ଭୁବନେଶ୍ୱର,୧୬/୫(ସତ୍ୟପାଠ ବ୍ୟୁରୋ): ନିର୍ବାଚନ ଆଦର୍ଶ ଆଚରଣକୁ ଖୋଲା ଉଲ୍ଲଘଂନ କରି ଓଡ଼ିଶା ସରକାରଙ୍କ ଇନଷ୍ଟାଗ୍ରାମ ଆକାଉଣ୍ଟକୁ ବିଜେଡିର ପ୍ରଚାର ପାଇଁ ଉପଯୋଗ କରାଯାଉଛି । ବିଜେଡି ନେତା ଭୈରବ କାର୍ତ୍ତିକ ପାଣ୍ଡିଆନଙ୍କ ବୟାନର ଏକ ଭିଡିଓକୁ ରାଜ୍ୟ ସରକାରଙ୍କ ଇନଷ୍ଟାଗ୍ରାମରେ ପ୍ରସାରଣ କରାଯିବା ଆଦର୍ଶ ଆଚରଣ ବିଧିର ଉଲ୍ଲଘଂନ ଦର୍ଶାଇ ଆଜି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛି ବିଜେପି। ଏହାସହିତ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଦଳ ଦାବି କରିଛି ।
ରାଜ୍ୟ ବିଜେପି ମୁଖପାତ୍ର ସଜ୍ଜନ ଶର୍ମାଙ୍କ ନେତୃତ୍ୱରେ ଏକ ପ୍ରତିନିଧିମଣ୍ଡଳୀ ଆଜି ରାଜ୍ୟ ନିର୍ବାଚନ ଅଧିକାରୀଙ୍କୁ ଭେଟି ରାଜ୍ୟ ସରକାରଙ୍କ ଇନଷ୍ଟାଗ୍ରାମ ଓ ପୋର୍ଟାଲକୁ ବିଜେଡି ନେତାମାନେ ଅପବ୍ୟବହାର କରୁଥିବା ନେଇ ଅଭିଯୋଗ କରିଛନ୍ତି । ନିର୍ବାଚନ ଆଦର୍ଶ ଆଚରଣ ବିଧି ବଳବତ୍ତର ଥିବା ସତ୍ତ୍ୱେ ବିଜେଡି ନେତାମାନଙ୍କ ଏଭଳି କାର୍ଯ୍ୟକଳାପ ଓଡ଼ିଶାରେ ଅଫିସରମାନଙ୍କ ଶାସନ ଚାଲିଛି ବୋଲି ପ୍ରମାଣିତ ହେଉଛି । ବିଜେଡିର ନେତାମାନେ ସରକାରୀ ପୋର୍ଟାଲ ଓ ସରକାରୀ ଇନଷ୍ଟାଗ୍ରାମରେ ପ୍ରଚାର ପ୍ରସାର କରିବା ନିର୍ବାଚନ ଆଚରଣ ବିରୋଧୀ । ତୁରନ୍ତ ଏହି ପ୍ରଚାରକୁ ବନ୍ଦ କରିବା ସହ ଭିକେ ପାଣ୍ଡିଆନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଜେପି ଦାବି କରିଛି ।
କିଛି ମୁଷ୍ଟିମେୟ ସରକାରୀ ଅଧିକାରୀମାନେ ନିଜ କାର୍ଯ୍ୟ ଛାଡ଼ି ବିଜେଡି ପାଇଁ ପ୍ରଚାର କରୁଛନ୍ତି ବୋଲି ବିଜେପି ଅଭିଯୋଗ କରିଛି । କେନ୍ଦ୍ରାପଡ଼ା ଜିଲ୍ଲା ମାର୍ଶାଘାଇ ବ୍ଲକର ଏବିଇଓ ସୁଶାନ୍ତ କୁମାର ବେଉରା ବିଜେଡି ସଭାପତି ସଞ୍ଜୟ କୁମାର ଲେଙ୍କା ଓ ଅନ୍ୟ ବିଜେଡି ନେତାଙ୍କ ସହ ମିଶି ବିଜୁ ଜନତା ଦଳ ପାଇଁ କାର୍ଯ୍ୟ କରୁଛନ୍ତି । ସେହିପରି ମହାକାଳପଡ଼ା ବିଧାୟକ ପ୍ରାର୍ଥୀ ଅତନୁ ସବ୍ୟସାଚୀ ନାୟକଙ୍କ ପାଇଁ ଖୁଲମଖୁଲା ନିର୍ବାଚନ ପ୍ରଚାର କରୁଛନ୍ତି ମହାକାଳପଡ଼ା ବ୍ଲକ ଶିଲିପୁରସ୍ଥିତ ମା\’ ତାରିଣୀ ମହାବିଦ୍ୟାଳୟର କ୍ରୀଡ଼ା ଶିକ୍ଷକ ଗଙ୍ଗାଧର ଦାସ । ଯାହାର ଫଟୋ ଓ ଭିଡିଓ ପ୍ରମାଣ ନିର୍ବାଚନ ଆୟୋଗଙ୍କୁ ଦିଆଯାଇଛି । ଏନେଇ ଉଭୟ ଅଧିକାରୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ବିଜେପି ଦାବି କରିଛି ।
ଏହି ପ୍ରତିନିଧିମଣ୍ଡଳୀରେ ବିଜେପି ନେତ୍ରୀ କସ୍ତୁରୀ ମିଶ୍ର, ଦିଲୀପ ମଲ୍ଲିକ, ଜୟନ୍ତ ଜେନା ଓ ପ୍ରେମଲତା କର ପ୍ରମୁଖ ଉପସ୍ଥିତ ଥିଲେ ।
