ଭୁବନେଶ୍ୱର(ସତ୍ୟପାଠ ବ୍ୟୁରୋ): ମହାରାଷ୍ଟ୍ରରେ ନୂଆ ସରକାର ଗଠନ ହେବା ପର ଠାରୁ ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଗୋଟିଏ ପରେ ଗୋଟିଏ ଝଟକା ମିଳିବାରେ ଲାଗିଛି । ତେବେ ସିନ୍ଦେ-ଫଡନାଭିସ୍ ସରକାର ଉଦ୍ଧବ ସରକାର ନେଇଥିବା ଅନ୍ୟ ଏକ ନିଷ୍ପତ୍ତିକୁ ରଦ୍ଦ କରିଦେଇଛନ୍ତି | ମିଳିଥିବା ସୂଚନା ମୁତାବକ ମହାରାଷ୍ଟ୍ର ଜଳ ସଂରକ୍ଷଣ ନିଗମ ଜଳ ସଂରକ୍ଷଣ ବିଭାଗ ଅଧୀନରେ କାର୍ଯ୍ୟ କରୁଛି। ଆଉ ନିଗମ ଅଧୀନରେ ଚାଲୁଥିବା ପ୍ରକଳ୍ପଗୁଡିକର ୩,୪୯୦ କୋଟି ଟଙ୍କା ବକେୟା ଥିବାବେଳେ ଏହା ସତ୍ତ୍ୱେ, ଏପ୍ରିଲ ୧ରୁ ମେ ୩୧, ୨୦୨୨ ମଧ୍ୟରେ, ୬,୧୯୧ କୋଟି ଟଙ୍କା ମୂଲ୍ୟର ୪,୩୨୪ ନୂତନ ଯୋଜନା ଅନୁମୋଦନ ହୋଇଥିଲା | ଏଥିମଧ୍ୟରୁ ୫୦୨୦ କୋଟି ୭୪ ଲକ୍ଷ ଟଙ୍କା ମୂଲ୍ୟର ୪୦୩୭ କାର୍ଯ୍ୟକୁ ନେଇ ଟେଣ୍ଡର ହେବାର ଥିଲା |
ତେବେ ବର୍ତ୍ତମାନର ସିନ୍ଦେ ସରକାର ଏହି ସବୁ ପ୍ରକଳ୍ପ କାର୍ଯ୍ୟ ବାତିଲ କରିବାକୁ ନିଷ୍ପତ୍ତି ନେଇଛନ୍ତି। ସରକାର ଏହି ଆଦେଶରେ କହିଛନ୍ତି ଯେ ଏହି ସବୁ କାମ ପାଇଁ ଟେଣ୍ଡର କରନାହିଁ। ଜଳ ସଂରକ୍ଷଣ ବିଭାଗର ଆଦେଶରେ କୁହାଯାଇଛି ଯେ ଟେଣ୍ଡର ପ୍ରକ୍ରିୟା ଶେଷ ହୋଇଥିଲେ ବି କୌଣସି କାର୍ଯ୍ୟ ଆରମ୍ଭ କରାଯିବ ନାହିଁ | ଏହାପୂର୍ବରୁ ନୂତନ ସରକାର ମେଟ୍ରୋ କାର ସେଡକୁ କଞ୍ଜୁର ମାର୍ଗ ବଦଳରେ ଆରେକୁ ସ୍ଥାନାନ୍ତର କରିବାକୁ ନିଷ୍ପତ୍ତି ନେଇଥିଲେ। ଏଥିସହ ୫୬୭.୮ କୋଟି ଟଙ୍କା ମୂଲ୍ୟର ନାନ୍ଦେଡ ଜିଲ୍ଲା ଯୋଜନା କମିଟିର କାର୍ଯ୍ୟ ସ୍ଥଗିତ ରଖାଯାଇଛି। ଏସବୁ ନିଷ୍ପତ୍ତି ନେଇ ଉଦ୍ଧବ ସରକାରଙ୍କୁ ସିନ୍ଦେ ବଡ ଝଟକା ଦେଇଛନ୍ତି | ଏ ଖବର ସାମ୍ନାକୁ ଆସିବା ପରେ ସାରା ଦେଶରେ ଏନେଇ ଚର୍ଚ୍ଚା ଜୋର୍ ଧରିବାରେ ଲାଗିଛି ।
