଙ୍କ ବେଞ୍ଚ ଏହି ଆବେଦନ ଉପରେ ରାୟ ସଂରକ୍ଷିତ ରଖିଛନ୍ତି।
ଅଭିଯୋଗକାରୀଙ୍କ ପିଟିସନରେ କୁହାଯାଇଛି ଯେ ନୂତନ ଆଇଟି ଆକ୍ଟର ବ୍ୟବସ୍ଥା ଅଭିବ୍ୟକ୍ତିର ସ୍ବତନ୍ତ୍ରତାକୁ ଅତିକ୍ରମ କରିଛି । ନୂତନ ଆଇଟି ନିୟମ ସମ୍ବିଧାନର ଧାରା 19 (2) କୁ ଉଲ୍ଲଂଘନ କରୁଛି। ଲିଫଲେଟର ଆଡଭୋକେଟ୍ ଡାରିୟସ୍ ଖମ୍ବାଟା ତୁରନ୍ତ ଆଇଟି ଆକ୍ଟ ଉପରେ ରୋକ ଲଗାଇବାକୁ ଅନୁରୋଧ କରିଛନ୍ତି। ଖମ୍ବାଟା କହିଛନ୍ତି ଯେ ଇତିହାସରେ ଏହା ପ୍ରଥମ ଥର ଯେ କୌଣସି କଣ୍ଟେଣ୍ଟ ଉପରେ ଖୋଲା ପ୍ରତିବନ୍ଧକ ଲଗାଯାଉଛି।
ନୂତନ ଆଇଟି ନିୟମ ପ୍ରେସ୍ କାଉନସିଲ୍ ଗଣମାଧ୍ୟମ ପାଇଁ ମଧ୍ୟ ପ୍ରଯୁଜ୍ୟ। ଏପଟେ କେନ୍ଦ୍ର ସରକାରଙ୍କ ପକ୍ଷରୁ ହାଜର ହୋଇଥିବା ଅତିରିକ୍ତ ସଲିସିଟର ଜେନେରାଲ ଅନିଲ ସିଂ କହିଛନ୍ତି ଯେ ସାମ୍ବାଦିକମାନଙ୍କ ପାଇଁ ପ୍ରେସ କାଉନସିଲ ଅଫ୍ ଇଣ୍ଡିଆ (ପିସିଆଇ) ମଧ୍ୟ ଆଚରଣ ବିଧି ନିର୍ଦେଶନାମା ଜାରି କରିଛି। କୋର୍ଟ ଏହା ମଧ୍ୟ କହିଛନ୍ତି ଯେ ପ୍ରେସ କାଉନସିଲ ଅଫ୍ ଇଣ୍ଡିଆର ନିର୍ଦ୍ଦେଶାବଳୀରେ ନିୟମ ଉଲ୍ଲଂଘନ କଲେ କୌଣସି କଠୋର ଦଣ୍ଡ ଦେବାର ପ୍ରାବଧାନ ନାହିଁ ।
ସୂଚନାଯୋଗ୍ୟ ଯେ ନୂତନ ଆଇଟି ନିୟମ ଆସିବା ପରଠାରୁ ସୋସିଆଲ ମିଡିଆ କମ୍ପାନୀଗୁଡିକ ଏହା ଉପରେ ଆପତ୍ତି ଉଠାଇଥିଲେ। ଏହାପୂର୍ବରୁ କେନ୍ଦ୍ରର ନୂଆ ନିୟମକୁ ବିରୋଧ କରି ହ୍ୱାଟସଆପ୍ ମେ ୨୫ରେ ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲା। ଏହି ଆବେଦନ ଜରିଆରେ ହ୍ୱାଟସଆପ୍ କହିଥିଲା ଯେ ନୂଆ ନିୟମ ଦ୍ୱାରା ୟୁଜରଙ୍କ ଗୋପନୀୟତା ପ୍ରଭାବିତ ହେବ।
