ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ରାଜ୍ୟରେ ୫-ଟି କାର୍ଯ୍ୟକ୍ରମ ଅନ୍ତର୍ଗତ ରୂପାନ୍ତରୀତ ହାଇସ୍କୁଲ ଗୁଡିକୁ ଅପଗ୍ରେଡ୍ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଥିବା ଜଣାପଡିଛି । ୨୦୨୩- ୨୪ ଶିକ୍ଷା ବର୍ଷରୁ ରାଜ୍ୟର ୫୭ ଟି ହାଇସ୍କୁଲକୁ ଅପଗ୍ରେଡ୍ କରାଯାଇ ଯୁକ୍ତ ୨ ଛାତ୍ରଛାତ୍ରୀଙ୍କ ପାଠପଢା ଆରମ୍ଭ କରାଯିବ । ଏହି ସ୍କୁଲ ଗୁଡିକରେ ଏକାଦଶ ଶ୍ରେଣୀ ପାଠପଢିବା ପାଇଁ ଛାତ୍ରଛାତ୍ରୀମାନେ ସୁଯୋଗ ପାଇବେ ।ବିଶେଷ କରି ଦୁର୍ଗମ ଓ ଉପାନ୍ତ ଅଞ୍ଚଳ ଗୁଡିକରେ ଛାତ୍ରଛାତ୍ରୀଙ୍କ ଉଚ୍ଚ ଶିକ୍ଷା କ୍ଷେତ୍ରରେ ଅସୁବିଧାକୁ ଅନୁଭବ କରି ରାଜ୍ୟ ସରକାର ଏଭଳି ଏକ ପଦକ୍ଷେପ ଗ୍ରହଣ କରିଛନ୍ତି । ଆଗାମୀ ଦିନରେ ରାଜ୍ୟର ଅନ୍ୟୁନ ୧୦୦ଟି ସ୍କୁଲକୁ ଅପଗ୍ରେଡ୍ କରାଯିବାର ସରକାର ପରିକଳ୍ପନା କରୁଥିବା ବେଳେ ବର୍ତ୍ତମାନ କଳାହାଣ୍ଡି ଜିଲ୍ଲାରେ ୭ଟି ହାଇସ୍କୁଲକୁ ଅପଗ୍ରେଡ୍ କରାଯିବ ବୋଲି ସୂଚନା ମିଳିଛି ।
ଏହି ସ୍କୁଲଗୁଡିକ ମଧ୍ୟରେ ସରକାରୀ ଉଚ୍ଚ ବିଦ୍ୟାଳୟ ସେଁପୁର (ଭବାନୀପାଟଣା), ବିଜିଏଚଏସ୍ ମହିଚଲା (ଜୁନାଗଡ), ଆରକେଏନଏଚଏସ୍ ଶାନ୍ତପୁର (ନର୍ଲା), ଉଲିକୁପା ୟୁଜିଏଚ୍ଏସ୍, ନିସାନପୁର (ନର୍ଲା), ସରକାରୀ ଉଚ୍ଚ ବିଦ୍ୟାଳୟ ମହୁଲପାଟଣା (ଥୁଆମୂଳ ରାମପୁର), ସରକାରୀ ଉଚ୍ଚ ବିଦ୍ୟାଳୟ କିଆପଦର (ଥୁଆମୂଳ ରାମପୁର), ସରକାରୀ ଉଚ୍ଚ ବିଦ୍ୟାଳୟ କାଣିଗୁମା (ଥୁଆମୂଳ ରାମପୁର) ଅନ୍ତର୍ଭୁକ୍ତ କରାଯାଇଛି ।
ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ଓ ଓସେପାର ମିଳିତ ଆନୁକୂଲ୍ୟରେ ଏହା କାର୍ଯ୍ୟକାରୀ ହେବ ବୋଲି ଜଣାପଡିଛି । ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ତରଫରୁ ଶିକ୍ଷକ ଯୋଗାଇ ଦିଆଯିବ ବୋଲି କୁହାଯାଇଛି । କଳାହାଣ୍ଡି ଜିଲ୍ଲାରେ ଗତ ମାଟ୍ରିକ ପରୀକ୍ଷା ଫଳ ଅନୁସାରେ କଳାହାଣ୍ଡି ଜିଲ୍ଲାରେ ସମୁଦାୟ ୩୪୦ଟି ସ୍କୁଲର ୨୦୧୨୧ ଜଣ ଛାତ୍ର ଛାତ୍ରୀ ଉତ୍ତୀର୍ଣ୍ଣ ହୋଇଛନ୍ତି । ଚଳିତ ବର୍ଷ ଜିଲ୍ଲାର ମୋଟ ପାସ୍ ହାର ୮୮.୧୬ ପ୍ରତିଶତ ହୋଇଛି । ତେବେ ମାଟ୍ରିକ ପରୀକ୍ଷା ଦେବା ପାଇଁ ୨୨୮୨୨ ଜଣ ପରୀକ୍ଷା ଫର୍ମ ପୂରଣ କରିଥିଲେ । ସେମାନଙ୍କ ମଧ୍ୟରୁ ୨୩୭୩ ଜଣ ଅନୁପସ୍ଥିତ ଥିଲେ । ପାସ୍ କରିଥିବା ଛାତ୍ରଛାତ୍ରୀଙ୍କ ମଧ୍ୟରେ ୬୧ ଜଣ (ଏ-୧), ୧୩୯୬ ଜଣ (ଏ୨), ୫୫୪୩ ଜଣ (ବି-୧), ୬୯୫୩ ଜଣ (ବି-୨), ୪୧୬୬ ଜଣ (ସି), ୧୬୫୯ ଜଣ (ଡି) ୩୪୩ ଜଣ (ଇ) ରେଙ୍କରେ ପାସ୍ କରିଥିବା ବେଳେ ୩୨୪ ଜଣ ଛାତ୍ରଛାତ୍ରୀ ଫେଲ ହୋଇଥିବା ଜଣାପଡିଛି ।
ସମୁଦାୟ ୨୦୧୨୧ ଜଣ ଛାତ୍ରଛାତ୍ରୀଙ୍କ ମଧ୍ୟରେ ୯୮୪୧ ଛାତ୍ର ଓ ୧୦୨୮୦ ଛାତ୍ରୀ ପାସ୍ କରିଥିବା ଜିଲ୍ଲା ଶିକ୍ଷା ଅଧିକାରୀ କାର୍ଯ୍ୟାଳୟ ସୂତ୍ରରୁ ସୂଚନା ମିଳିଥିଲା । କଳାହାଣ୍ଡି ଜିଲ୍ଲାରେ ଥିବା ଉପାନ୍ତ ଅଞ୍ଚଳ ଥୁଆମୂଳ ରାମପୁର, ଲାଞ୍ଜିଗଡ, ନର୍ଲା ଇତ୍ୟାଦି ବ୍ଲକରେ ଛାତ୍ରଛାତ୍ରୀମାନେ ପାସ୍ କରିଥିଲେ ମଧ୍ୟ ଉଚ୍ଚ ଶିକ୍ଷା ପାଇଁ ଜିଲ୍ଲା କିମ୍ବା ଜିଲ୍ଲା ବାହାରେ ଯାଇ ପଢିବା ସମ୍ଭବ ହୋଇପାରୁନଥିଲା । ରାଜ୍ୟ ସରକାରଙ୍କ ଏହି ହାଇସ୍କୁଲ ଅପଗ୍ରେଡ୍ ଯୋଜନା ଏକ ଯୁଗାନ୍ତକାରୀ ପଦକ୍ଷେପ ହୋଇଥିବାରୁ ତାହା ଛାତ୍ରଛାତ୍ରୀଙ୍କ ଉଚ୍ଚତର ଶିକ୍ଷା କ୍ଷେତ୍ରରେ ବେସ୍ ସହାୟକ ହେବ ବୋଲି ବିଭିନ୍ନ ମହଲରେ ମତପ୍ରକାଶ ପାଇଛି ।
