(ସତ୍ୟପାଠ ବ୍ୟୁରୋ) ଭୁବନେଶ୍ବର : କଂଗ୍ରେସ ନେତା ରାହୁଲ ଗାନ୍ଧୀ ଶୁକ୍ରବାର ଦିନ କୋଭିଡ୍ ସଙ୍କଟ ସମୟରେ ସେଣ୍ଟ୍ରାଲ ଭିସ୍ଟା ପ୍ରକଳ୍ପ ନିର୍ମାଣ ନେଇ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ଏହି ପ୍ରକଳ୍ପକୁ “ଅପରାଧିକ ଅପଚୟ” ବୋଲି କହି ଗାନ୍ଧୀ ଲେଖିଛନ୍ତି, ଲୋକଙ୍କ ଜୀବନକୁ କେନ୍ଦ୍ରରେ ରଖନ୍ତୁ – ଏକ ନୂତନ ଘର ପାଇବା ପାଇଁ ଆପଣଙ୍କର ଅନ୍ଧ ଅହଂକାର ନୁହେଁ! ” ବୋଲି ସେ ଟୁଇଟ କରିଛନ୍ତି।
ଗତ ଏକ ବର୍ଷ ଧରି ରାହୁଲ୍ ଗାନ୍ଧୀ ଏବଂ କଂଗ୍ରେସ ପାର୍ଟି ପକ୍ଷରୁ ଦାବି ହୋଇ ଆସୁଛି ଯେ, ସେଣ୍ଟ୍ରାଲ ଭିସ୍ଟା ପ୍ରୋଜେକ୍ଟ କୁ ବନ୍ଦ କରି ସରକାର ଭୟଙ୍କର କଭୋଡ୍ ମହାମାରୀ ମୁକାବିଲା ପାଇଁ ସ୍ବାସ୍ଥ୍ୟ ଭିତ୍ତିଭୂମିରେ ଉନ୍ନତି ଆଣନ୍ତୁ। ସପ୍ତାହେ ପୂର୍ବରୁ, ପରିବେଶ ମନ୍ତ୍ରଣାଳୟର ବିଶେଷଜ୍ଞ ମୂଲ୍ୟାଙ୍କନ କମିଟି (EAC) ସେଣ୍ଟ୍ରାଲ ଭିସ୍ଟା ପ୍ରକଳ୍ପ ପାଇଁ ଆବଶ୍ୟକ କ୍ଲିୟରାନ୍ସ ପ୍ରଦାନ କରିଥିଲା। ଏହି ପ୍ରକଳ୍ପକୁ ଏକ “ଅତ୍ୟାବଶ୍ୟକ ସେବା” ଭାବରେ ନାମିତ କରାଯାଇଛି, ତେଣୁ ମହାମାରୀ ଦ୍ବାରା ଜାତୀୟ ରାଜଧାନୀରେ ଲକଡାଉନ୍ ସତ୍ତ୍ଵେ ଏହାର ନିର୍ମାଣ କାର୍ଯ୍ୟ ଜାରି ରହିଛି। CPWD ଦ୍ବାରା ଦାଖଲ ତଥ୍ୟ ଅନୁଯାୟୀ, ନୂତନ ସଂସଦ ଭବନର ନିର୍ମାଣ କାର୍ଯ୍ୟ ନଭେମ୍ବର 2022 ସୁଦ୍ଧା, ଉପ-ରାଷ୍ଟ୍ରପତିଙ୍କ ଏନକ୍ଲେଭ ମେ 2022 ସୁଦ୍ଧା ଏବଂ ପ୍ରଧାନମନ୍ତ୍ରୀଙ୍କ ବାସଭବନ ଏବଂ ଏସପିଜି ବିଲଡିଂ ଡିସେମ୍ବର 2022 ସୁଦ୍ଧା ଶେଷ ହେବାର ଯୋଜନା ରହିଛି। କୋଭିଡ ମହାମାରୀର ପିକ୍ ସମୟରେ ସେଣ୍ଟ୍ରାଲ ଭିସ୍ଟା ନିର୍ମାଣ କାର୍ଯ୍ୟକୁ ତୁରନ୍ତ ସ୍ଥଗିତ ରଖିବାକୁ ଦିଲ୍ଲୀ ହାଇକୋର୍ଟରେ ଏକ ଆବେଦନ କରାଯାଇଛି ଯେଉଁଥିରେ ଶ୍ରମିକ ତଥା ଏହି ପ୍ରକଳ୍ପରେ ଜଡିତ ଥିବା ଲୋକଙ୍କ ଜୀବନ ରକ୍ଷା ପାଇଁ ନିର୍ମାଣ କାର୍ଯ୍ୟ ତୁରନ୍ତ ବନ୍ଦ ରଖିବାକୁ କୁହାଯାଇଛି। ଏହି ଯୋଜନାରେ ସରକାର ପ୍ରାୟ 13,450 କୋଟି ଟଙ୍କା ଖର୍ଚ୍ଚ କରିବେ।
