ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଜାତୀୟ ଗଣମାଧ୍ୟମ ଏନଡିଟିଭିର ଲୋକପ୍ରିୟ ଆଙ୍କର୍ ତଥା ବରିଷ୍ଠ ସାମ୍ବାଦିକ ରବିଶ କୁମାର ତୁରନ୍ତ ପ୍ରଭାବ ସହିତ ଚ୍ୟାନେଲର ବରିଷ୍ଠ କାର୍ଯ୍ୟନିର୍ବାହୀ ସମ୍ପାଦକ ପଦରୁ ଇସ୍ତଫା ଦେଇଛନ୍ତି। ନଭେମ୍ବର ୩୦ ବୁଧବାର ଦିନ ରବିଶଙ୍କ ଇସ୍ତଫା ବିଷୟରେ ସୂଚନା ଦେଇ ଏନଡିଟିଭି ସଭାପତି ସୁପର୍ଣ୍ଣା ସିଂ ଚ୍ୟାନେଲର କର୍ମଚାରୀଙ୍କୁ ଏକ ଇମେଲ ପଠାଇଥିବାର ସୂଚନା ଦେଇଛନ୍ତି।
ସୋମବାର ଏନଡିଟିଭିର ପ୍ରମୋଟର୍ କମ୍ପାନୀ କହିଛି ଯେ, ଏହାର ଇକ୍ୱିଟି କ୍ୟାପିଟାଲର ୯୯.୫ ପ୍ରତିଶତ ଆଦାନୀ ଗ୍ରୁପ୍ ମାଲିକାନା ଭିସିପିଏଲ୍ କୁ ସ୍ଥାନାନ୍ତର କରିଛି। ଏହି ସେୟାରଗୁଡିକର ସ୍ଥାନାନ୍ତର ସହିତ, ଆଦାନୀ ଗ୍ରୁପ୍ ଏନଡିଟିଭି ରେ ୨୯.୧୮ ପ୍ରତିଶତ ଅଂଶଧନ ପାଇବ।ସେବେଠାରୁ ଏନଡ଼ି ଟିଭିରେ ଇସ୍ତଫା ସଂଖ୍ଯା ବଢିଚାଲିଛି ।
ଅନ୍ୟପଟେ ରବିଶ ଏନଡିଟିଭିରୁ ଇସ୍ତଫା ଦେଇଛନ୍ତି ଓ ତାଙ୍କ ଇସ୍ତଫା ତୁରନ୍ତ କାର୍ଯ୍ୟକାରୀ ହେବା ପାଇଁ କମ୍ପାନୀ ତାଙ୍କ ଅନୁରୋଧରେ ରାଜି ହୋଇଛି। ତେବେ ଦଶନ୍ଧି ଧରି ରବିଶ ଏନଡିଟିଭିର ଏକ ଅବିଚ୍ଛେଦ୍ୟ ଅଙ୍ଗ ରହି ଆସିଥିଲେ। ଜଣେ ଜଣାଶୁଣା ସାମ୍ବାଦିକ ତଥା ଲେଖକ, ରବିଶ ଏନଡିଟିଭିର କିଛି ଅଗ୍ରଣୀ ସୋ ଯଥା ପ୍ରାଇମ୍ ଟାଇମ୍, ହମ୍ ଲଗ୍, ରବିଶ୍ କି ରିପୋର୍ଟ ଇତ୍ୟାଦି ଆଙ୍କର୍ କରିଛନ୍ତି। ଦିଲ୍ଲୀ ବିଶ୍ୱବିଦ୍ୟାଳୟ ଏବଂ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ମାସ୍ କମ୍ୟୁନିକେସନ୍ (ଆଇଆଇଏମ୍ସି) ର ଜଣେ ଆଲୁମିନି, ସେ ୧୫ ବର୍ଷରୁ ଅଧିକ ସମୟ ଧରି ଏନଡିଟିଭି ସହିତ ରହି ସାମ୍ବାଦିକତା ପାଇଁ ଅନେକ ପୁରସ୍କାର ଜିତିଛନ୍ତି।
ତେବେ ନିକଟରେ ଏକ ସାକ୍ଷାତକାରରେ ଆଦାନୀ ଗ୍ରୁପ୍ ଚେୟାରମ୍ୟାନ୍ ଗୌତମ ଆଦାନୀ କହିଛନ୍ତି ଯେ, ଏନଡିଟିଭି କିଣିବା ଏକ ବ୍ୟବସାୟିକ ସୁଯୋଗ ନୁହେଁ କିନ୍ତୁ ଏହା ତାଙ୍କର ଦାୟିତ୍ଵ ଅଟେ। ଏହି ସମୟରେ ସେ କହିଥିଲେ ଯେ ସ୍ୱାଧୀନତାର ଅର୍ଥ ହେଉଛି ଭଲକୁ ଭଲ ଏବଂ ଭୁଲକୁ ଭୁଲ କହିବା। ଯଦି ସରକାର କିଛି ଭୁଲ କରିଛନ୍ତି, ତେବେ ତୁମେ ଏହା କହିବା ଉଚିତ ଯେ ଏହା ଭୁଲ ଅଟେ। ଅନ୍ୟପକ୍ଷରେ, ଯଦି ସରକାର କିଛି ଭଲ କାମ କରୁଛନ୍ତି, ତେବେ ଏହାକୁ ମଧ୍ୟ ଭଲ ବୋଲି କହିବାକୁ ସାହସ ମଧ୍ୟ ରହିବା ଉଚିତ୍।
