(ସତ୍ୟପାଠ ବ୍ୟୁରୋ) ଭୁବନେଶ୍ଵର : କଲ୍ର ଟ୍ୟୁନ୍ ଜରିଆରେ ଲୋକଙ୍କୁ ଟିକା ନେବା ପାଇଁ ସଚେତନ କରାଉଛନ୍ତି କେନ୍ଦ୍ର ସରକାର। ଟିକାକରଣ ଆରମ୍ଭ ହେବା ପରଠାରୁ ଏହି ସଚେତନତା ଜାରି ରହିଛି। ତେବେ ଏହାକୁ ନେଇ ଏବେ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି ଦିଲ୍ଲୀ ହାଇକୋର୍ଟ। ଦିଲ୍ଲୀ ହାଇକୋର୍ଟ ଗୁରୁବାର କେନ୍ଦ୍ର ସରକାରଙ୍କୁ କଟାକ୍ଷ କରି କହିଛନ୍ତି ଯେ , କଲ୍ର ଟ୍ୟୁନ୍ରେ ଗୋଟିଏ ବିରକ୍ତିକର ବାର୍ତ୍ତା ବଜେଇ ଆସୁଛ। ଯେତେବେଳେ କେହି ଜଣେ ଅନ୍ୟ ଜଣକୁ ଫୋନ୍ କରୁଛି କଲ୍ର ଟ୍ୟୁନ୍ରେ ଟିକା ନେବାକୁ କୁହାଯାଉଛି, ଏପଟେ ଟୀକା ନାହିଁ ସେପଟେ ଫୋନ ରେ କଲର ଟୁନ ବଜେଇ ଚାଲିଛ। ଯେଉଁଠି ଆଦୌ ଟିକା ନାହିଁ, ସେଠି କିଏ ଟିକା ନେବ ବୋଲି ହାଇକୋର୍ଟ କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି। ଜଷ୍ଟିସ୍ ଭିପିନ୍ ସାଙ୍ଗି ଏବଂ ରେଖା ପଲ୍ଲୀଙ୍କ ଡିଭିଜନ୍ ବେଞ୍ଚ କହିଛନ୍ତି, IMCR ଦ୍ବାରା ପ୍ରସ୍ତୁତ ହୋଇଥିବା ସଚେତନତା ବାର୍ତ୍ତା ଯେପରିକି “ଡ ରଣଦୀପ ଗୁଲେରିଆ (AIIMS ନିର୍ଦ୍ଦେଶକ) ଙ୍କ ଭିଡିଓଅଡିଓ ଭିଜୁଆଲ୍ ଜାତୀୟ ଚ୍ୟାନେଲରେ ପ୍ରସାରିତ ହେବା ଉଚିତ୍। କୋର୍ଟ ଆହୁରି ମଧ୍ୟ କହିଛନ୍ତି ଯେ ବଲିଉଡ ଅଭିନେତା ଅମିତାଭ ବଚ୍ଚନ କିମ୍ବା ଅନ୍ୟ କୌଣସି ତାରକା “ଡଃ ଗୁଲେରିଆ କିମ୍ବା ଡକ୍ଟର ପଲ୍ (NITI ଆୟୋଗ ସଦସ୍ୟ) ଙ୍କ ପରି ଜଣାଶୁଣା ଡାକ୍ତରଙ୍କ ସହ ସାକ୍ଷାତକାର କରିପାରିବେ। ଏହି ସବୁ ଶୀଘ୍ର କରାଯିବା ଆବଶ୍ୟକ। ତତ୍ପରତାର ଭାବନା ରହିବା ଆବଶ୍ୟକ। ଆମେ ସମୟ ନଷ୍ଟ କରୁଛୁ ବୋଲି କୋର୍ଟ କହିଛନ୍ତି। ବେଞ୍ଚ ଏହା ମଧ୍ୟ କହିଛି ଯେ ଗତ ବର୍ଷ ହାତ ଧୋଇବା ଏବଂ ସ୍ୱଚ୍ଛତା ବିଷୟରେ ଅନେକ ପ୍ରଚାର ଚାଲିଥିଲା। ଅମ୍ଳଜାନ କନସେନଟ୍ରେଟର ଏବଂ ସିଲିଣ୍ଡର ବ୍ୟବହାର ସମ୍ବନ୍ଧରେ ଲୋକମାନଙ୍କୁ ସଚେତନ କରାଯିବା ଆବଶ୍ୟକ। ସୂଚନା ବିସ୍ତାର ଉପରେ ପର୍ଯ୍ୟବେକ୍ଷଣର ଉତ୍ତରରେ କେନ୍ଦ୍ର ସରକାରଙ୍କ ପରାମର୍ଶଦାତା କୋର୍ଟଙ୍କୁ କହିଛନ୍ତି ଯେ ସେମାନେ ସ୍ୱାସ୍ଥ୍ୟ ମନ୍ତ୍ରଣାଳୟର ସଂପୃକ୍ତ ଯୁଗ୍ମ ସଚିବଙ୍କ ସହ ଆଲୋଚନା କରିବେ ଏବଂ ଆସନ୍ତା ସପ୍ତାହରେ ରିପୋର୍ଟ କରିବେ। ଜଷ୍ଟିସ ସାଙ୍ଗୀଙ୍କ ନେତୃତ୍ୱରେ ଏହି ବେଞ୍ଚ ଏପ୍ରିଲ 19 ରୁ ଦେନିକ କୋଭିଡ ସ୍ଥିତି ଉପରେ ନଜର ରଖିଛନ୍ତି । ଦିଲ୍ଲୀ ଡାକ୍ତରଖାନାଗୁଡ଼ିକରେ ମେଡିକାଲ ଅମ୍ଳଜାନ ଉପଲବ୍ଧତା, ଏହାର ବଣ୍ଟନ ଭଳି ପ୍ରସଙ୍ଗରେ ଉଭୟ କେନ୍ଦ୍ର ଏବଂ ଦିଲ୍ଲୀ ସରକାରଙ୍କୁ ବାରମ୍ବାର ନିନ୍ଦା କରାଯାଇଛି।
