ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଦୁର୍ନୀତିକୁ ନେଇ କେନ୍ଦ୍ରର ଭାଜପା ସରକାରଙ୍କୁ ଜୋରଦାର ଟାର୍ଗେଟ କରିଛନ୍ତି। ପଶ୍ଚିମବଙ୍ଗ ଶିକ୍ଷାମନ୍ତ୍ରୀ ପାର୍ଥ ଚାଟାର୍ଜୀଙ୍କୁ ଗିରଫ କରାଯାଇଥିବାବେଳେ ଏବେ ସେ ମଧ୍ୟପ୍ରଦେଶ ଶିକ୍ଷା ମନ୍ତ୍ରୀଙ୍କୁ ଭ୍ୟାପମ ସ୍କାମରେ ଗିରଫ ନକରିବା ଉପରେ ପ୍ରଶ୍ନ ଉଠାଇଛନ୍ତି। ଶନିବାର କୋଲକାତାରେ ଆୟୋଜିତ ଏକ କାର୍ଯ୍ୟକ୍ରମକୁ ସମ୍ବୋଧିତ କରି ମମତା କହିଛନ୍ତି ଯେ, ମଧ୍ୟପ୍ରଦେଶରେ ଏଭଳି ଏକ ବଡ଼ ଭ୍ୟାପମ ସ୍କାମ ଘଟି ୫୪ ଜଣ ଆତ୍ମହତ୍ୟା କରିଛନ୍ତି। କାହିଁକି ଏହି ଘୋଟାଲାରେ ମଧ୍ୟପ୍ରଦେଶର ଶିକ୍ଷା ମନ୍ତ୍ରୀଙ୍କୁ ଗିରଫ କରାଯାଇ ନାହିଁ ବୋଲି ସେ ପ୍ରଶ୍ନ କରିଛନ୍ତି।
ଶିକ୍ଷକ ନିଯୁକ୍ତି ସ୍କାମରେ ଗିରଫ ହୋଇଥିବା ପଶ୍ଚିମବଙ୍ଗ ଶିକ୍ଷା ମନ୍ତ୍ରୀ ପାର୍ଥ ଚାଟାର୍ଜୀଙ୍କୁ ପରୋକ୍ଷ ସୁରକ୍ଷା ଦେଇ ମମତା କହିଛନ୍ତି, କିଛି ପ୍ରାର୍ଥୀ ଶିକ୍ଷକ ଚାକିରି ନ ପାଇ ରାସ୍ତାରେ ଆନ୍ଦୋଳନ କରିଥିଲେ। ଯେତେବେଳେ ମୁଁ ତତ୍କାଳୀନ ଶିକ୍ଷା ମନ୍ତ୍ରୀଙ୍କୁ ଏହାର କାରଣ ପଚାରିଲି, ସେ କହିଥିଲେ ଯେ ତାଙ୍କର ନମ୍ବର ଯୋଗ୍ୟତାଠାରୁ କମ ରହିଛି। ଯେହେତୁ ଆମ ସରକାର ସମସ୍ତଙ୍କ ପ୍ରତି ସର୍ବଦା ଦୟା ପ୍ରଦର୍ଶନ କରନ୍ତି, ମୁଁ ସେମାନଙ୍କୁ କହିଲି ସଂଖ୍ୟା ବୃଦ୍ଧି କରନ୍ତୁ ଏବଂ ସମ୍ଭବ ହେଲେ ସେମାନଙ୍କ ପାଇଁ ବ୍ୟବସ୍ଥା କରନ୍ତୁ । ମମତା ଆହୁରି କହିଛନ୍ତି ଯେ, ନିମ୍ନ ସ୍ତରର ଲୋକମାନେ ଭୁଲ କଲେ ଦୋଷ ଉପର ସ୍ତର ପର୍ଯ୍ୟନ୍ତ ଆସିଥାଏ। ଏହା ବ୍ୟତୀତ, କାର୍ଯ୍ୟ କରିବା ସମୟରେ ତ୍ରୁଟି ଘଟିଲେ, ସେମାନଙ୍କୁ ସଂଶୋଧନ କରିବାର ସୁଯୋଗ ଦିଆଯିବା ଉଚିତ। ଏହି ଅବସରରେ ମମତା ୮୯ ହଜାର ଶିକ୍ଷକ ନିଯୁକ୍ତି ଘୋଷଣା କରିଥିଲେ। ସେ କହିଛନ୍ତି, ଆମେ ଚାକିରି ଦେବାକୁ ଚାହୁଁଛୁ, କିନ୍ତୁ କିଛି ଲୋକ କୋର୍ଟରେ ଜନସ୍ବାର୍ଥ ମାମଲା ଦାଖଲ କରି ଏହି ପ୍ରକ୍ରିୟାକୁ ଅଟକାଇବାକୁ ଚାହୁଁଛନ୍ତି। ଫଳରେ ନିଯୁକ୍ତି ପ୍ରକ୍ରିୟାରେ ବିଳମ୍ବ ଘଟୁଛି ବୋଲି ମମତା କହିଛନ୍ତି।
