ଭୁବନେଶ୍ୱର,୩୦/୪(ସତ୍ୟପାଠ ବ୍ୟୁରୋ): ଉତ୍ତରପ୍ରଦେଶର ଦୁଇଟି ହାଇ ପ୍ରୋଫାଇଲ୍ ଆସନ, ରାୟବରେଲି ଏବଂ ଆମେଠୀ ଉପରେ ଜାରି ରହିଛି ସସପେନ୍ସ। ଦୀର୍ଘଦିନ ଧରି ଏହି ଦୁଇ ଆସନ କଙ୍ଗ୍ରେଆର ଗଡ଼ ହୋଇ ରହି ଆସିଛି | ଏଥର ରାୟବରେଲି ଆସନରୁ ସୋନିଆ ଗାନ୍ଧୀ ପ୍ରତିଦ୍ୱନ୍ଦିତା କରିବା ନାହିଁ | ସେ ରାଜସ୍ଥାନରୁ ରାଜ୍ୟସଭାକୁ ମନୋନୀତ ହୋଇ ସାରିଛନ୍ତି | ଏଭଳି ସ୍ଥିତିରେ ତାଙ୍କର ପାରମ୍ପରିକ ରାୟବରେଲି ଆସନରୁ ତାଙ୍କ ଝିଅ ପ୍ରିୟଙ୍କା ଗାନ୍ଧୀ ନିର୍ବାଚନ ଅଲଢିବେ ବୋଲି ଚର୍ଚ୍ଚା ହେଉଥିଲା | ହେଲେ ବିଶେଷ ସୂତ୍ରରୁ ମିଳିଥିବା ଖବର ଅନୁଯାୟୀ, ପ୍ରିୟଙ୍କା ଗାନ୍ଧୀ ଚଳିତ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ନାହିଁ। ସେ କେବଳ ପ୍ରଚାର କରିବେ।
ସେପଟେ ରାହୁଲ ଗାନ୍ଧୀ ଆମେଠୀ କିମ୍ବା ରାୟବରେଲିରୁ ନିର୍ବାଚନ ଲଢ଼ିବା ନେଇ ଏବେ ବି ପରଦା ଉଠିପାରିନାହଁ । ତେବେ ଆସନ୍ତାକାଲି ଏହାର ନିଷ୍ପତି ଆସିପାରେ। ଏହା ପୂର୍ବରୁ କୁହାଯାଉଥିଲା ଯେ ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀ ଆମେଠୀ ଏବଂ ରାୟବରେଲି ଆସନରୁ ପ୍ରତିଦ୍ୱନ୍ଦ୍ୱିତା କରିବେ।
ସୂଚନାଯୋଗ୍ୟ, ୨୦୧୯ ନିର୍ବାଚନରେ ରାହୁଲ ଗାନ୍ଧୀଙ୍କୁ ଆମେଠୀ ଆସନରୁ ପରାଜୟର ସାମ୍ନା କରିବାକୁ ପଡିଥିଲା। ନିର୍ବାଚନରେ ସେ ମୋଦୀ ସରକାରଙ୍କ ମନ୍ତ୍ରୀ ସ୍ମୃତି ଇରାନୀଙ୍କ ଦ୍ୱାରା ପରାସ୍ତ ହୋଇଥିଲେ। ତେବେ ୱାୟାନାଡ ଆସନରୁ ନିର୍ବାଚନ ଜିତିବା ପରେ ସେ ସଂସଦରେ ହୋଇଥିଲେ। କଂଗ୍ରେସର ଗଡ଼ ବୋଲି କୁହାଯାଉଥିବା ଆମେଠୀ ଲୋକସଭା ନିର୍ବାଚନମଣ୍ଡଳୀରେ ୫ ଟି ବିଧାନସଭା ଆସନ ରହିଛି। ୨୦୨୨ ନିର୍ବାଚନରେ ସମାଜବାଦୀ ପାର୍ଟି ଆମେଠୀ ଏବଂ ଗୌରୀଗଞ୍ଜରୁ ଦୁଇଜଣ ବିଧାୟକ ଜିତିଥିବା ବେଳେ ସାମାନ୍ୟ ଭୋଟରେ ସାଲୁନ୍ ଆସନରେ ପରାଜିତ ହୋଇଥିଲେ। ତେବେ ଆମେଠୀରେ ତିନିଜଣ ବିଧାୟକ ପାଇବାରେ ବିଜେପି ସଫଳ ହୋଇଥିଲା।
