ନୂଆଦିଲ୍ଲୀ: ରାଜଧାନୀ ଦିଲ୍ଲୀ ରୁ ଗିରଫ ହୋଇଛନ୍ତି ଜଣେ ଚୀନ ମହିଳା । ନକଲି ପରିଚୟ ଏବଂ ଦେଶ ବିରୋଧୀ କାର୍ଯ୍ୟକଳାପରେ ସମ୍ପୃକ୍ତି ଥିବା ଅଭିଯୋଗରେ ଦିଲ୍ଲୀ ପୋଲିସ ଗିରଫ କରିଛି । ତେବେ ଗିରଫ ମହିଳା ଜଣଙ୍କ ହେଉଛନ୍ତି କାଇ ରୁଓ । ତାଙ୍କ ଘର ଚୀନର ହାଇନାନ ପ୍ରୋଭିନ୍ସରରେ ହୋଇଥିବା ଜଣାପଡିଛି । ମଞ୍ଜୁକା ଟିଲାରୁ ଦିଲ୍ଲୀ ପୋଲିସ ତାଙ୍କୁ ଗିରଫ କରିଛି ।
ମହିଳା ଜଣକ ଏଠାରେ ଜଣେ ବୌଦ୍ଧ ସନ୍ନ୍ୟାସିନୀ ଭାବେ ରହି ଆସୁଥିଲେ । ପୋଲିସ ତାଙ୍କ ପରିଚୟ ପତ୍ର ଯାଞ୍ଚ କରିବା ପରେ ସେ ତାଙ୍କ ନାମ ଡୋଲମା ଲାମା ନାମ ରଖି ନକଲି ପରିଚୟ ଦେଇ ରହୁଥିଲେ । ନିଜକୁ ନେପାଳି ବୋଲି ପରିଚୟ ଦେଇ ଦିଲ୍ଲୀରେ ରହି ଆସୁଥିଲେ ମହିଳା ଜଣକ । ଦିଲ୍ଲୀ ବିଶ୍ବବିଦ୍ୟାଳୟ ନର୍ଥ କ୍ୟାମ୍ପସ ନିକଟରେ ତିବତ୍ତୀୟ ଶରଣାର୍ଥୀ କଲୋନୀ ନିକଟରେ ରହୁଥିଲେ । ବରିଷ୍ଠ ପୋଲିସ ଅଧିକାରୀ କହିଛନ୍ତି, 2019ରୁ ମହିଳା ଜଣକ ଏହିଠାରେ ରହି ଆସୁଛନ୍ତି । ଏହି ଅଞ୍ଚଳ ବୁଦ୍ଧ ଶରଣାର୍ଥୀଙ୍କ ପାଇଁ ବହୁତ ଲୋକପ୍ରିୟ । ଏଠାରେ ବହୁତ ସଂଖ୍ୟାରେ ବୁଦ୍ଧ ଶରଣାର୍ଥୀ ରୁହନ୍ତି । ଯାହାର ସୁଯୋଗ ନେଇ ଚୀନ ମହିଳା ଜଣକ ତାଙ୍କ ପରିଚୟ ବଦଳାଇ ଏଠାରେ ରହି ଆସୁଥିଲେ । ବୌଦ୍ଧ ଭିକ୍ଷୁଙ୍କ ଭଳି ବସବାସ କରିବା ସହ ଗାଢ ଲାଲ ରଙ୍ଗର ବସ୍ତ୍ର ପରିଧାନ କରୁଥିଲେ ।
୨୦୧୯ରେ ସେ ଜଣେ ଭାରତକୁ ଆସିଥିଲେ । ମହିଳାଙ୍କୁ ପଚରାଉଚରା କରାଯିବା ପରେ ସେ କହିଛନ୍ତି କି, ତାଙ୍କୁ ଚୀନର କମ୍ୟୁନିଷ୍ଟ ପାର୍ଟିର କିଛି ନେତା ମାରିବାକୁ ଚାହୁଁଥିଲେ । ଏଥିପାଇଁ ସେ ତାଙ୍କ ଜୀବନ ବଞ୍ଚାଇ ଭାରତ ଆସିଥିଲେ ଏବଂ ଦୁଇବର୍ଷ ହେବ ଭାରତରେ ରହି ଆସୁଛନ୍ତି । ମହିଳାଙ୍କୁ ଇଂରାଜୀ, ମଦାରିନ ସହ ନେପାଳୀ ଭାଷା ଜଣାଅଛି ।
ଘଟଣା ଜଣାପଡିବା ପରେ ମହିଳାଙ୍କୁ ଗିରଫ କରି ପୋଲିସ ତଦନ୍ତ ଆରମ୍ଭ କରିଛି । ଇଣ୍ଡିଆନ୍ ପେନାଲ୍ କୋଡ୍ ଆଣ୍ଡ୍ ଫରେନ୍ ଆକ୍ଟ ଧାରା ୧୨୦ ବି, ୪୧୯, ୪୨୦, ୪୬୭ ଏବଂ ତାଙ୍କ ନାମରେ ମାମଲା ରୁଜୁ କରାଯାଇଛି । ମହିଳା ଜଣଙ୍କ ଏତେ ଦିନ ଭିତରେ ଭାରତର କିଛି ଗୁପ୍ତ ସୂଚନା ଚୀନକୁ ଦେଇଛନ୍ତି କି ନାହିଁ ତାର ତଦନ୍ତ ଚଳାଇଛି ପୋଲିସ ।
