ନୂଆଦିଲ୍ଲୀ: ରୁଷ ଓ ୟୁକ୍ରେନ୍ ମଧ୍ୟରେ ଚାଲିଛି ଯୁଦ୍ଧ | ରୁଷ ଲଗାତାର ଭାବେ ୟୁକ୍ରେନ ଉପରକୁ ଆକ୍ରମଣ କରି ଚାଲିଥିବା ବେଳେ, ଯାହାକୁ ବିରୋଧ କରିଛନ୍ତି ୟୁରୋପୀୟ ଦେଶ | ରୁଷକୁ ଏକଘରିଆ କରିବା ପାଇଁ ଉଦ୍ୟମ କରିଛନ୍ତି । ଏଥିପାଇଁ ରୁଷ ଉପରେ ଆର୍ଥିକ କଟକଣା ଲଗାଇଛନ୍ତି | ତେବେ ଏହାରି ଭିତରେ ରୁଷ ନିଜ ଜିଦ ରେ ଅଟଳ ଥିବା ବେଳେ, କଟକଣା ମଧ୍ୟ ରୁଷ ଉପରେ ବଳବତ୍ତର ରହିଛି | ତେବେ ତମାମ କଟକଣା ସତ୍ତ୍ୱେ ନିଜ ଆର୍ଥିକ ସ୍ଥିତିକୁ ମଜଭୁତ କରିବାକୁ ଉଦ୍ୟମ କରିଛି ରୁଷ । ଏଥିପାଇଁ ବନ୍ଧୁ ରାଷ୍ଟ୍ର ଭାରତକୁ ରିହାତି ଦରରେ ତେଲ ଯୋଗାଇ ଦେବାକୁ ଅଫର ଦେଇଛି। ଅନ୍ତର୍ଜାତୀୟ ଚାପ ସତ୍ତ୍ୱେ ଭାରତକୁ ସିଧାସଳଖ ତେଲ ଯୋଗେଇବାକୁ ରୁଷ ଅଫର ଦେଇଛି। ଅନ୍ତଜାର୍ତୀୟ ବଜାରରେ ବ୍ୟାରେଲ ପିଛା ୩୫ ଡଲାର କମ୍ରେ ତେଲ ଯୋଗାଇବ ରୁଷ । ଚଳିତ ବର୍ଷ ଚୁକ୍ତି ଅନୁଯାୟୀ, ଭାରତକୁ ରୁଷ ୧୫ ମିଲିଅନ୍ ବ୍ୟାରେଲ ତେଲ ରପ୍ତାନୀ କରିବା। ଏନେଇ ବିଶେଷ ସୂତ୍ରରୁ ସୂଚନା ମିଳିଛି।
ବିଦେଶରୁ ସର୍ବାଧିକ ତୈଳ ଆମଦାନୀରେ ଏସିଆ ମହାଦେଶର ଦ୍ୱିତୀୟ ଦେଶ ହେଉଛି ଭାରତ। ୟୁକ୍ରେନ୍ ଉପରେ ଆକ୍ରମଣ ପରଠାରୁ ରୁଷ ଉପରେ ଆମେରିକା ସମେତ ୟୁରୋପର ଏକାଧିକ ଦେଶ ଆର୍ଥିକ କଟକଣା ଜାରି କରିଛନ୍ତି। ଫଳରେ ଏହି ଦେଶମାନଙ୍କ ସହ ରୁଷ ମଧ୍ୟରେ ବ୍ୟବସାୟିକ ନେଣ-ଦେଣ ବନ୍ଦ ରହିଛି। ଏବେ କେବଳ ଚୀନ ଏବଂ ଭାରତ ରୁଷ ଠାରୁ ତୈଳ ଆମଦାନୀ କରୁଛନ୍ତି । ସେହିପରି ଭାରତ ସହ ଆର୍ଥିକ ନେଣଦେଣକୁ ରୁଷ ଆହୁରି ସରଳୀକରଣ କରିବ ବୋଲି ପ୍ରସ୍ତାବ ଦେଇଛି। ଏହିପରିପ୍ରେକ୍ଷୀରେ ରୁଷ ବୈଦେଶିକ ମନ୍ତ୍ରୀ ଭାରତ ଗସ୍ତରେ ଆସିଥିବା ବେଳେ ଏ ବିଷୟରେ ଅଧିକ ଚର୍ଚ୍ଚା ହୋଇପାରେ।
ଅନ୍ୟପଟେ ଭାରତ ରୁଷଠାରୁ ରିହାତି ଦରରେ ତେଲ କିଣୁଥବାରୁ ଆମେରିକା ସହ୍ୟ କରିପାରୁନାହିଁ। ରୁଷଠାରୁ ଭାରତର ତୈଳ ଆମଦାନି ପରିମାଣକୁ ହଠାତ୍ ବଢ଼ାନଯାଉ ବୋଲି ଆମେରିକା ଚାହୁଁଛି।
