ଭୁବନେଶ୍ୱର,୧୮/୨(ସତ୍ୟପାଠ ବ୍ୟୁରୋ): ବର୍ଡର-ଗାଭାସ୍କର ଟ୍ରଫିର ଦ୍ବିତୀୟ ଟେଷ୍ଟ ମ୍ୟାଚ୍ରେ ଭାରତୀୟ ବୋଲର ରବିଚନ୍ଦ୍ରନ ଅଶ୍ବିନ୍ ଓ ଅକ୍ଷର ପଟେଲ ଚମକିଛନ୍ତି। ଅଷ୍ଟମ ୱିକେଟ୍ରେ ଅଶ୍ବିନ ଓ ଅକ୍ଷର ଶତକୀୟ ଭାଗିଦାରୀ ହୋଇପାରିଛନ୍ତି। ଭାରତ ନିଜର ପ୍ରଥମ ଇନିଂସରେ ୨୬୨ ରନ୍ ସଂଗ୍ରହ କରି ସମସ୍ତ ୱିକେଟ୍ ହରାଇଛି। ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଜାରି ଥିବା ଏହି ମ୍ୟାଚର ଦ୍ବିତୀୟ ଦିନର ଖେଳ ଶେଷ ସୁଦ୍ଧା ଭାରତ ପ୍ରଥମ ପାଳି ଆଧାରରେ ଅଷ୍ଟ୍ରେଲିଆ ଠାରୁ ୧ ରନ୍ ପଛରେ ରହିଛି।
ପ୍ରଥମ ପାଳିରେ ଅକ୍ଷର ପଟେଲ ଅର୍ଦ୍ଧଶତକ ହାସଲ କରିଥିଲେ। ସେ ୧୧୫ଟି ବଲ୍ ଖେଳି ବ୍ୟକ୍ତିଗତ ଭାବେ ୭୪ ରନ୍ ସଂଗ୍ରହ କରିଥିଲେ। ଏଥିରେ ୯ଟି ଚୌକା ଓ ୩ଟି ଛକା ସାମିଲ ଥିଲା। ଅକ୍ଷର ପଟେଲ ଅଷ୍ଟମ ୱିକେଟ୍ରେ ରବିଚନ୍ଦ୍ରନ ଅଶ୍ବିନ (୩୭ ରନ୍)ଙ୍କ ସହିତ ୧୧୪ ରନ୍ର ଭାଗିଦାରୀ ହୋଇପାରିଥିଲେ। ପ୍ରଥମ ପାଳିରେ ଭାରତ ପାଇଁ ବିରାଟ କୋହଲ ୪୪ ରନ୍, ଅଧିନାୟକ ରୋହିତ ଶର୍ମା ୩୨ ରନ୍, ରବୀନ୍ଦ୍ର ଜାଦେଜା ୨୬ ରନ୍ ଓ କେଏଲ୍ ରାହୁଲ ୧୭ ରନ୍ ସଂଗ୍ରହ କରିଥିଲେ। ଶ୍ରେୟସ ଆୟର ଓ ଶ୍ରୀକର ଭରତଙ୍କ ବ୍ୟାଟରୁ ଯଥାକ୍ରମେ ୪ ଓ ୬ ରନ୍ ଲେଖାଏଁ ଯୋଡ଼ିଥିଲେ। ଅଷ୍ଟ୍ରେଲିଆ ପକ୍ଷରୁ ନାଥାନ ଲାୟନ ସର୍ବାଧିକ ୫ଟି ୱିକେଟ୍ ନେଇଛନ୍ତି। ଏମ୍ କୁହମାନ୍ ଓ ଟି ମୁର୍ଫିଙ୍କୁ ୨ଟି ଲେଖାଏଁ ୱିକେଟ୍ ମିଳିଥିଲା ବେଳେ ପେଟ୍ କମିନ୍ସଙ୍କୁ ଗୋଟିଏ ୱିକେଟ୍ ମିଳିଥିଲା।
ଟସ୍ ଜିତି ପ୍ରଥମେ ବ୍ୟାଟିଂ ନେଇଥିବା ଅଷ୍ଟ୍ରେଲିଆ ଶୁକ୍ରବାର ପ୍ରଥମ ଦିନରେ ୨୬୩ ରନ୍ ସଂଗ୍ରହ କରି ଅଲ୍ଆଉଟ୍ ହୋଇଥିଲା। ପ୍ରଥମ ଦିନରେ ମହମ୍ମଦ ସାମି ଯଦିଓ ୪ ୱିକେଟ୍ ଦଖଲ କରିଥିଲେ, କିନ୍ତୁ ରବିଚନ୍ଦ୍ରନ ଅଶ୍ବିନ ଅଧିକ ଘାତକ ସାବ୍ୟସ୍ତ ହୋଇଥିଲେ। ୨୧ ଓଭର ବୋଲିଂ କରି ୨.୭୧ ଇକୋନୋମିରେ ୩ ୱିକେଟ୍ ଦଖଲ କରିବା ସହ ବ୍ୟାଟରଙ୍କୁ ବାନ୍ଧି ରଖିବାରେ ସଫଳ ହୋଇଥିଲେ। ରବୀନ୍ଦ୍ର ଜାଦେଜା ମଧ୍ୟ ୩ ୱିକେଟ୍ ନେଇଥିଲେ ବି ବ୍ୟାଟରଙ୍କୁ ନିୟନ୍ତ୍ରଣରେ ରଖିପାରିନଥିଲେ। ସେ ମଧ୍ୟ ସମାନ ସଂଖ୍ୟକ ଓଭର ବୋଲିଂ କରିଥିଲେ ହେଁ ୩.୨୩ ଇକୋନୋମିରେ ୬୮ ରନ୍ ବ୍ୟୟ କରିଥିଲେ।
