ଭୁବନେଶ୍ୱର(ସତ୍ୟପାଠ ବ୍ୟୁରୋ): ପଶ୍ଚିମବଙ୍ଗ ନିର୍ବାଚନର TMC ର ପରାଜୟ ପରେ ବଢିବାରେ ଲାଗିଛି ଦଳୀୟ କନ୍ଦଳ । ଏହା ମଧ୍ୟରେ ମମତା ବାନାର୍ଜୀଙ୍କର ବଡ ବୟାନ ସାମ୍ନାକୁ ଆସିଛି । ତେବେ ଦଳ ଛାଡ଼ି ଯିବାକୁ ଚାହୁଁଥିବା ନେତାମାନଙ୍କୁ ସେ ଖୋଲା ଚେତାବନୀ ଦେଇ କହିଛନ୍ତି ଯେ, ଯେଉଁମାନେ ଦଳ ଛାଡ଼ିବାକୁ ଚାହୁଁଛନ୍ତି ସେମାନେ ଯାଇପାରନ୍ତି, ମୁଁ ଶୂନରୁ ପୁଣି ଥରେ ନୂଆ କରି ଦଳ ଗଢ଼ିବି ବୋଲି କହିଛନ୍ତି । କୋଲକାତା ସ୍ଥିତ ମମତା ବାନାର୍ଜୀଙ୍କ କାଳୀଘାଟ ବାସଭବନରେ ଶନିବାର ଏକ ଗୁରୁତ୍ୱପୂର୍ଣ୍ଣ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା।
ଏଥିରେ ଦଳର ଜାତୀୟ ସାଧାରଣ ସମ୍ପାଦକ ଅଭିଷେକ ବାନାର୍ଜୀଙ୍କ ସମେତ ନିର୍ବାଚନ ଲଢ଼ିଥିବା ସମସ୍ତ ପ୍ରାର୍ଥୀ ଉପସ୍ଥିତ ଥିଲେ। କ୍ଷମତାରୁ ଚ୍ୟୁତ ହେବା ପରେ ଦଳରେ ହେବାକୁ ଥିବା ସମ୍ଭାବ୍ୟ ବିଦ୍ରୋହ କିମ୍ବା ଦଳବଦଳକୁ ରୋକିବା ପାଇଁ ମମତା ଏହି କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। ବୈଠକରେ ମମତା କର୍ମୀମାନଙ୍କୁ ଉତ୍ସାହିତ କରି କହିଛନ୍ତି, TMC କେବେ ମୁଣ୍ଡ ନୁଆଇଁବ ନାହିଁ। ଆମର ଜନମତକୁ ଲୁଟ୍ କରାଯାଇଛି। ଯେଉଁମାନେ ଦଳରେ ରହିଛନ୍ତି, ସେମାନେ ଭଙ୍ଗାଯାଇଥିବା ବା ବନ୍ଦ ଥିବା ଦଳୀୟ କାର୍ଯ୍ୟାଳୟଗୁଡ଼ିକୁ ପୁଣି ଥରେ ରଙ୍ଗ କରି ଖୋଲନ୍ତୁ। ଆବଶ୍ୟକ ପଡ଼ିଲେ ମୁଁ ନିଜେ ମଧ୍ୟ ରଙ୍ଗ କରିବି ବୋଲି କହିଛନ୍ତି ।
ସେପଟେ ପଶ୍ଚିମବଙ୍ଗର ୨୯୪ଟି ବିଧାନସଭା ଆସନ ମଧ୍ୟରୁ TMC ଏଥର ମାତ୍ର ୮୦ଟି ଆସନରେ ବିଜୟୀ ହୋଇ ବିରୋଧୀ ଆସନରେ ବସିବାକୁ ବାଧ୍ୟ ହୋଇଛି। ଦଳର ୨୧୧ ଜଣ ପ୍ରାର୍ଥୀ ପରାଜୟର ସ୍ୱାଦ ଚାଖିଛନ୍ତି, ଯେଉଁଥିରେ ଅନେକ ବରିଷ୍ଠ ନେତା ଓ ମନ୍ତ୍ରୀ ସାମିଲ ଅଛନ୍ତି। ସବୁଠାରୁ ବଡ଼ ଝଟକା ମମତା ବାନାର୍ଜୀଙ୍କୁ ନିଜ ଗଡ଼ କୁହାଯାଉଥିବା ‘ଭବାନୀପୁର’ ଆସନରୁ ମିଳିଛି, ଯେଉଁଠାରେ ସେ ନିଜେ ନିର୍ବାଚନ ହାରି ଯାଇଛନ୍ତି।
