କେନ୍ଦୁଝର ସଦର ଥାନା ପଦ୍ମପୁର ଗ୍ରାମରେ ହତ୍ୟାକାଣ୍ଡ । ବିଳମ୍ବିତ ରାତିରେ ଭୁଜାଲିରେ ଆକ୍ରମଣ କରି ମେଡ଼ିସିନ ଦୋକାନ କର୍ମଚାରୀଙ୍କୁ ବିଭତ୍ସ ହତ୍ୟା କରି ଚମ୍ପଟ ମାରିଲେ ଦୁର୍ବୃତ୍ତ । ମୃତ ବ୍ୟକ୍ତି ଜଣଙ୍କ ହେଉଛନ୍ତି ଝାରଖଣ୍ଡର ଜୋଶବନ୍ତ ବାଗେଲ ।
ସୂଚନା ଅନୁଯାୟୀ, ଗତକାଲି( ଶୁକ୍ରବାର) ରାତିରେ ଜୋଶବନ୍ତ ଦୋକାନ ବନ୍ଦ କରି ଘରକୁ ଫେରୁଥିବା ବେଳେ କିଛି ଦୁର୍ବୃତ୍ତ ତାଙ୍କୁ ଭୁଜାଲିରେ ଆକ୍ରମଣ କରିଥିଲେ । ପ୍ରଥମେ ତାଙ୍କ ମୁଣ୍ଡକୁ ଆକ୍ରମଣ କରିବା ପରେ ଛାତିକୁ ଭୁଜାଲିରେ ଆକ୍ରମଣ କରିଥିଲେ । ଏନେଇ ଖବର ପାଇ ସଦର ପୋଲିସ ଘଟଣାସ୍ଥଳରେ ପହଞ୍ଚି ଜୋଶବନ୍ତକୁ ଉଦ୍ଧାର କରି କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲା । କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।ଏନେଇ ସଦର ପୋଲିସ ଘଟଣା ସ୍ଥଳରେ ଅଧିକ ତଦନ୍ତ ଚଳାଇଛି । ତେବେ ବ୍ୟକ୍ତି ଜଣଙ୍କୁ କାହିଁକି ଏପରି ହତ୍ୟା କରାଗଲା ସେନେଇ ସ୍ପଷ୍ଟ ସୂଚନା ମିଳିପାରି ନାହିଁ । ଏହି ହତ୍ୟାକାଣ୍ଡ ପରେ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ଦେଖା ଦେଇଛି । ତେବେ ଦୁଇ ଦିନ ପୂର୍ବରୁ ତାଙ୍କୁ କିଛି ଯୁବକ ଧମକ ଦେଇଥିବା ସ୍ଥାନୀୟ ଲୋକଙ୍କ ଠାରୁ ଜଣାପଡିଛି ।
